ଅନୁଗୋଳ ଅଫିସ, ୯।୧ – ଧୀରେ ଧୀରେ ବଢ଼ୁଥିବା ପ୍ରଦୂଷଣ ସମସ୍ୟାକୁ କିପରି ନିୟନ୍ତ୍ରଣ କରାଯାଇପାରିବ ସେ ଉପରେ ସର୍ବଭାରତୀୟ ବିଜ୍ଞାନ ପ୍ରଦର୍ଶନୀରେ ନିଜ ପ୍ରକଳ୍ପ ପ୍ରଦର୍ଶନ କରି ଦ୍ୱିତୀୟ ସ୍ଥାନ ଅଧିକାର କରିବା ସହ ବିଚାରକଙ୍କ ଦୃଷ୍ଟି ଆକର୍ଷଣ କରିପାରିଛନ୍ତି ଅନୁଗୋଳର ଛାତ୍ରୀ ସୋନାଲୀ ମିଶ୍ର। ଉତ୍ତରପ୍ରଦେଶର କାନପୁର ଠାରେ ଅନୁଷ୍ଠିତ ଉକ୍ତ ପ୍ରଦର୍ଶନୀରେ ସୋନାଲୀଙ୍କୁ ମିଳିଛି ଏହି ସଫଳତା। ଏହା ପୂର୍ବରୁ ପୂର୍ବ ଭାରତ ବିଜ୍ଞାନ ପ୍ରଦର୍ଶନୀରେ ମଧ୍ୟ ତାଙ୍କର ଏହି ପ୍ରକଳ୍ପ ପ୍ରଥମ ସ୍ଥାନ ଅଧିକାର କରିଥିଲା।
ସୋନାଲୀ ଅନୁଗୋଳ ଗାନ୍ଧୀମାର୍ଗସ୍ଥିତ ସରସ୍ବତୀ ଶିଶୁ ବିଦ୍ୟାମନ୍ଦିରରେ ଯୁକ୍ତ ୨ ବିଜ୍ଞାନର ପ୍ରଥମ ବର୍ଷ ଛାତ୍ରୀ। ତାଙ୍କ ପୈତୃକ ଘର ଢେଙ୍କାନାଳ ଜିଲା ହିନ୍ଦୋଳ ବ୍ଲକ ପାଇକ ପୁରୁଣାକୋଟ ପଞ୍ଚାୟତର ନରହରିପୁର ଶାସନ। ବାପା ପ୍ରକାଶ ମିଶ୍ର ଅନୁଗୋଳର ଏକ ଘରୋଇ କମ୍ପାନୀରେ କାର୍ଯ୍ୟକରୁଥିବାରୁ ମା’ ମମତା ମିଶ୍ର ଓ ସାନ ଭାଇଙ୍କ ସହ ସେ ଅନୁଗୋଳର ହାତୀଶାଳପଡ଼ାରେ ରହୁଛନ୍ତି। ତାଙ୍କଦ୍ୱାରା ନିର୍ମିତ ଉକ୍ତ ପ୍ରକଳ୍ପ ମୁଖ୍ୟତଃ ଯାନବାହନ ଦ୍ୱାରା ହେଉଥିବା ପ୍ରଦୂଷଣକୁ ରୋକିପାରିବ ବୋଲି ସୋନାଲୀ ଦାବି କରିଛନ୍ତି। ସେ କହିଛନ୍ତି, ପ୍ରଦୂଷଣ ସମସ୍ୟାକୁ କିପରି ଅତି ସହଜରେ ଓ ସ୍ବଳ୍ପଖର୍ଚ୍ଚରେ ନିୟନ୍ତ୍ରଣ କରାଯିବ ତାହାକୁ ନେଇ ଚିନ୍ତା କରିଥିଲେ। ସ୍କୁଲର ବିଜ୍ଞାନ ଶିକ୍ଷକଙ୍କ ସାହାଯ୍ୟ ନେଇ ନିଜ ଜ୍ଞାନକୌଶଳ ସହାୟତାରେ ସେ ଉକ୍ତ ପ୍ରକଳ୍ପ ପ୍ରସ୍ତୁତ କରିଥିଲେ। ତାଙ୍କ ଦ୍ୱାରା ନିର୍ମିତ ମେଶିନ୍ ରାସ୍ତା ପାର୍ଶ୍ୱରେ ସମ୍ପୂର୍ଣ୍ଣ ସୋଲାର ସିଷ୍ଟମରେ ଚାଲିବ। ଯାନବାହନ ଦ୍ୱାରା ହେଉଥିବା ପ୍ରଦୂଷଣକୁ ତାହା ଶୋଷିନେଇ ସେଠାରେ ପାଣିରେ ମିଶାଇବ। ପରେ ଉକ୍ତ ପାଣିକୁ ମଶାମାରିବା କାର୍ଯ୍ୟରେ ବ୍ୟବହାର କରାଯିବ। ଯୁବ ବୈଜ୍ଞାନିକ ଭାବେ ପୁରସ୍କୃତ ହେବା ନେଇ ସେ ବେଶ୍ ଖୁସି ଅଛନ୍ତି। ତାଙ୍କର ଏହି ସଫଳତା ପରେ ବିଦ୍ୟାଳୟ କର୍ତ୍ତୃପକ୍ଷ ଓ ପରିବାର ଲୋକଙ୍କ ନିକଟକୁ ଅନେକ ଆଡ଼ୁ ଶୁଭେଚ୍ଛାର ସୁଅ ଛୁଟୁଛି। ତାଙ୍କ ମଡେଲକୁ ସରକାରୀ କିମ୍ବା ଶିଳ୍ପ ସଂସ୍ଥାଗୁଡିକ ବ୍ୟବହାର କରି ପ୍ରଦୂଷଣ ନିୟନ୍ତ୍ରଣ ଦିଗରେ କାର୍ଯ୍ୟ କରିବେ ବୋଲି ସୋନାଲୀ ଆଶା ରଖିଛନ୍ତି।