ଅଯୋଧ୍ୟା,୧୩ା୮(ଆଇଏଏନ୍ଏସ୍): ଅଯୋଧ୍ୟା ରାମ ଜନ୍ମଭୂମି-ବାବ୍ରୀ ମସ୍ଜିଦ ଜମି ବିବାଦ ମାମଲାର ଦୈନନ୍ଦିନ ଶୁଣାଣି ସୁପ୍ରିମକୋର୍ଟରେ ଚାଲିଥିବାବେଳେ ସେପଟେ ଶ୍ରୀରାମଙ୍କର ସର୍ବୋଚ୍ଚ ମୂର୍ତ୍ତି ସ୍ଥାପନକୁ ନେଇ ଅନିଶ୍ଚିତତା ସୃଷ୍ଟି ହୋଇଛି। କାରଣ ପ୍ରକଳ୍ପ ପାଇଁ ଜମି ଅଧିଗ୍ରହଣରେ ପ୍ରତିବନ୍ଧକ ଦେଖାଯାଇଛି। ସରଯୁ ନଦୀକୂଳ ମିର୍ପୁର ଅଞ୍ଚଳରେ ଏଥିପାଇଁ ଜମି ଅଧିଗ୍ରହଣ ହେବାକୁ ଥିବାବେଳେ ପ୍ରସ୍ତାବିତ ଜମିରେ ୫ଟି ମନ୍ଦିର, ୨୨ଜଣଙ୍କର ବ୍ୟକ୍ତିଗତ ଜମି, ୫୧୭ଟି ଗଛ ଓ ୧୬୫ଟି ଘର ରହିଛି। ପ୍ରକଳ୍ପ ଦ୍ୱାରା ପ୍ରଭାବିତ ହେବାକୁ ଥିବା ୮୫ ପ୍ରତିଶତ ଲୋକ ଜମି ଛାଡ଼ିବାକୁ ରାଜି ହେଉନାହାନ୍ତି। ସେମାନଙ୍କ ପ୍ରତିବାଦ ଯୋଗୁ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇପାରୁ ନାହିଁ। ଉକ୍ତ ସ୍ଥାନ ବଦଳରେ ଜାତୀୟ ରାଜପଥ ପାର୍ଶ୍ୱରୁ ଜମି ଅଧିଗ୍ରହଣ କରିବାକୁ ଏବଂ ବିସ୍ଥାପିତ ହେବାକୁ ଥିବା ଲୋକଙ୍କୁ ଅନ୍ୟତ୍ର ଥଇଥାନ କରାଇବା ପାଇଁ ସରଯୁ କଲୋନି ବାସିନ୍ଦା ସଂଘ ପକ୍ଷରୁ କୁହାଯାଇଛି। ବିବାଦ ଏବେ ହାଇକୋର୍ଟରେ ପହଞ୍ଚତ୍ଛି।
ସରଯୁ ନଦୀକୂଳରେ ୧୦୦ ଏକର ଜମି ଉପରେ ରାମଙ୍କ ପ୍ରତିମୂର୍ତ୍ତି ପ୍ରକଳ୍ପ ନିର୍ମାଣ ପରିକଳ୍ପନା କରାଯାଇଥିଲା। ୫୦ ମିଟର ଉଚ୍ଚ ପ୍ଲାଟଫର୍ମ ଉପରେ ନିର୍ମିତ ଏହି ମୂର୍ତ୍ତିର ଉଚ୍ଚତା ୨୫୧ ମିଟର ହେବ, ଯାହାକି ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତିର ମାନ୍ୟତା ପାଇବ। ଉକ୍ତ ପ୍ରତିମୂର୍ତ୍ତି ତଳେ ରାମ ମ୍ୟୁଜିୟମ ନିର୍ମାଣ ହେବ ଯେଉଁଠାରେ ଭଗବାନ ବିଷ୍ଣୁଙ୍କ ସମସ୍ତ ଅବତାର ପ୍ରଦର୍ଶିତ ହେବ। ଏହି ଡିଜିଟାଲ ମ୍ୟୁଜିୟମରେ ଫୁଡ୍ ପ୍ଲାଜା, ଲାଇବ୍ରେରି, ଫଟୋ ଗ୍ୟାଲେରି ଆଦି ରହିବ। ଉତ୍ତରପ୍ରଦେଶ ପର୍ଯ୍ୟଟନ ବିଭାଗ ଜମି ଅଧିଗ୍ରହଣ ପାଇଁ ବିଜ୍ଞପ୍ତି ଜାରି କରିଛନ୍ତି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଏହି ମହତ୍ତ୍ୱାକାଂକ୍ଷୀ ପ୍ରକଳ୍ପର ଅଗ୍ରଗତି ସମୀକ୍ଷା ଲାଗି ସେ ୩ ତାରିଖରେ ଅଯୋଧ୍ୟା ଯାଇଥିଲେ।