ଚଣ୍ଡିଖୋଲ,୧୦ା୩(ଡି.ଏନ୍.ଏ.):ଯାଜପୁର ଜିଲା ବଡ଼ଚଣା ବ୍ଲକ ମଝିପଡ଼ା ପଞ୍ଚାୟତର ସରପଞ୍ଚଙ୍କ ଦସ୍ତଖତ ଜାଲିଆତି କରି ଏହି ପଞ୍ଚାୟତର ନିର୍ବାହୀ ଅଧିକାରୀ(ପିଇଓ) ଟଙ୍କା ଉଠାଇ ନେଇଛନ୍ତି। ଏନେଇ ସରପଞ୍ଚ ଶୋଭା ବଜ୍ରକବାଟ ପିଇଓ ପ୍ରଶାନ୍ତ ଜେନାଙ୍କ ନାମରେ ବାଲିଚନ୍ଦ୍ରପୁର ଥାନାରେ ଏତଲା ଦେବା ସହ ବଡ଼ଚଣା ବିଡିଓଙ୍କ ନିକଟରେ ଅଭିଯୋଗ କରିଛନ୍ତି। ଏହାସହିତ ଗୁରୁବାର ଯାଜପୁର ଜିଲାପାଳଙ୍କୁ ଭେଟି ଏହାର ତଦନ୍ତ ପାଇଁ ନିବେଦନ କରିଛନ୍ତି।
ପିଇଓ ଜେନା ଗତ ସେପ୍ଟେମ୍ବରରେ ୨ ଲକ୍ଷ ୪୨ ହଜାର ଟଙ୍କା ଜଳ ଯୋଗାଣ ପାଇଁ ପଞ୍ଚାୟତ ଅର୍ଥରୁ ଉଠାଇଥିଲେ। ଟଙ୍କା ଉଠାଇବା ସମୟରେ ସରପଞ୍ଚଙ୍କ ଦସ୍ତଖତର ଆବଶ୍ୟକତା ରହିଥିବାବେଳେ ସେ ତାହାକୁ ଜାଲିଆତି କରିଥିଲେ। ଏ ସମ୍ପର୍କରେ ସରପଞ୍ଚ ଜାଣିବା ପରେ ଗତ ସୋମବାର ଜେନାଙ୍କୁ ଟେଲିଫୋନ ଯୋଗେ ଘଟଣା ସମ୍ପର୍କରେ ପଚାରିଥିଲେ। ଘଟଣାକୁ ଜେନା ସ୍ବୀକାର କରିବା ସହ ସମସ୍ତ ଅର୍ଥ ପଇଠ କରିଦେବେ ବୋଲି କହିଥିଲେ। ଏହାପରେ ସରପଞ୍ଚ ବଡ଼ଚଣା ବିଡିଓ ରବୀନ୍ଦ୍ର ପ୍ରଧାନଙ୍କୁ ସାକ୍ଷାତ କରି ଅଭିଯୋଗପତ୍ର ଦାଖଲ କରିବା ସହ ବାଲିଚନ୍ଦ୍ରପୁର ଥାନାରେ ଅଭିଯୋଗ କରିଥିଲେ। ତେବେ ଅଭିଯୋଗ ପରେ ପିଇଓ ଜେନା ପଞ୍ଚାୟତ ଆକାଉଣ୍ଟରେ ୨ଲକ୍ଷ ୪୨ହଜାର ଟଙ୍କା ଜମା କରିଦେଇଥିବା ଜଣାପଡ଼ିଛି।
ସରକାରୀ ନିୟମ ଅନୁସାରେ ସରପଞ୍ଚ ଓ ପିଇଓଙ୍କ ମିଳିତ ଦସ୍ତଖତ ରହିବା ପରେ ଟଙ୍କା ଉଠାଣ ହେବା କଥା। କିନ୍ତୁ ଏଠାରେ ତାହା କିପରି ସମ୍ଭବ ହେଲା ତାହାକୁ ନେଇ ପ୍ରଶ୍ନ ଉଠିଛି। ଏହି ଟଙ୍କା ଉଠାଣ ଘଟଣାରେ କେବଳ ନିର୍ବାହୀ ଅଧିକାରୀ ସାମିଲ ନା ବ୍ଲକର ଅନ୍ୟ କର୍ମଚାରୀ ସାମିଲ ତାହା ଏବେ ସନ୍ଦେହରେ। ସରପଞ୍ଚ କହିଛନ୍ତି, ନିର୍ବାଚନକୁ ଏକ ବର୍ଷ ପୁରିଥିଲେ ମଧ୍ୟ ବାରମ୍ବାର ଆବେଦନ ସତ୍ତ୍ୱେ ମୋତେ ବ୍ଲକ ପ୍ରଶାସନ ପକ୍ଷରୁ ଡିଜିଟାଲ ସିଗ୍ନେଚର ପ୍ରଦାନ କରାଯାଉ ନାହଁି, ଯାହାକୁ ନେଇ ପିଇଓ ଜେନା ଟଙ୍କା ଉଠାଣ କରିଛନ୍ତି। ଅପରପକ୍ଷରେ ଏକ ବର୍ଷ କାଯର୍ୟାକାଳ ସମୟରେ ହୋଇଥିବା ସମସ୍ତ ଆର୍ଥିକ କାରବାରର ତଦନ୍ତ କରିବାକୁ ସେ ଦାବି କରିଛନ୍ତି। ଏସମ୍ପର୍କରେ ବିଡିଓ ପ୍ରାଧାନଙ୍କୁ ପଚାରିବାରୁ ସେ କହିଛନ୍ତି, ସରପଞ୍ଚଙ୍କ ଅଭିଯୋଗ ମିଳିଛି। ଘଟଣାର ତଦନ୍ତ ପାଇଁ ଏବିଡିଓଙ୍କୁ ନିର୍ଦ୍ଦେଶ ଦିଆଯାଇଛି। ଗୁରୁବାର ଏବିଡିଓ ରଞ୍ଜନ କୁମାର ବେହେରା ମଝିପଡ଼ା ଯାଇ ତଦନ୍ତ କରି ଫେରିଛନ୍ତି। ତଦନ୍ତ ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଘଟଣା ସମ୍ପର୍କରେ ପିଇଓ ଜେନାଙ୍କୁ ପଚାରିବାରେ ସେ ପଞ୍ଚାୟତ ଆକାଉଣ୍ଟରେ ଟଙ୍କା ଜମା କରି ଦେଇଥିବା ସୂଚନା ଦେଇଛନ୍ତି। ତେବେ କେବେ କାର୍ଯ୍ୟାନୁଷ୍ଠାନ ନିଆଯାଉଛି ତାକୁ ଦେଖିବାକୁ ଅପେକ୍ଷା ରହିଛି। ସୂଚନା ଥାଉକି, ପିଇଓ ଜେନା ମଝିପଡ଼ା ସମେତ ଗୋପାଳପୁର ଓ ବରପଦା ପଞ୍ଚାୟତ ଦାୟିତ୍ୱରେ ଅଛନ୍ତି। ୩ଟି ପଞ୍ଚାୟତର ଦାୟିତ୍ୱରେ ଥିବାବେଳେ ତାଙ୍କ ବିରୋଧଷର ଏହିଭଳି ନ କଲି କାରବାର କରିଥିବା ଅଭିଯୋଗ ଆସି ପହଞ୍ଚତ୍ଲାଣି। ଏହି କାର୍ଯ୍ୟରେ ଜଣେ ନିଲମ୍ବିତ ପିଇଓ ତାଙ୍କୁ ସାହାଯ୍ୟ କରିଥିବା ପଞ୍ଚାୟତ ତରଫରୁ ଅଭିଯୋଗ ହୋଇଛି। ତଦନ୍ତ ପରେ ପ୍ରକୃତ ରହସ୍ୟ ଜଣାପଡ଼ିବ ବୋଲି ସାଧାରଣରେ ମତପ୍ରକାଶ ପାଇଛି।