ନୟାଗଡ଼ ଅଫିସ,୨୧ା୧୦: ନୟାଗଡ଼ ସହରକୁ ଦୈନିକ ଆବଶ୍ୟକ ଅନୁଯାୟୀ ଜଳ ଯୋଗାଣ ହେଉ ନ ଥିବାବେଳେ ଏବେ ୩ଦିନ ହେଲା ସମ୍ପୂର୍ଣ୍ଣ ବନ୍ଦ ହୋଇଛି। ଫଳରେ ସହରବାସୀ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏହାର ସମାଧାନ ବଦଳରେ ଜନସ୍ବାସ୍ଥ୍ୟ ବିଭାଗ ବେଫିକର ଥିବା ଦେଖିବାକୁ ମିଳୁଛି।
ପ୍ରକାଶ ଯେ, ନୟାଗଡ଼ ସହରର ୧୩ ୱାର୍ଡ଼ର ଲୋକମାନଙ୍କ ପାଇଁ ପ୍ରତିଦିନ ୩.୦୧ ନିୟୁତ ଲିଟର ଜଳ ଆବଶ୍ୟକ। ଏପରିସ୍ଥଳେ ପାଇପ୍ ଯୋଗେ ୨.୭୦ ନିୟୁତ ଲିଟର ଜଳ ଯୋଗାଣ କରାଯାଉଛି। ପୁଣି ଦିନକୁ ୪ ଘଣ୍ଟା ପାନୀୟ ଜଳ ଯୋଗାଣ ପାଇଁ ବ୍ୟବସ୍ଥା ଥିବାବେଳେ ବାସ୍ତବରେ କିନ୍ତୁ ୨ ଘଣ୍ଟା ପରେ ବନ୍ଦ କରି ଦିଆଯାଉଛି। ସେହିଭଳି ଅଧିକାଂଶ ଦିନ କାଦୁଅ ଓ ପଙ୍କ ମିଶା ପାଣି ଯୋଗାଣ ହେଉଛି। ଏହାକୁ ଲୋକେ ପିଇବା ଦୂରର କଥା ଅନ୍ୟାନ୍ୟ କାର୍ଯ୍ୟରେ ମଧ୍ୟ ବ୍ୟବହାର କରିପାରୁ ନାହାନ୍ତି। ଚର୍ମ ରୋଗ ହେବା ଆଶଙ୍କା କରି ଏହାକୁ କେହି ବ୍ୟବହାର କରୁ ନ ଥିବା ଓ୍ବାର୍ଡବାସୀ ପ୍ରକାଶ କରିଛନ୍ତି। ଏପରି ଅବସ୍ଥାରେ ଗତ ଶୁକ୍ରବାରଠାରୁ ସହରକୁ ଜଳଯୋଗାଣ ସମ୍ପୂର୍ଣ୍ଣ ଠପ୍ ହୋଇଯାଇଛି। ଏଥିଯୋଗୁ ସହରବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବିଭାଗୀୟ ଅଧିକାରୀଙ୍କ ଅବହେଳା ହେତୁ ଏଭଳି ହେଉଥିବା ଜଣାପଡ଼ିଛି। ପ୍ରକାଶ ଯେ, ମହାନଦୀର କଣ୍ଟିଲୋଠାରେ ନିର୍ମିତ ପ୍ରକଳ୍ପରୁ ଜଳ ସିଧାସଳଖ ଭାବେ ଲୋକଙ୍କୁ ଯୋଗାଇ ଦିଆଯାଉଛି। ନିୟମ ଅନୁଯାୟୀ ନଦୀ ପାଣିକୁ ପ୍ରଥମେ ଟ୍ରିଟ୍ମେଣ୍ଟ ପ୍ଲାଣ୍ଟରେ ବିଶୋଧନ କରାଯାଇଥାଏ। ଟ୍ରିଟ୍ମେଣ୍ଟ ପ୍ଲାଣ୍ଟରେ ରହିବା ପରେ ପାଣିରେ ଫିଟିକିରି, ଚୂର୍ଣ୍ଣ ଓ କ୍ଲୋରିନ ପକାଇ ବିଶୁଦ୍ଧ କରି ସହରବାସୀଙ୍କୁ ଯୋଗାଇବା କଥା। ମାତ୍ର କିଛିଦିନ ହେଲା ବିଶୁଦ୍ଧୀକରଣ ନ କରାଯାଇ ସିଧାସଳଖ ମହାନଦୀ ପାଣି ସହରବାସୀଙ୍କୁ ଯୋଗାଇ ଦିଆଯାଉଥିବା ଜଣାପଡ଼ିଛି। ଅନ୍ୟପଟେ ବିଶୁଦ୍ଧୀକରଣ ପାଇଁ ପ୍ରତି ମାସରେ ଲକ୍ଷାଧିକ ଟଙ୍କା ଆସୁଥିବାବେଳେ ସେ ସବୁ ଟଙ୍କା କେଉଁଆଡ଼େ ଯାଉଛି ତାହା ତଦନ୍ତ ସାପେକ୍ଷ। ଏ ନେଇ ଜନସ୍ବାସ୍ଥ୍ୟ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ଗିରିଶ ଚନ୍ଦ୍ର ବଳଙ୍କୁ ପଚାରିବାରୁ ସେ କହିଥିଲେ, କଣ୍ଟିଲୋସ୍ଥିତ ପ୍ରକଳ୍ପଠାରେ ଏକ ମୋଟର ଖରାପ ହୋଇଯାଇଥିବାରୁ ଏଭଳି ଅସୁବିଧା ଦେଖାଦେଇଛି। ସୋମବାରଠାରୁ ଠିକ୍ ଭାବେ ଜଳ ଯୋଗାଣ କରାଯିବ ବୋଲି ସେ ସୂଚନା ଦେଇଥିଲେ।