ଭୁବନେଶ୍ୱର, ୪।୩(କ୍ରୀଡ଼ା ପ୍ରତିନିଧି)- ସର୍ବଭାରତୀୟ ବନବିଭାଗ କ୍ରୀଡ଼ା(ଏଆଇଏଫଏସଏମ)ର ୨୫ତମ ସଂସ୍କରଣ ମଙ୍ଗଳବାର କଳିଙ୍ଗ ଷ୍ଟାଡିୟମରେ ଉଦ୍ଘାଟିତ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥିଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଛନ୍ତି। ” ଓଡ଼ିଶାର ରାଜଧାନୀ ସହରକୁ ସମସ୍ତଙ୍କୁ ଆନନ୍ଦର ସହ ସ୍ବାଗତ କରୁଛି। ଆପଣମାନେ ହେଉଛନ୍ତି ଜଙ୍ଗଲ ଓ ଜୀବଜନ୍ତୁଙ୍କର ପ୍ରକୃତ ରକ୍ଷକ“ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି। ଭାରତର କ୍ରୀଡ଼ା ରାଜଧାନୀଭାବେ କ୍ରମେ ଆଗକୁ ବଢ଼ୁଥିବା ଭୁନେଶ୍ୱରରେ ନିକଟ ଅତୀତରେ ଅନେକ ଜାତୀୟ ଓ ଅନ୍ତର୍ଜାତୀୟ ପ୍ରତିଯୋଗିତା ଆୟୋଜନ ହୋଇଛି। ଓଡ଼ିଶା ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଆରମ୍ଭ ହୋଇଥିବା ଏହି ସର୍ବଭାରତୀୟ ପ୍ରତିଯୋଗିତା ୭ ତାରିଖ ପର୍ଯ୍ୟନ୍ତ ଚାଲିବ।
”ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦିଗ୍ଦର୍ଶନରେ ଓଡ଼ିଶା ଭାରତର ସ୍ପୋଟର୍ସ ସୁପର ପାଓ୍ବାରଭାବେ ଉଭା ହୋଇଛି। କ୍ରୀଡ଼ା କ୍ଷେତ୍ରରେ ରାଜ୍ୟ ଯେପରି ଆଗକୁ ବଢ଼ୁଛି ଏଠାରୁ ଦେଶର ଭବିଷ୍ୟତ ଅଲିମ୍ପିଆନ ବାହାରିବା ଆଉ ବେଶୀଦିନ ନୁହେଁ। ଆଗାମୀ ଟୋକିଓ ଅଲିମ୍ପିକ୍ସରେ ଭାରତ ଭଲ ପ୍ରଦର୍ଶନ କରିବା ନେଇ ମୁଁ ଦୃଢ଼ ଆଶାବାଦୀ“ ବୋଲି ଅନ୍ୟତମ ଅତିଥି ଅଲିମ୍ପିଆନ ଶୁଟର ଗଗନ ନାରଙ୍ଗ ପ୍ରକାଶ କରିଛନ୍ତି। ବିଭିନ୍ନ ରାଜ୍ୟ, କେନ୍ଦ୍ରଶାସିତ ଅଞ୍ଚଳ ଓ ଅନୁଷ୍ଠାନରୁ ୩୭ଟି ଦଳ ଏଥିରେ ଭାଗନେବ। ଆୟୋଜକ ଓଡ଼ିଶାର ୯୨ ଜଣକୁ ମିଶାଇ ମୋଟ ୨୫୦୦ ଆଥଲେଟ୍ ୨୩ଟି ବିଭିନ୍ନ ଇଭେଣ୍ଟ ପାଇଁ ମୁକାବିଲା କରିବେ। ପ୍ରତିଯୋଗୀମାନେ ମହିଳା, ପୁରୁଷ, ଭେଟେରାନ ଓ ସିନିୟର ଭେଟେରାନ କାଟେଗୋରିରେ ପ୍ରତିଦ୍ୱନ୍ଦ୍ୱିତା କରିବେ। ଉଦ୍ଘାଟନୀ ଉତ୍ସବରେ ଅନ୍ୟ ଅତିଥିଙ୍କ ମଧ୍ୟରେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ, ଜଙ୍ଗଲ ଓ ପରିବେଶ ବିଭାଗ ମନ୍ତ୍ରୀ ବିକ୍ରମ କେଶରୀ ଆରୁଖ, କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ପ୍ରମୁଖ ଉପସ୍ଥିତ ଥିଲେ।
