????????????????????????????????????
ବ୍ରହ୍ମପୁର ଅଫିସ୍,୧୭ା୯-ଦୃଢ଼ମନା ଯୁବପିଢ଼ିଙ୍କ ବିନା କୌଣସି ଦେଶ ସଶକ୍ତ ହୋଇପାରିବ ନାହିଁ। ଏଣୁ ଅଧିକରୁ ଅଧିକ ଯୁବତୀ ଯୁବକଙ୍କୁ ସଶକ୍ତୀକରଣ କରାଇବାର ଆବଶ୍ୟକତା ରହିଛି। ଯୁବପିଢି ଭବିଷ୍ୟତକୁ ନେଇ ସତର୍କ ଥିବା ବେଳେ ସେମାନଙ୍କୁ ଦରକାର ଉପଯୁକ୍ତ ମାର୍ଗଦର୍ଶନ। ଯୁବପିଢ଼ିଙ୍କୁ ଉଚିତ୍ ମାର୍ଗଦର୍ଶନ ଦେବା ସହ ସଶକ୍ତ କରାଇବା ଉଦ୍ଦେଶ୍ୟରେ ନିଷ୍ଟ୍ରେ ସୋମବାର ‘ଜଜ୍ବା’ ଆୟୋଜିତ ହୋଇଯାଇଛି। ନିଷ୍ଟ ସହଯୋଗରେ ତଥା ଇଣ୍ଡିଆନ୍ ଇନୋଭେସନ୍ ଆଣ୍ଡ ଏଣ୍ଟ୍ରୋପ୍ରିନିୟର୍ଶିପ୍(ଆଇଆଇସିସି) ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଜୟପୁର, ଦିଲ୍ଲୀ ଏବଂ ଓଡ଼ିଶାର ବିଭିନ୍ନ ଅଞ୍ଚଳରୁ ୩ଶହରୁ ଅଧିକ ଯୁବତୀ ଯୁବକ ଭାଗ ନେଇଥିଲେ।
ଯୁବପିଢ଼ି ବର୍ତ୍ତମାନ ବେକାରି ସମସ୍ୟାର ସମ୍ମୁଖୀନ ହେଉଛନ୍ତି। ସେମାନେ ନିଯୁକ୍ତି ସୁଯୋଗ ଖୋଜୁ ଥିଲେ ମଧ୍ୟ ପାଉନାହାନ୍ତି । ସେଥି ପାଇଁ ଅନେକ ନିଜ ସହର ଛାଡ଼ି ଆଉ ଏକ ସହରରେ ଯାଇ ଚାକିରି କରୁଛନ୍ତି। ସେହିଭଳି ବୈଷୟିକ ଶିକ୍ଷା ଜରିଆରେ ଯୁବପିଢ଼ି କ୍ୟାରିୟର ଗଢ଼ିବାକୁ ଉଦ୍ୟମ କରୁଛନ୍ତି । ହେଲେ ବୈଷୟିକ ଶିକ୍ଷା ଏବଂ ସାଧନର ଅଭାବ ଯୋଗୁ ସେମାନେ ଉପଯୁକ୍ତ କ୍ୟାରିୟର୍ ଗଠନ କରିପାରୁନାହାନ୍ତି । ନିଜ ସ୍ବପ୍ନ ପୂରଣ କରିପାରୁ ନାହାନ୍ତି । ଆଗକୁ ବଢ଼ିପାରୁ ନାହାନ୍ତି । ସୋମବାର ଆୟୋଜିତ କାର୍ଯ୍ୟକ୍ରମରେ ଯୁବପିଢ଼ିଙ୍କୁ ବୈଷୟିକ ଜ୍ଞାନ ଦ୍ୱାରା କିଭଳି କ୍ୟାରିୟର ଗଠନ କରାଯାଇପାରିବ, ସେ ସମ୍ପର୍କରେ ମାର୍ଗଦର୍ଶନ ପ୍ରଦାନ କରାଯାଇଥିଲା । ଏଥି ସହ ସେମାନଙ୍କ ମନରେ ଥିବା ବିଭିନ୍ନ ଦ୍ୱନ୍ଦ୍ୱକୁ ଦୂର କରାଯାଇଥିଲା । ଜଣାଶୁଣା ଟେକ୍ନୋକ୍ରାଟ୍ ଗୁରୁ ତଥା ଆଇଆଇଇସିର ଅଧ୍ୟକ୍ଷ ବିମଳ ଡାଗା, କେ.ପି. ଡାଗା, ନିଷ୍ଟର ଅନ୍ବେଷା ରଥ, ଭଗବତୀ ପ୍ରସାଦ ପଟ୍ଟନାୟକ ଓ ସୋମ୍ ପ୍ରସାଦ ଦାସ ପ୍ରମୁଖ ଉପସ୍ଥିତ ଯୁବତୀ ଯୁବକଙ୍କୁ ତାଲିମ ପ୍ରଦାନ କରିଥିଲେ । ଏହି ଅବସରରେ ବିମଳ ଡାଗା କହିଥିଲେ, ୨୦୨୦ ସୁଦ୍ଧା ବିଶ୍ୱର ସର୍ବାଧିକ ଯୁବପିଢ଼ି ଭାରତରେ ଥିବେ । ସେମାନଙ୍କୁ ଦେଶ ବିକାଶରେ ସାମିଲ କରାଯାଇ ପାରିବ। ହେଲେ ସେମାନଙ୍କୁ ଆମତ୍ନିର୍ଭରଶୀଳ, ମାର୍ଗଦର୍ଶନ ଏବଂ ତାଲିମ ଆବଶ୍ୟକ ।
ଆମ ଦେଶର ଯୁବତୀ ଯୁବକମାନେ ଖୁବ୍ ପ୍ରତିଭାଧାରୀ। ବିଶେଷକରି ଆର୍ଥିକ ଅନଗ୍ରସର ଯୁବତୀଯୁବକଙ୍କ ପାଖରେ ପ୍ରତିଭା ଥିଲେ ମଧ୍ୟ ସାଧନା ନାହିଁି ।
ଏଣୁ ପ୍ରତ୍ୟେକ ଯୁବତୀଯୁବକଙ୍କୁ କ୍ୟାରିୟର ଗଠନ ସମ୍ପର୍କିତ ତାଲିମ୍ ଏବଂ ପରାମର୍ଶ ଦେବା ପାଇଁ ଏଭଳି କାର୍ଯ୍ୟକ୍ରମ ଆୟୋଜିତ ହେଉଛି । ଜୟପୁର ପରେ ଓଡ଼ିଶାରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି ବୋଲି ସେ ପ୍ରକାଶ କରିଛନ୍ତି ।