ଢେଙ୍କାନାଳ ଅଫିସ,୨୪।୭-ଢେଙ୍କାନାଳ ଜିଲାରେ ସାପ କାମୁଡ଼ା ମୃତ୍ୟୁସଂଖ୍ୟା ଚିନ୍ତାଜନକ ହୋଇଛି। ଗତ ସାଢ଼େ ୩ବର୍ଷ ମଧ୍ୟରେ ଜିଲାରେ ସାପ କାମୁଡ଼ାରେ ୧୦୪ଜଣଙ୍କ ଜୀବନ ଗଲାଣି। ଗ୍ରାମାଞ୍ଚଳ ଏବଂ ଅପହଞ୍ଚ ଇଲାକାରେ ଏହି ସ୍ଥିତି ଅତ୍ୟନ୍ତ ଉଦ୍ବେଗଜନକ ରହିଛି। ସଚେତନତା ଅଭାବ ଏହାର ପ୍ରମୁଖ କାରଣ ବୋଲି କହିଛି ସ୍ବାସ୍ଥ୍ୟ ବିଭାଗ।
ବନ୍ୟପ୍ରାଣୀ ସଂରକ୍ଷଣ ଲାଗି କାର୍ଯ୍ୟ କରୁଥିବା ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ପ୍ରାପ୍ତ ସୂଚନା ଅନୁଯାୟୀ, ଜିଲାର ଥଣ୍ଡା ଜଳବାୟୁ ସାପବଂଶ ଲାଗି ସୁରକ୍ଷିତ ସାବ୍ୟସ୍ତ ହୋଇଆସିଛି। ସଂରକ୍ଷିତ ଜଙ୍ଗଲ ସାପଙ୍କ ପ୍ରାକୃତିକ ଆବାସସ୍ଥଳୀ ପାଲଟିଛି। ଜିଲାରେ ଏବେ ୯୩ ପ୍ରକାର ସାପ ଅଛନ୍ତି। ସେମାନଙ୍କ ମଧ୍ୟରୁ ୮ ପ୍ରଜାତି ହେଉଛି ବିଷଧର।
ଜିଲା ଜରୁରୀ ଓ ଆପତ୍କାଳୀନ ଅଧିକାରୀ ଶଶାଙ୍କ ଶେଖର ମିଶ୍ରଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ, ୨୦୧୬ରେ ଜିଲାରେ ସାପ କାମୁଡ଼ାରେ ୨୮ଜଣଙ୍କ ମୃତ୍ୟୁ ଘଟିଥିଲା। ଏହିକ୍ରମରେ ୨୦୧୭ରେ ୨୬, ୨୦୧୮ରେ ୩୧ ଏବଂ ୨୦୧୯ ଜୁଲାଇ ସୁଦ୍ଧା ୯ଜଣ ପ୍ରାଣ ହରାଇଛନ୍ତି। ମୃତଦେହ ବ୍ୟବଚ୍ଛେଦ ଏବଂ ତଦନ୍ତ ରିପୋର୍ଟ ଆଧାରରେ ମୃତକଙ୍କ ପରିବାରକୁ ୪ଲକ୍ଷ ଟଙ୍କା ଲେଖାଏ କ୍ଷତିପୂରଣ ପ୍ରଦାନ କରାଯାଉଛି। ନିକଟରେ ହୋଇଥିବା ବିପର୍ଯ୍ୟୟ ପରିଚାଳନା କମିଟି ବୈଠକରେ ଜିଲାରେ ବୃଦ୍ଧି ପାଉଥିବା ସାପକାମୁଡ଼ା ମୃତ୍ୟୁସଂଖ୍ୟାକୁ ନେଇ ଉଦ୍ବେଗ ପ୍ରକାଶ ପାଇଥିଲା। ସ୍ବାସ୍ଥ୍ୟକେନ୍ଦ୍ରଗୁଡ଼ିକରେ ପର୍ଯ୍ୟାପ୍ତ ପ୍ରତିଷେଧକ ମହଜୁଦ୍ ରଖିବାକୁ ନିଷ୍ପତ୍ତି ନିଆଯାଇଥିଲା। ଜନସାଧାରଣ ସଚେତନ ହେଲେ ମୃତ୍ୟୁହାରକୁ ଅନେକାଂଶରେ କମାଇ ଦିଆଯାଇପାରିବ ବୋଲି ଜିଲା ଜରୁରୀ ଓ ଆପତ୍କାଳୀନ ଅଧିକାରୀ ପରାମର୍ଶ ଦେଇଛନ୍ତି।
ଏ ନେଇ ସିଡିଏମ୍ଓ ଡା. ନିରଞ୍ଜନ ମିଶ୍ର କୁହନ୍ତି, ସଚେତନତା ଅଭାବ, ଚିକିତ୍ସାରେ ବିଳମ୍ବ ଯୋଗୁ ସାପକାମୁଡ଼ା ରୋଗୀ ମୃତ୍ୟୁମୁଖରେ ପଡୁଛନ୍ତି। ସାପ କାମୁଡ଼ିଲେ ତୁରନ୍ତ ରୋଗୀର ମୃତ୍ୟୁ ହୁଏନାହିଁ। ପରିବାର ସଦସ୍ୟ ଏବଂ ରୋଗୀ ଧୈର୍ଯ୍ୟହରା ନ ହୋଇ ତୁରନ୍ତ ଡାକ୍ତରଖାନାରେ ପହଞ୍ଚତ୍ବା ଆବଶ୍ୟକ। ଠିକ୍ ସମୟରେ ଚିକିତ୍ସା କରାଗଲେ ରୋଗୀକୁ ବଞ୍ଚାଇ ଦିଆଯାଇପାରିବ। ହେଲେ ଏଥିପ୍ରତି ଲୋକେ ସଚେତନ ହେଉନାହାନ୍ତି। ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଗୁଣିଗାରେଡ଼ି, ଝଡ଼ାଫୁଙ୍କା ଚିକିତ୍ସା କରାଉଛନ୍ତି। ସେଠାରୁ ସୁଫଳ ନ ମିଳିଲେ ଡାକ୍ତରଖାନା ଆଣୁଛନ୍ତି। ସେତେବେଳକୁ ବିଳମ୍ବ ହୋଇଯାଉଛି। ରୋଗୀର ମୃତ୍ୟୁ ଘଟୁଛି। ଜିଲା ମୁଖ୍ୟ ସ୍ବାସ୍ଥ୍ୟକେନ୍ଦ୍ର, ଉପଖଣ୍ଡ ଚିକିତ୍ସାଳୟ ସମେତ ସମସ୍ତ ଚିକିତ୍ସାଳୟରେ ସାପ କାମୁଡ଼ା ଇଞ୍ଜେକ୍ସନ ଓ ଔଷଧ ମହଜୁଦ ଅଛି। ଏବେ ସମସ୍ତ ଔଷଧ ଅନ୍ଲାଇନ୍ରେ ଯୋଗାଣ ହେଉଛି ବୋଲି ସିଡିଏମ୍ଓ କହିଛନ୍ତି।