ରାଇସୁଆଁ/କେନ୍ଦୁଝର, ୨୫।୯(ଡି.ଏନ.ଏ./ସ୍ବ.ପ୍ର.)-ସରକାର ଗରିବ ଅସହାୟଙ୍କ ଥଇଥାନ ପାଇଁ ଯୋଜନା ପରେ ଯୋଜନା କରିଚାଲିଛନ୍ତି। ମାତ୍ର ପ୍ରଶାସନିକସ୍ତରରେ ମନୋଭାବର ଅଭାବ ଯୋଗୁ ବହୁ ଗରିବ ଅସହାୟ ସରକାରଙ୍କ ବହୁ ଜନକଲ୍ୟାଣ ଯୋଜନାରୁ ବଞ୍ଚିତ ହେଉଛନ୍ତି। ଏହିପରି ଜଣେ ଅସହାୟ ନିରାଶ୍ରୟ ହେଉଛନ୍ତି କେନ୍ଦୁଝର ଜିଲା ମହାଦେଈଯୋଡ଼ା ପଞ୍ଚାୟତର ରନ୍ଥମରା ଗ୍ରାମର ପ୍ରମିଳା ମୁଣ୍ଡା। ପ୍ରମିଳା ମୁଣ୍ଡାଙ୍କ ସ୍ବାମୀ ବହୁ ଦିନ ଅଜଣା ରୋଗରେ ପଡି ଶେଷରେ ୨ମାସ ପୂର୍ବରୁ ମୃତ୍ୟୁବରଣ କରିଛନ୍ତି। ତାଙ୍କର ୨ ସନ୍ତାନ ରହିଛନ୍ତି। ଜଣେ ୧୨ ବର୍ଷର ହୋଇ ଥିବାବେଳେ ଅନ୍ୟଜଣେ ୧୦ବର୍ଷର। ସ୍ତ୍ରୀ ପ୍ରମିଳା ଦିନ ମଜୁରି କାମ କରି ସ୍ବାମୀଙ୍କ ଚିକିତ୍ସା କରୁଥିଲେ। ଏବେ ସ୍ବାମୀଙ୍କ ମୃତ୍ୟୁ ପରେ ସେହିପରି ଅଜଣା ରୋଗରେ ସେ ପୀଡିତ ହୋଇ ଶଯ୍ୟାଶାୟୀ ହୋଇ ଯନ୍ତ୍ରଣାରେ ପଡିରହିଛନ୍ତି ଖଟିଆରେ। ପ୍ରମିଳାଙ୍କୁ ଘଟଗାଁ ମେଡିକାଲରେ ଚିକିତ୍ସିତ କରାଉଥିଲେ ମାତ୍ର କିଛି ପରିବର୍ତ୍ତନ ନ ହେବାରୁ ତାଙ୍କୁ ଡାକ୍ତର କେନ୍ଦୁଝର ମେଡିକାଲରେ ଭର୍ତ୍ତି କରିଥିଲେ, ମାତ୍ର କେନ୍ଦୁଝର ଡାକ୍ତର ମଧ୍ୟ ରୋଗ ଚିହ୍ନଟ କରି ନ ପାରିବାରୁ ତାଙ୍କୁ ଡାକ୍ତର କଟକ ନେବା ପାଇଁ କହିଛନ୍ତି। ଅସହାୟ ପ୍ରମିଳା ଅତି ଗରିବ ହୋଇଥିବାରୁ କଟକ ଯିବାକୁ ସେ ସମ୍ପୂର୍ଣ୍ଣ ଅକ୍ଷମ। ଅନ୍ୟପଟେ, ପ୍ରମିଳାଙ୍କ ଖବର ପାଇବା ପରେ ପ୍ରଶାସନ ଜିଲା ମୁଖ୍ୟ ଚିକିତ୍ସାଧିକାରୀ ଚିକିତ୍ସାଳୟରେ ତାଙ୍କୁ ଭର୍ତ୍ତି କରିବା ସହ କଟକ ବଡ ମେଡିକାଲକୁ ପଠାଯିବ ବୋଲି ପ୍ରଶାସନ ପକ୍ଷରୁ ସୂଚନା ମିଳିଛି। ତେବେ ଏହା କେତେଦୂର ପୂରା ହେଉଛି ତାହା ଦେଖିବାକୁ ପଡ଼ିବ ବୋଲି ସ୍ଥାନୀୟବାସୀ କହିଛନ୍ତି। କାରଣ ପୂର୍ବରୁ ମଧ୍ୟ ତାଙ୍କୁ ଏପରି ସହାୟତାର ମିଥ୍ୟା ପ୍ରତିଶ୍ରୁତି ମିଳିଥିଲା ତେବେ ତାଙ୍କୁ ତୁରନ୍ତ ସହାୟତା ଯୋଗାଇଦେବାକୁ ଦାବି ହୋଇଛି।
ଫଟୋ-