ନୂଆଦିଲ୍ଲୀ,୨୪-୭-ଆଇଟି କ୍ଷେତ୍ରରେ ଦେଶ ଯେତେ ଆଗେଇ ଚାଲିଛି ସେହି ଅନୁପାତରେ ସାଇବର ଅପରାଧ ମଧ୍ୟ ବଢ଼ି ଚାଲିଛି। ୨୦୧୮ ଜୁଲାଇରୁ ୨୦୧୯ ଏପ୍ରିଲ ମଧ୍ୟରେ ଦେଶରେ କମ୍ପାନୀଙ୍କୁ ହାରାହାରି ୧୨.୮୦ କୋଟି ଟଙ୍କା କ୍ଷତି ସହିବାକୁ ପଡିିଛି। ପ୍ରଯୁକ୍ତି କ୍ଷେତ୍ରର ପ୍ରମୁଖ କମ୍ପାନୀ ଆଇବିଏମ୍ ଦ୍ୱାରା ଜାରି ଏକ ରିପୋର୍ଟରେ ଏହା କୁହାଯାଇଛି। ରିପୋର୍ଟ ଅନୁସାରେ ବିଶ୍ୱ ସ୍ତରରେ କ୍ଷତିର ପରିମାଣ ପ୍ରାୟ ୨୭.୦୩ କୋଟି ଟଙ୍କା। ଉକ୍ତ ଅବଧିରେ ହ୍ୟାକିଂ ଯୋଗୁ ହାରାହାରି ୨୫,୫୭୫ ରେକର୍ଡ ପ୍ରଭାବିତ ହୋଇଛି। ରିପୋର୍ଟରେ କୁହାଯାଇଛି ଯେ, ଡାଟା ଚୋରି ଅଥବା ସୂଚନା ହ୍ୟାକିଂ ଯୋଗୁ ଭାରତରେ ପ୍ରତି ବ୍ୟକ୍ତି ପ୍ରତି କ୍ଷତି ୫୦୧୯ ଟଙ୍କା ଥିବା ବେଳେ ବିଶ୍ୱରେ ଏହା ୧୫୦ ଡଲାର ରହିଛି। ଭାରତରେ ଏହି ଘଟଣା ଯୋଗୁ ହାରାହାରି ୩୫,୬୩୬ ରେକର୍ଡ ପ୍ରଭାବିତ ହୋଇଥାଏ। ଆଇବିଏମ୍ ସିକ୍ୟୁରିଟିଜ ଦ୍ୱାରା ପ୍ରାୟୋଜିତ ଏହି ରିପୋର୍ଟକୁ ପୋନେମ୍ୟାନ ଇନ୍ଷ୍ଟିଚ୍ୟୁଟ୍ ପ୍ରସ୍ତୁତ କରିଛି। ସିକ୍ୟୁରିଟି ସଫ୍ଟଓ୍ବେର ଲିଡର ବୈଦ୍ୟନାଥନ ଆୟାର କହିଛନ୍ତି ଯେ, ଭାରତରେ ଦ୍ରୁତଗତିରେ ସାଇବର ଅପରାଧ ବଦଳୁଛି। ଏହା ଏବେ ଅତ୍ୟନ୍ତ ସଂଗଠିତ ଭାବେ ତାଳମେଳ ରଖି କରାଯାଉଛି।