ଦବଙ୍ଗ ଖାନ୍ ସଲମାନ ଫିଲ୍ମକୁ ନେଇ ଯେତିକି ଚର୍ଚ୍ଚାରେ ରହୁନାହାନ୍ତି ତା’ଠୁ ଅଧିକ ଚର୍ଚ୍ଚାରେ ରହୁଛନ୍ତି ବିବାହକୁ ନେଇ। ସମସ୍ତେ ଚାହିଁ ରହିଛନ୍ତି ଭାଇଜାନ୍ କେବେ ବିବାହ ବନ୍ଧନରେ ବାନ୍ଧି ହେବେ। ଏମିତିରେ ବି ବୟସ ୫୦ ଟପି ସାରିଲାଣି। ଏବେ କ୍ୟାଟ୍ରିନା କୁଆଡ଼େ ସଲମାନଙ୍କୁ ବିବାହ ପ୍ରସ୍ତାବ ଦେଇଛନ୍ତି। କ୍ୟାଟ୍ ଭାଇଜାନଙ୍କୁ ଦେଇଥିବା ବିବାହ ପ୍ରସ୍ତାବ ଶୁଣି ଫ୍ୟାନମାନେ ବହୁତ ଖୁସି। କିନ୍ତୁ ଏହି ପ୍ରସ୍ତାବ ରିୟଲରେ ନୁହେଁ ରିଲ୍ରେ। ‘ଭାରତ’ ଫିଲ୍ମର ପ୍ରମୋଶନରେ ଏହି ଯୋଡ଼ି ବ୍ୟସ୍ତ ରହିଛନ୍ତି। ଫିଲ୍ମକୁ ନେଇ ସୋସିଆଲ ମିଡିଆରେ ପ୍ରମୋଶନ ବି ଜାରି ରହିଛି। ଏହାର ଏକ ଭିଡିଓକୁ ନିର୍ଦ୍ଦେଶକ ଅଲ୍ଲୀ ଆବାସ ଜାଫର ଶେୟାର କରିଛନ୍ତି। ଯେଉଁଥିରେ କ୍ୟାଟ୍ରିନା ସଲମାନଙ୍କୁ ବିବାହ ପ୍ରସ୍ତାବ ଦେଉଛନ୍ତି। ଏହି ଭିଡିଓରେ କ୍ୟାଟ୍ରିନା ସଲମାନଙ୍କୁ କହୁଛନ୍ତି, ମୋର ବିବାହ ବୟସ ହୋଇଗଲାଣି। ତୁମେ ମୋତେ ବହୁତ ଭଲ ଲାଗୁଛ। ମୋତେ କେବେ ବିବାହ କରିବ କୁହ। ଏହାଶୁଣି ସଲମାନ ‘ସରି ମାଡାମ ସରି’ କହି ଲାଜେଇ ଯାଉଥିବା ଦେଖିବାକୁ ମିଳିଛି। କହିରଖୁଛୁ, ଆସନ୍ତା ଜୁନ୍ ୫ ତାରିଖରେ କ୍ୟାଟ୍ରିନା-ସଲମାନଙ୍କ ଅଭିନୀତ ଫିଲ୍ମ ‘ଭାରତ’ ରିଲିଜ ହେବାକୁ ଯାଉଛି। ଏହି ଫିଲ୍ମରେ ତବୁ, ଜ୍ୟାକି ଶ୍ରଫ୍, ଦିଶା ପଟାନୀ ଏବଂ ସୁନୀଲ ଗ୍ରୋଭର ଅଭିନୟ କରିଛନ୍ତି। ସଲମାନ ‘ଦବଙ୍ଗ-୩’ର ଶୁଟିଂରେ ବି ବ୍ୟସ୍ତ ଅଛନ୍ତି। ଏହା ଚଳିତବର୍ଷ ଶେଷ ଆଡ଼କୁ ରିଲିଜ ହେବ।