ଉମରକୋଟ, ୫।୩ସ୍ବ.ପ୍ର.): ପେନିୟର ବାୟ ବ୍ୟାଙ୍କ ନାମରେ ଲୋକଙ୍କୁ ଠକୁଥିବା ଜଣେ ସାଇବର ଠକଙ୍କୁ ଉମରକୋଟ ପୋଲିସ ଅଟକ ରଖିଛି। ସେ ଜଣେ ନାବାଳକ। ତାଙ୍କ ଘର ଗଞ୍ଜାମ ଜିଲା ବାଲିପଦର ଥାନା ଅଞ୍ଚଳରେ ବୋଲି ଉମରକୋଟ ପୋଲିସ କହିଛି। ନାବାଳକଙ୍କୁ ଭବାନୀପାଟଣା ସ୍ଥିତ ଜୁଭେନାଇଲ କୋର୍ଟରେ ହାଜର କରାଯାଇଥିଲା। ବର୍ତ୍ତମାନ ତାଙ୍କୁ ଚାଇଲ୍ଡ ଅବଜର୍ଭେଶନ ହୋମ୍ରେ ରଖାଯାଇଛି ବୋଲି ଉମରକୋଟ ପୋଲିସ ସୂଚନା ଦେଇଛି। ସୂଚନାନୁଯାୟୀ, ଗତ ୨୧ରେ ନବରଙ୍ଗପୁର ଜିଲା ଉମରକୋଟ ବ୍ଲକ ଅଧୀନ ମୂର୍ତ୍ତୃମା ପଞ୍ଚାୟତ ସାନଖଡ଼କା ଗ୍ରାମର ଗୋକୁଲ ବିଶ୍ୱାସ ତାଙ୍କର ୧, ୦୫, ୦୩୨ଟଙ୍କା ଠକେଇ ହୋଇଥିବା ନେଇ ଉମରକୋଟ ଥାନାର ଦ୍ବାରସ୍ଥ ହୋଇଥିଲେ। ଏସ୍ପି ଏସ୍. ସୁଶ୍ରୀ ସାଇବର ପୋଲିସ ଓ ଉମରକୋଟ ପୋଲିସକୁ ଘଟଣାର ତଦନ୍ତ ନିର୍ଦ୍ଦେଶ ଦେଇଥିଲେ। ଜିଲା ସାଇବର ପୋଲିସ କର୍ମଚାରୀ, ଉମରକୋଟ ଥାନାଧିକାରୀ ଗୋବିନ୍ଦ ଚନ୍ଦ୍ର ବୁରୁଦା, ସବ୍ଇନ୍ସିପେକ୍ଟର ସନ୍ତୋଷ ମାଝି ଓ ଅନ୍ୟ କେତେଜଣ ପୋଲିସ ଅଧିକାରୀଙ୍କୁ ନେଇ ଗଠିତ ଟିମ୍ ଘଟଣାର ତଦନ୍ତ ଆରମ୍ଭ କରିଥିଲେ। ବିଭିନ୍ନ ଦିଗକୁ ନେଇ ତଦନ୍ତ କରିବା ପରେ ଘଟଣାରେ ନାବାଳକଙ୍କ ସମ୍ପୃକ୍ତି ଥିବା ଜାଣିବାକୁ ପାଇ ତଦନ୍ତକାରୀ ଟିମ୍ ସେଠାକୁ ଯାଇଥିଲେ। ନାବାଳକଙ୍କ ଘରୁ ୧ଲକ୍ଷ ୫ହଜାର ନଗଦ ଟଙ୍କା, ତିନୋଟି ଏଟିଏମ୍ କାର୍ଡ, ପେନ୍ଡ୍ରାଇଭ, ଲାପ୍ଟପ୍, ପେଟିଏମ୍ ସ୍କାନର, କ୍ରିପ୍ଟ ହ୍ୟାକିଂ ବହି, ମୋବାଇଲ ସହ କିଛି ଗୁରୁତ୍ୱପୂର୍ଣ୍ଣ ଫାଇଲ ଜବତ କରାଯାଇଛି। ସେଠାରୁ ନାବାଳକଙ୍କୁ ଆଣି ଭବାନୀପାଟଣାସ୍ଥିତ ଜୁଭେନାଇଲ କୋର୍ଟରେ ହାଜର କରାଯିବାପରେ ତାଙ୍କୁ ଚାଇଲ୍ଡ ଅବଜର୍ଭେଶନ ହୋମରେ ରଖାଯାଇଛି। ନାବାଳକ ଜଣକ ସ୍କାନିନ୍ଫୋଗା ନାମରେ ଏକ ଅନୁଷ୍ଠାନ କରି ଲୋକଙ୍କୁ କିପରି ଠକିବେ ସେ ନେଇ ୪୦ରୁ ୫୦ ପିଲାଙ୍କୁ ଅନ୍ଲାଇନ ତାଲିମ ଦେଉଥିଲେ ବୋଲି ପୋଲିସ କହିଛି। ଏହି ଘଟଣାରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ତାହା ତଦନ୍ତ ପରେ ଜଣାପଡ଼ିବ ବୋଲି ଉମରକୋଟ ଏସ୍ଡିପିଓ ଶୁଭେନ୍ଦୁ ଶବର କହିଛନ୍ତି। ଉମରକୋଟ ଥାନାରେ କେସ୍ ନଂ.୫୩/୨୩ରେ ମାମଲା ରୁଜୁ ହୋଇଛି।
