ପଦ୍ମପୁର,୧।୨(ଡି.ଏନ.ଏ.)-ଭଦ୍ରକ ଜିଲା ବାସୁଦେବପୁର ବ୍ଲକ ଗୋପବନ୍ଧୁନଗର ପଞ୍ଚାୟତ ଅଧୀନ ଗଦି ଗ୍ରାମର ସଞ୍ଜୟ ବଳ(୩୪)। ଘରେ ବାପା, ମା’, ସ୍ତ୍ରୀ ଓ ଦୁଇ ଝିଅପୁଅଙ୍କୁ ନେଇ ତାଙ୍କର ସଂସାର। କେରଳରେ ଏକ ବେସରକାରୀ କମ୍ପାନୀରେ ଚାକିରି କରି ପରିବାର ଚଳାଉଥିଲେ। ହେଲେ ଭାଗ୍ୟର ବିଡ଼ମ୍ବନା ଘଟିଲା। ପ୍ରାୟ ବର୍ଷେ ହେବ ସେ ମଳଦ୍ୱାର କ୍ୟାନ୍ସରରେ ପୀଡ଼ିତ। କିନ୍ତୁ ଅର୍ଥାଭାବ ତାଙ୍କ ଚିକିତ୍ସାରେ ବାଧକ ସାଜିଛି। ପରିବାରର ଆର୍ଥତ୍କ ଅବସ୍ଥା ସ୍ବଚ୍ଛଳ ନ ଥିବାବେଳେ ସ୍ଥାନୀୟ ପ୍ରଶାସନ ପକ୍ଷରୁ ମଧ୍ୟ କୌଣସି ସହାୟତା ମିଳୁ ନାହିଁ ବୋଲି ସଞ୍ଜୟଙ୍କ ପରିବାର ଲୋକ ପ୍ରକାଶ କରିଛନ୍ତି।
ପରିବାର ଲୋକଙ୍କ କହିବା ଅନୁଯାୟୀ, ସଞ୍ଜୟ କେରଳରେ ଚାକିରି କରୁଥିବାବେଳେ ବାରମ୍ବାର ମଳଦ୍ୱାରରେ ଯନ୍ତ୍ରଣା ହେବାରୁ ଗତ ମାର୍ଚ୍ଚ ୧୯ରେ ସେ ଘରକୁ ଚାଲି ଆସିଥିଲେ। ପ୍ରଥମେ ଭଦ୍ରକ ଓ ପରେ ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟରେ ତାଙ୍କର ଚିକିତ୍ସା କରାଇବା ପରେ ବି କିଛି ସୁଫଳ ମିଳିଲାନି। ଶେଷରେ କଟକର ଆଚାର୍ଯ୍ୟ ହରିହର ଚିକିତ୍ସାକେନ୍ଦ୍ରରେ ଚିକିତ୍ସା ପାଇଁ ତାଙ୍କୁ ଭର୍ତ୍ତି କରାଯାଇଥିଲା। ସେଠାରେ ବିଭିନ୍ନ ପରୀକ୍ଷା ପରେ ତାଙ୍କ ମଳଦ୍ୱାରରେ କ୍ୟାନ୍ସର ହୋଇଥିବା ଜଣାପଡ଼ିଥିଲା। ଅପରେଶନ ପାଇଁ ଲକ୍ଷାଧିକ ଟଙ୍କାର ଆବଶ୍ୟକ ଥିବାରୁ ତାଙ୍କୁ ଘରକୁ ଫେରାଇ ଅଣାଯାଇଥିଲା। ଘରର ଜମିବାଡ଼ି ନ ଥିବାରୁ କୌଣସି ପରିସ୍ଥିତିରେ ଚିକିତ୍ସା ପାଇଁ ଅର୍ଥ ଯୋଗାଡ଼ କରିପାରୁ ନାହାନ୍ତି। ଏବେ କେବଳ ସରକାରୀ ସହାୟତାକୁ ଅପେକ୍ଷା। ଜିଲା ରେଡ୍କ୍ରସକୁ ଆର୍ଥିକ ସହାୟତା ନିମନ୍ତେ ୩ ମାସ ତଳେ ଆବେଦନ କରିଥିଲେ। ଦୁଇଦିନ ପୂର୍ବେ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ମାତ୍ର ୧୦ ହଜାର ଟଙ୍କା ସହାୟତା ମିଳିଥିବା ଜିଲା ପ୍ରଶାସନ ସୂଚନା ଦେଇଛି। ମାତ୍ର ଏହି ସହାୟତା ସମୁଦ୍ରକୁ ଶଙ୍ଖେ ସଦୃଶ ବୋଲି ସଞ୍ଜୟଙ୍କ ପରିବାର ଲୋକ କହିଛନ୍ତି। ଘରେ ସଞ୍ଜୟଙ୍କ ବୁଢ଼ାବାପା କେବଳ ଅସହାୟ ଅବସ୍ଥାରେ ପୁଅର ଔଷଧ କିଣିବା ପାଇଁ ଟଙ୍କା ଯୋଗାଡ଼ ଲାଗି ବାରଦୁଆର ବୁଲୁଛନ୍ତି। ଦାରିଦ୍ର୍ୟ ସୀମାରେଖା ତଳେ ଥିବା ତାଙ୍କ ପରିବାରକୁ ରାଶନକାର୍ଡ ଖଣ୍ଡେ ବି ମିଳିନାହିଁ। ୬ ପ୍ରାଣୀଙ୍କ ବୋଝ ସାଙ୍ଗକୁ ବୃଦ୍ଧାବସ୍ଥାରେ ତାଙ୍କୁ ସାହାରା ହେବାକୁ ଥିବା ପୁଅର ଚିକିତ୍ସା ଲାଗି ଅର୍ଥ ଅଭାବ ଦୁଶ୍ଚିନ୍ତାରେ ଦିନ କାଟୁଛନ୍ତି ସଞ୍ଜୟଙ୍କ ବାପା ରତ୍ନାକର। ଦୁରାରୋଗ୍ୟ କ୍ୟାନ୍ସର ପୀଡ଼ିତ ସଞ୍ଜୟ ଔଷଧ ବିନା ପ୍ରତିଦିନ ଅସହ୍ୟ ଯନ୍ତ୍ରଣା ଭୋଗୁଛନ୍ତି। ସରକାରଙ୍କ ତରଫରୁ ତାଙ୍କ ପରିବାରକୁ ଅଧିକ ଆର୍ଥିକ ସହାୟତା ଯୋଗାଇ ଦିଆଗଲେ ସେ ପୁଅର ଚିକିତ୍ସା କରାଇପାରନ୍ତେ ବୋଲି ରତ୍ନାକର କହିଛନ୍ତି।