ବଲାଙ୍ଗୀର ଅଫିସ,୨୮ା୪-ଲକ୍ଡାଉନ୍ ସମୟରେ ଟ୍ରକ୍ ଡ୍ରାଇଭରମାନଙ୍କୁ ସରକାରୀ ସହାୟତା ଯୋଗାଇ ଦେବା ଦାବି କରି ମଙ୍ଗଳବାର ସଂଘର ସମସ୍ତ ଡ୍ରାଇଭର କାମ ବନ୍ଦ କରିଥିଲେ । ଫଳରେ ବଲାଙ୍ଗୀର ରେଳଷ୍ଟେଶନ୍ରୁ ପଶ୍ଚିମବଙ୍ଗ ମାଲଦାକୁ ଯିବାକୁ ଥିବା ଚାଉଳ ରେକ୍କୁ ଯାଇପାରିନାହିଁ । ବଲାଙ୍ଗୀର ଜିଲା ଟ୍ରକ୍ ଡ୍ରାଇଭର ଆସୋସିଏଶନ୍ ପକ୍ଷରୁ ଦାବି କରାଯାଇଛି ଯେ, କରୋନା ସଂକ୍ରମଣ ସମୟରେ ଟ୍ରକ୍ ଡ୍ରାଇଇଭରମାନେ ନିଜ ଜୀବନକୁ ବାଜି ଲଗାଇ ସେବା ଯୋଗାଇ ଆସୁଛନ୍ତି । ଏଭଳି ସ୍ଥିତିରେ ସରକାର ସେମାନଙ୍କୁ ସହାୟତା ଯୋଗାଇବା କଥା । ମାତ୍ର ସରକାରୀସ୍ତରରେ କିଛି ବି ପଦକ୍ଷେପ ନିଆଯାଉନାହିଁ । ଏହାର ପ୍ରତିବାଦରେ ସଂଘର ଶତାଧିକ ଡ୍ରାଇଭର କାମ ବନ୍ଦ ଘୋଷଣା କରିଥିଲେ । ଫଳରେ ବଲାଙ୍ଗୀରରୁ ଚାଉଳ ନେଇକରି ଯିବାକୁ ଥିବା ମାଲବାହୀ ଟ୍ରେନ୍ ରେକ୍ରେ ଚାଉଳ ଲୋଡିଂ ହୋଇପାରି ନ ଥିଲା । ଏଥିଯୋଗୁ ୫୮ ବଗି ବିଶିଷ୍ଟ ଏହି ମାଲବାହୀ ଟ୍ରେନ୍ ବଲାଙ୍ଗୀର ରେଳଷ୍ଟେଶନ୍ରେ ଅଟକି ରହିଥିଲା । ଟ୍ରକ୍ ଡ୍ରାଇଭରମାନଙ୍କୁ ସରକାରୀ ସହାୟତା ଦାବି କରି ସଂଘ ସଦସ୍ୟମାନେ ଜିଲାପାଳ କାର୍ଯ୍ୟାଳୟକୁ ଯାଇ ଦାବିପତ୍ର ଦେଇଛନ୍ତି। ସରକାର ସମସ୍ତ ଟ୍ରକ୍ ଡ୍ରାଇଭରଙ୍କୁ ସହାୟତା ଯୋଗାଇଲେ ସେମାନଙ୍କ ପରିବାର ଲୋକେ ଉପକୃତ ହେବେ ବୋଲି ଜଣାଇଛନ୍ତି ।
