ବାରିପଦା ଅଫିସ,୧ା୫- ବାରିପଦାସ୍ଥିତ ଶ୍ରୀ ଶ୍ରୀ ହରିବଳଦେବଜୀଉ ମହାପ୍ରଭୁ ବିଜେ ମନ୍ଦିରର ସେବାୟତମାନଙ୍କୁ ଆର୍ଥିକ ସହାୟତା ପ୍ରଦାନ ନିମନ୍ତେ ଜିଲାପାଳଙ୍କଠାରେ ଦାବି କରାଯାଇଛି। ସେବାୟତମାନେ ଗୁରୁବାର ଏ ନେଇ ବାରିପଦା ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରିଥିଲେ। ସେମାନେ ଦାବି କରିଛନ୍ତିି ଯେ, ମହାମାରୀ କରୋନା ଯୋଗୁଁ ମନ୍ଦିର ବନ୍ଦ ହୋଇଥିବା ବେଳେ ଭକ୍ତଙ୍କ ଆଗମନ ମଧ୍ୟ ବନ୍ଦ ହୋଇ ଯାଇଛି। ଯାହା ଫଳରେ ଭକ୍ତଙ୍କ ଦକ୍ଷିଣାରେ ଚଳୁଥିବା ସେବାୟତମାନଙ୍କ ପରିବାର ପ୍ରତିପୋଷଣ କରିବା ବର୍ତ୍ତମାନ କଷ୍ଟକର ହୋଇପଡିଛି। ପୂଜକ, ସୁପକାର, ଟହଲିଆ ଏବଂ କୋଠିଚାକର ସେବକବୃନ୍ଦ ବର୍ତ୍ତମାନ ହଇରାଣ ହେଉଛନ୍ତି। ଏ ନେଇ ସେବାୟତମାନେ ପୂର୍ବରୁ ଉପଜିଲାପାଳଙ୍କ ନିକଟରେ ଦାବି ଜଣାଇଥିଲେ ମଧ୍ୟ କୌଣସି ସମସ୍ୟାର ସମାଧାନ ହୋଇ ପାରିନାହିଁ। ପୁରୀ ଶ୍ରୀମନ୍ଦିରର ପ୍ରଶାସକ ସେବାୟତମାନଙ୍କୁ କରୋନା ମହାମାରୀ ପାଇଁ ଜଣଙ୍କ ପିଛା ୫ ହଜାର ଟଙ୍କା ଲେଖାଏ ସହାୟତା ରାଶି ପ୍ରଦାନ କରିଥିବା ବେଳେ ବାରିପଦା ଦେବୋତ୍ତର ବିଭାଗ ଏ ଦିଗରେ କିଛି ବି ପଦକ୍ଷେପ ନେଇ ନାହାନ୍ତିି। ଜିଲାପାଳ ଏଥିପ୍ରତି ଦୃଷ୍ଟି ଦେବାକୁ ସେବାୟତମାନେ ଦାବି କରିଛନ୍ତି। ପୂଜକ ଅରୁଣ କୁମାର ମିଶ୍ରଙ୍କ ସମେତ ଏକାଧିକ ସେବକ ଏହି ଦାବି ଉପସ୍ଥାପନ କରିଛନ୍ତି।
