ନୂଆଦିଲ୍ଲୀ, ୧୭।୨ (ପି.ଟି.)- ଚର୍ଚ୍ଚାରେ ରହିଥିବା କର୍ନାଟକର ପାରମ୍ପରିକ କମ୍ବାଲ ରେସ୍ର ଶ୍ରୀନିବାସ ଗୌଡ଼ ବେଙ୍ଗାଲୁରୁସ୍ଥିତ ସାଇ ସେଣ୍ଟରରେ ଟ୍ରାଏଲ୍ସ ଦେବାକୁ ମନା କରିଦେଇଛନ୍ତି। ନିକଟରେ କର୍ନାଟକରେ ଅନୁଷ୍ଠିତ ପାରମ୍ପରିକ ମଇଁଷି ଦୌଡ଼ରେ ଏହାର ଜକି ରହିଥିବା ଶ୍ରୀନିବାସ ମାତ୍ର ୯.୫୫ ସେକେଣ୍ଡରେ ୧୦୦ ମିଟର ଦୂରତା ଅତିକ୍ରମ କରିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାପରେ ତାଙ୍କୁ ବିଶ୍ୱର ଦ୍ରୁତତମ ଧାବକ ତଥା ସ୍ପ୍ରିଣ୍ଟ ଲିଜେଣ୍ଡ ଉସେନ ବୋଲ୍ଟଙ୍କ ସହ ତୁଳନା କରାଯାଇଥିଲା। ଏହାପରେ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ଶ୍ରୀନିବସାଙ୍କୁ ନେଇ ଏକ ଟ୍ରାଏଲ୍ସ ଆୟୋଜନ କରିବାକୁ ଭାରତୀୟ କ୍ରୀଡ଼ା ପ୍ରାଧିକରଣ (ସାଇ)ର ଟପ୍ କୋଚ୍ଙ୍କୁ ନିର୍ଦ୍ଦେଶ ଦେଇଥିଲେ। ତେବେ ଗୌଡ଼ା ଏହି ଟ୍ରାଏଲ୍ସରେ ଭାଗନେବାକୁ ମନା କରିଦେଇଥିବା ସାଇର ଜଣେ ଅଧିକାରୀ କହିଛନ୍ତି। ‘ଗୌଡ଼ା ସୋମବାର ବେଙ୍ଗାଲୁରୁରେ ପହଞ୍ଚତ୍ ମୁଖ୍ୟମନ୍ତ୍ରୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ବେଙ୍ଗାଲୁରୁ ସାଇର ଏକ ଟିମ୍ ମୁଖ୍ୟମନ୍ତ୍ରୀଙ୍କ ଅଫିସରେ ରହିଛି ଏବଂ ସାଇ ସେଣ୍ଟରକୁ ନେବାପାଇଁ ତାଙ୍କ ସହ କଥା ହେବାକୁ ଅପେକ୍ଷା କରିଛି। କିନ୍ତୁ ସେ ଏଥିପ୍ରତି ଆଗ୍ରହ ନାହାନ୍ତି ଏବଂ ଆମେ ଜାଣିବାକୁ ପାଇଲୁ କି ସେ ଆଘାତପ୍ରାପ୍ତ ରହିଛନ୍ତି’ ବୋଲି ସାଇର ଜଣେ ଅଧିକାରୀ ପିଟିଆଇକୁ କହିଛନ୍ତି। ପ୍ରକାଶଯୋଗ୍ୟ, ନିର୍ମାଣ ଶ୍ରମିକ ଭାବେ କାର୍ଯ୍ୟ କରୁଥିବା ଗୌଡ଼ା ମାଙ୍ଗାଲୁରୁରେ ଅନୁଷ୍ଠିତ ଏହି କମ୍ବାଲ ରେସ୍ରେ ମୋଟ୍ ୧୪୫ ମିଟର ଦୂରତାକୁ ୧୩.୬୨ ସେକେଣ୍ଡରେ ଅତିକ୍ରମ କରିଥିଲେ। ଏହି ଅବସରରେ ସେ ୧୦୦ ମିଟର ଦୂରତାକୁ ଅତିକ୍ରମ କରିବା ପାଇଁ ୯.୫୫ ସେକେଣ୍ଡ ସମୟ ନେଇଥିଲେ। ଜାମାଇକାର କିମ୍ବଦନ୍ତୀ ଧାବକ ୧୦୦ ମିଟର ରେସ୍କୁ ୯.୫୮ ସେକେଣ୍ଡରେ ଅତିକ୍ରମ କରି ବିଶ୍ୱ ରେକର୍ଡର ଅଧିକାରୀ ହୋଇଛନ୍ତି।