ଭଞ୍ଜନଗର,୩।୧୧(ଡି.ଏନ.ଏ)-ବ୍ରହ୍ମପୁର ଆଞ୍ଚଳିକ ଶିକ୍ଷା ସହକାରୀ ନିର୍ଦ୍ଦେଶକ ବିଶ୍ୱମ୍ବର ଷଢ଼ଙ୍ଗୀ ଗୁରୁବାର ଅଚାନକ ଗାଲେରୀ ଦଣ୍ଡପାଣି ମହାର୍ଥା କଲେଜ ପରିଦର୍ଶନ କରିଥିଲେ। କଲେଜର ଅବ୍ୟବସ୍ଥା ନେଇ ସେ ଅସନ୍ତୋଷ ବ୍ୟକ୍ତ କରିବା ସହ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଏନେଇ ଅବଗତ କରାଇଥିଲେ। ଉକ୍ତ ରିପୋର୍ଟ ଆଧାରରେ ଆଞ୍ଚଳିକ ଶିକ୍ଷା ନିର୍ଦ୍ଦେଶକ ଶନିବାର କଲେଜର ଅଧ୍ୟକ୍ଷଙ୍କ ସମେତ ଅନୁପସ୍ଥିତ ସମସ୍ତ ଅଧ୍ୟାପକଙ୍କ ଦିନକର ଦରମା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ୫ ତାରିଖ ସୁଦ୍ଧା କୈଫିୟତ ଦେବାକୁ ନିର୍ଦ୍ଦେଶ ଦେଇଛନ୍ତି। କାର୍ଯ୍ୟରେ ଅବହେଳା କରିଥିବା କର୍ମଚାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ କଲେଜ ପରିଚାଳନା କମିଟି ସଭାପତି ତଥା ଭଞ୍ଜନଗର ଉପ ଜିଲାପାଳଙ୍କୁ ନିବେଦନ କରାଯାଇଛି। ୫ଟିର ପ୍ରଭାବ ସମଗ୍ର ରାଜ୍ୟରେ ପଡ଼ିଥିବା ଦେଖିବାକୁ ମିଳିଛି। ଗୁରୁବାର ସହକାରୀ ନିର୍ଦ୍ଦେଶକ ଷଡଙ୍ଗୀ ଭଞ୍ଜନଗର ଅଞ୍ଚଳର କିଛି କଲେଜର ଆର୍ଥୀକ କାରବାର କିଭଳି ହେଉଛି ସେନେଇ ଯାଞ୍ଚ କରିବାକୁ ଆସି ଗାଲେରୀ କଲେଜରେ ପୂର୍ବାହ୍ନ ୧୦ଟାରେ ପହଞ୍ଚତ୍ଥିଲେ। କଲେଜରେ ଜଣେ ପିଅନ ଏବଂ ଡାଟାଏଣ୍ଟ୍ରି ଅପରେଟର ଉପସ୍ଥିତ ଥିଲେ। ଅଧ୍ୟକ୍ଷଙ୍କ ସମେତ ଅନ୍ୟ ସମସ୍ତ ଅଧ୍ୟାପକ ଅନୁପସ୍ଥିତ ଥିଲେ। ଏହାପରେ ଜଣେ ପରେ ଜଣେ ଅଧ୍ୟାପକ ଓ ଅଧ୍ୟକ୍ଷ ଆସି ପହଞ୍ଚତ୍ଥିଲେ। କଲେଜ ବାୟୋମେଟ୍ରିକ ରେକର୍ଡ଼ରୁ ଜଣାପଡିଥିଲା କର୍ମଚାରୀମାନେ ନିୟମିତ ଠିକ୍ ସମୟରେ ଆସୁନାହାନ୍ତି।