ନୟାଗଡ଼ ଅଫିସ,୫ା୮: ସହର ସ୍ବଚ୍ଛ ରଖିବାକୁ ନୟାଗଡ଼ ପୌରପାଳିକା ପକ୍ଷରୁ ଯୋଜନା କରାଯାଇଛି। ଏଥିଲାଗି ସହର ଉପକଣ୍ଠ କ୍ଷେତ୍ରୀବରପୁରଠାରେ ବର୍ଜ୍ୟବସ୍ତୁ ପରିଚାଳନା ପ୍ଲାଣ୍ଟ ପ୍ରତିଷ୍ଠା କରାଯିବ। ପ୍ରଥମେ ସହରରେ ରହୁଥିବା ପରିବାରଗୁଡ଼ିକରୁ ଓଦା ଓ ଶୁଖିଲା ବର୍ଜ୍ୟବସ୍ତୁ ପୌରସଂସ୍ଥା ଦ୍ୱାରା ନିୟୋଜିତ ସଫେଇ କର୍ମଚାରୀମାନେ ଅଲଗା ଭାବେ ସଂଗ୍ରହ କରିବେ। ପରେ ଏହାକୁ ନିର୍ମାଣ ହେବାକୁ ଥିବା ଉକ୍ତ ପ୍ଲାଣ୍ଟକୁ ପଠାଯିବ। ସେଠାରେ ଓଦା ବର୍ଜ୍ୟବସ୍ତୁ ଏକ କୁଣ୍ଡରେ ପକାଯିବ। ଏହା ପରେ ସେଥିରେ ଗୁଡ଼ ଓ ଲୁଣ ଦିଆଯିବ। ୨୧ଦିନ ପରେ ଉକ୍ତ ବର୍ଜ୍ୟବସ୍ତୁ କମ୍ପୋଷ୍ଟ ଖତରେ ପରିଣତ ହେଲେ ତାହାକୁ ବିକ୍ରି କରାଯିବ। ଉକ୍ତ ପ୍ଲାଣ୍ଟରେ ଏହିଭଳି ୨୮ଟି କୁଣ୍ଡ କରାଯାଇ ପ୍ରତି କୁଣ୍ଡରେ ସେହିଦିନ ବାହାରୁଥିବା ଅଳିଆ ପକାଯିବ। ସେହିଭଳି ଶୁଖିଲା ବର୍ଜ୍ୟବସ୍ତୁକୁ ମଧ୍ୟ ଅଲଗା କରାଯିବ। ଭଙ୍ଗା ଲୁହା, କାଚ, ପ୍ଲାଷ୍ଟିକ ଆଦି ପଦାର୍ଥଗୁଡ଼ିକୁ ଅଲଗା କରାଯାଇ କବାଡ଼ିଆକୁ ବିକ୍ରି କରାଯିବ। ଯେଉଁଗୁଡ଼ିକ ନବୀକରଣ ହୋଇପାରିବ ନାହିଁ ତାହାକୁ କଟକର ଏକ ସିମେଣ୍ଟ କାରଖାନାକୁ ଦିଆଯିବ। ଏହିପରି ସହରର ସମସ୍ତ ଅଳିଆ, ଆର୍ବଜନାକୁ ପ୍ଲାଣ୍ଟରେ ପରିଚାଳନା କରାଯାଇ ଆୟ ଉତ୍ସରେ ପରିଣତ କରାଯିବ।
ପ୍ରକାଶ ଯେ, ପ୍ରତିଦିନ ସହରରୁ ପ୍ରାୟ ୧୦ଟନ୍ ଅଳିଆ ବାହାରୁଛି। ତେବେ ପୌର ପରିଷଦର ସୀମା ବଢ଼ିଯିବା ଫଳରେ ଏହା ୧୫ ଟନ୍କୁ ବୃଦ୍ଧି ପାଇବା ଆକଳନ କରାଯାଇଛି। ଏତେ ପରିମାଣର ବର୍ଜ୍ୟବସ୍ତୁ ପରିଚାଳନା କରାଯିବା ପାଇଁ ଉକ୍ତ ପ୍ଲାଣ୍ଟ ନିର୍ମାଣ କରାଯିବ। ଏହାଦ୍ୱାରା ପରିବେଶ ସ୍ବାସ୍ଥ୍ୟକର ଓ ସ୍ବଚ୍ଛ ରହିବ ବୋଲି ପୌର ପରିଷଦ ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ପ୍ରକାଶ କରିଛନ୍ତିି। ବର୍ତ୍ତମାନ ସହରରେ ଥିବା ସ୍ବୟଂ ସହାୟିକା ଗୋଷ୍ଠୀର ମହିଳାମାନଙ୍କ ମଧ୍ୟରୁ କିଛି ମହିଳାଙ୍କୁ ସ୍ବଚ୍ଛ ସାଥୀ ଭାବେ ନିଯୁକ୍ତି ଦିଆଯାଇଛି। ପ୍ରତି ୬୦୦ ପରିବାର ପାଇଁ ଜଣେ ସ୍ବଚ୍ଛ ସାଥୀଙ୍କୁ ନିଯୁକ୍ତ କରାଯାଇଛି। ସେହିଭଳି ପ୍ରତି ୨୪୦୦ ପରିବାରରେ ଜଣେ ସୁପରଭାଇଜରଙ୍କୁ ନିଯୁକ୍ତ କରାଯାଇଛି। ସ୍ବଚ୍ଛ ସାଥୀମାନେ ସହରର ଘର ଘର ବୁଲି କାହା ଘରୁ କେତେ ଅଳିଆ ବାହାରୁଛି ତାହା ଦେଖିବା ସହିତ ଓଦା ଓ ଶୁଖିଲା ଆବର୍ଜନା ଅଲଗା ରଖିବା ପାଇଁ ଲୋକମାନଙ୍କୁ ପ୍ରବର୍ତ୍ତାଇବେ। ସୁପରଭାଇଜରମାନେ ଏହାକୁ ତଦାରଖ କରିବେ। ବର୍ତ୍ତମାନ ସହରରୁ ବାହାରୁଥିବା ଅଳିଆ ସଦର ଥାନା ନିକଟ ଭାଲୁଖୋଲଠାରେ ପଡ଼ୁଛି। ଫଳରେ ପରିବେଶ ପ୍ରଦୂଷିତ ହେଉଛି। କ୍ଷେତ୍ରୀବରପୁରଠାରେ ବର୍ଜ୍ୟବସ୍ତୁ ପରିଚାଳନା ପ୍ଲାଣ୍ଟ ହେବା ଦ୍ୱାରା ପରିବେଶ ପ୍ରଦୂଷିତ ହେବ ନାହିଁ। ସେହିପରି ଭାଲୁଖୋଲଠାରେ ମଳ ଖାଲ କରାଯିବାକୁ ଯୋଜନା ରହିଛି। ଏହି ଯୋଜନା ଦ୍ୱାରା ସହରର ବିଭିନ୍ନ ପାଇଖାନାରୁ ମଳ ସଂଗ୍ରହ କରାଯାଇ ଉକ୍ତ ସ୍ଥାନରେ ହୋଇଥିବା କୁଣ୍ଡ(ଗାତ)ରେ ପକାଯିବ। ପରେ ତାହାକୁ ପରିଚାଳନା କରାଯାଇ ସେଥିରୁ ଜଳ ବାହାର କରାଯାଇ ନିକଟରେ ହେବାକୁ ଥିବା ପାର୍କ ନିମନ୍ତେ ବ୍ୟବହାର ହେବ।