ବାରିପଦା ଅଫିସ, ୧୫ା୪- ଲକ୍ ଡାଉନ ଲାଗୁ ହେବାଠାରୁ ବାରିପଦା ସହରରେ ଥିବା ଉଠାଦୋକାନୀମାନଙ୍କ ଦୋକାନ ବନ୍ଦ ହୋଇ ପଡ଼ି ରହିଛି। ପରିବାର ପ୍ରତିପୋଷଣ କରିବା ସେମାନଙ୍କ ପାଇଁ କଷ୍ଟକର ହୋଇ ପଡ଼ିଛି। ରାଜ୍ୟ ସରକାରଙ୍କ ପକ୍ଷରୁ ଉଠା ଦୋକାନୀମାନଙ୍କୁ ଚିହ୍ନଟ କରାଯାଇ ୩ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯିବା ନିମନ୍ତେ ନିଷ୍ପତ୍ତି ହୋଇଥିଲା। ଏହିି ପରିପ୍ରେକ୍ଷୀରେ ବାରିପଦା ପୌର ପରିଷଦ ଜରିଆରେ ଏକ ସଂସ୍ଥା ସର୍ଭେ କରି ଉଠା ଦୋକାନୀମାନଙ୍କ ତାଲିକା ପ୍ରଦାନ କରିଥିଲା। ଏଥିରେ ଅଧିକାଂଶ ଉଠା ଦୋକାନୀମାନଙ୍କ ନାମ ବାଦ୍ ପଡ଼ିଥିବା ନେଇ ଉଠା ଦୋକାନୀମାନେ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ମୁର୍ଗାବାଡ଼ି ଗୋଲେଇ ନିକଟସ୍ଥ ରାସ୍ତାକଡ଼ରେ ଅସ୍ଥାୟୀ ଠେଲାଗାଡ଼ି, ଚା ଦୋକାନ, ପାନ ଦୋକାନ କରିଥିବା ଦୋକାନୀଙ୍କ ନାମ ପ୍ରସ୍ତୁତ ତାଲିକାରେ ନାହିଁ। ତେଣୁ ସେମାନଙ୍କୁ ତାଲିକାରେ ଅନ୍ତର୍ଭୁକ୍ତ କରି ଆର୍ଥିକ ସାହାଯ୍ୟ ପ୍ରଦାନ ନିମନ୍ତେ ସେମାନେ ଜିଲାପାଳଙ୍କ ନିକଟରେ ଦାବି କରିଛନ୍ତି। ଅରୁଣ କୁମାର ପାତ୍ର, କମଳାକାନ୍ତ ସେଠୀ, କାହ୍ନୁଚରଣ ତ୍ରିପାଠୀଙ୍କ ସମେତ ଏକାଧିକ ଉଠାଦୋକାନୀ ଜିଲାପାଳଙ୍କ ନିକଟରେ ଦାବି କରିଛନ୍ତି।