ନୂଆଦିଲ୍ଲୀ, ୧୯।୫- ହଂକଂ କ୍ରିକେଟ ଦଳର ଅଧିନାୟକ ତଥା ଓଡ଼ିଆ କ୍ରିକେଟର ଅଂଶୁମାନ ରଥ ଏକ ସର୍ତ୍ତରେ ଭେଟେରାନ ଭାରତୀୟ ଅଫ୍ ସ୍ପିନର ହରଭଜନ ସିଂଙ୍କୁ ହରାଇ ଦେଇଛନ୍ତି। ଏଥିସହ ଅଂଶୁମାନ ସର୍ତ୍ତ ବାବଦରେ ରଖାଯାଇଥିବା ୧୦୦ ଟଙ୍କା ଦେବାକୁ ହରଭଜନଙ୍କୁ କହିଛନ୍ତି। ଘଟଣାରୁ ପ୍ରକାଶ ଯେ, ନିକଟରେ ଚେନ୍ନାଇ ସୁପର୍ କିଙ୍ଗ୍ସର ଦୁଇ ବରିଷ୍ଠ ଖେଳାଳି ହରଭଜନ ଓ ଅଲ୍ରାଉଣ୍ଡର କେଦାର ଯାଦବ ଏକ ଟିଭି ଶୋ ‘ହ୍ବାଟ୍ ଦି ଡକ୍’ରେ ଅଂଶଗ୍ରହଣ କରିଥିଲେ। ଏହି ଅବସରରେ କେଦାରଙ୍କ ସହ ଏକ ଫଟୋ ଉଠାଇ ହରଭଜନ ଏହାକୁ ନିଜ ଟୁଇଟର୍ ଆକାଉଣ୍ଟରେ ପୋଷ୍ଟ କରିଥିଲେ। ଏଥିସହ ମଜାରେ ଉଲ୍ଲେଖ କରିଥିଲେ ଯେ, ଯେଉଁ ଖେଳାଳି କେଦାରଙ୍କ ବଲ୍କୁ ବ୍ୟାକ୍ ଫୁଟ୍ରେ ଛକା ମାରିବ ସେ ତାଙ୍କୁ ୧୦୦ ଟଙ୍କା ଦେବେ। ଏହି ଶୋ’କୁ ଦେଖୁଥିବା ୨୧ ବର୍ଷୀୟ ଅଂଶୁମାନ ସଙ୍ଗେ ସଙ୍ଗେ ୨୦୧୮ ଏସିଆ କପ୍ରେ ଭାରତ ଓ ହଂକଂ ମଧ୍ୟରେ ଖେଳାଯାଇଥିବା ମ୍ୟାଚ୍ର ଏକ ଭିଡିଓକୁ ହରଭଜନଙ୍କ ଆକାଉଣ୍ଟରେ ଶେୟାର କରିଥିଲେ। ଯେଉଁଥିରେ କେଦାରଙ୍କ ବଲକୁ ବ୍ୟାକ୍ଫୁଟ୍ରେ ଅଂଶୁମାନ ଛକା ମାରିଥିବାର ଦେଖିବାକୁ ମିଳିଥିଲା। ଭିଡିଓ ସହିତ ଅଂଶୁମାନ ଲେଖିଥିଲେ ‘ହରଭଜନ ସିଂ ମୋତେ ଲାଗୁଛି ଆପଣଙ୍କ ପାଖରେ ମୋର ୧୦୦ ଟଙ୍କା ଧାର ରହିଲା। ରମିଜ୍ ରାଜା ଓ କେଭିନ ପିଟରସନ ଏହାର ସାକ୍ଷୀ ରହିଛନ୍ତି’। ଉଲ୍ଲେଖଯୋଗ୍ୟ, ଭୁବନେଶ୍ୱରର ବାସିନ୍ଦା ଅଂଶୁମାନ ଗତବର୍ଷ ଏସିଆ କପ୍ର ଏହି ରୋମାଞ୍ଚକ ମ୍ୟାଚ୍ରେ ୭୩ ରନର ଇନିଂସ ଖେଳିଥିଲେ। ଏହି ଇନିଂସରେ ସେ କେଦାରଙ୍କୁ ମଧ୍ୟ ଏକ ଛକା ମାରିଥିଲେ। କିନ୍ତୁ ହଂକଂ ମାତ୍ର ୨୬ ରନରେ ଏହି ମ୍ୟାଚ୍ରେ ଭାରତ ନିକଟରୁ ପରାସ୍ତ ହୋଇଥିଲା।