ବନ୍ତଳା, ୨୧ା୭(ଡି.ଏନ.ଏ.) – ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ମହାନଦୀ ଗଣ୍ଡରେ ଶୁକ୍ରବାର ଅପରାହ୍ନରେ ୫ଟି ଘଡିଆଳ କୁମ୍ଭୀର ଛଡାଯାଇଛି। ଏହି କୁମ୍ଭୀରଗୁଡିକୁ ନନ୍ଦନକାନନରୁ ସେଠାକୁ ନିଆଯାଇଛି। ଘଡ଼ିଆଳଙ୍କ ଗତିବିଧି ଜାଣିବା ପାଇଁ ସ୍ବତନ୍ତ୍ର ଭାବରେ ୫ଟି ଟ୍ରାନ୍ସମିଟର ଲଗାଯାଇଛି। ପ୍ରଧାନ ମୁଖ୍ୟ ବନ ସଂରକ୍ଷକ ବନ୍ୟପ୍ରାଣୀ(ପିସିସିଏଫ) ଅଜୟ ମହାପାତ୍ର, ଆଞ୍ଚଳିକ ମୁଖ୍ୟ ବନ ସଂରକ୍ଷକ (ଆରସିସିଏଫ) ତଥା ସାତକୋଶିଆ କ୍ଷେତ୍ର ନିର୍ଦ୍ଦେଶକ ପ୍ରଦୀପ ରାଜ କରାଟେ, ମହାନଦୀ ବନ୍ୟପ୍ରାଣୀ ଡିଏଫଓ ଅଂଶୁପ୍ରଜ୍ଞା ଦାସ, ସାତକୋଶିଆ ବନ୍ୟପ୍ରାଣୀ ଡିଏଫଓ ପି ରାମସ୍ବାମୀ, ଏସିଏଫ ଶୁଭେନ୍ଦୁ ବେହେରା, ସରୋଜ କୁମାର ପଣ୍ଡା, ବିଜୟ ମହାନ୍ତି, ପି. କେ ସ୍ବାଇଁ, ସାତକୋଶିଆ ପ୍ରାଣୀ ଡାକ୍ତର କିଶୋର କୁମାର ସାହୁଙ୍କ ସହିତ ନନ୍ଦନକାନନରୁ ଯାଇଥିବା ସ୍ବତନ୍ତ୍ର ୫ ଜଣିଆ ଟିମ ଉପସ୍ଥିତିରେ ସୁରକ୍ଷିତ ଭାବେ କୁମ୍ଭୀରଗୁଡିକୁ ମହାନଦୀ ବନ୍ୟପ୍ରାଣୀ ବନଖଣ୍ଡ ଅଞ୍ଚଳରେ ଥିବା କୁସଙ୍ଗ ରେଞ୍ଜ ସୁନା ଖଣିଆ ଅଞ୍ଚଳରେ ଛଡାଯାଇଥିଲା। ୪ ବର୍ଷିଆ ଏହି ୫ଟି ଘଡିଆଳ ମଧ୍ୟରେ ଗୋଟିଏ ଅଣ୍ଡିରା ଓ ୪ ଟି ମାଈ ଘଡ଼ିଆଳ ରହିଛନ୍ତି। ସମସ୍ତଙ୍କ ଲମ୍ବ ୫ ଫୁଟ ମଧ୍ୟରେ ରହିଛି। ସ୍ବତନ୍ତ୍ର ଗାଡ଼ିରେ ୫ଟି ବାକ୍ସରେ କୁମ୍ଭୀରଗୁଡିକୁ ନୟାଗଡ଼ ଦେଇ କୁସଙ୍ଗକୁ ଅଣାଯାଇଥିଲା। ୫ ଜଣିଆ ଟିମରେ ନନ୍ଦନକାନନ ପ୍ରାଣୀ ଡାକ୍ତର, ଦୁଇଜଣ ସହକାରୀ ଡାକ୍ତର, ଜଣେ ସ୍ପେଶିଆଲିଷ୍ଟ ଓ ଜଣେ ଆନିମଲ କେୟାର ସାମିଲ ଥିଲେ।
ସାତକୋଶିଆ ଗଣ୍ଡରେ ମଗର ସଂଖ୍ୟା ବୃଦ୍ଧି ପାଇଥିବାବେଳେ ଘଡ଼ିଆଳ ବଂଶ କମିବାରେ ଲାଗିଛି। ୨୦୧୯ ଜାନୁୟାରୀରେ କୁମ୍ଭୀର ଗଣନା ସମୟରେ ଗଣ୍ଡରେ ୮ଟି ଘଡ଼ିଆଳ ଥିବା ଜଣାପଡିଥିଲା। ଏବେ ଏହି ସଂଖ୍ୟା ୧୩କୁ ବୃଦ୍ଧି ପାଇଛି। ଏଥି ସହିତ ଗଣ୍ଡରେ ଛଡା ଯାଉଥିବା ଘଡ଼ିଆଳର ପତ୍ତା ମିଳୁ ନ ଥିବାରୁ ଏଗୁଡିକର ଗତିବିଧି ଜାଣିବା ପାଇଁ ସ୍ବତନ୍ତ୍ର ଭାବେ ରାଜସ୍ଥାନର ଏକ ସଂସ୍ଥାଠାରୁ ୫ଟି ଟ୍ରାନ୍ସମିଟର ଅଣାଯାଇ ଲଗାଯାଇଛି। ନନ୍ଦନକାନନରୁ ଏକ ବର୍ଷ ମଧ୍ୟରେ ୩୫ ଟି ଘଡ଼ିଆଳ ଆଣାଯାଇ ଛଡ଼ାଯିବ ବୋଲି ସୂଚନା ମିଳିଛି। ସାତକୋଶିଆ ପ୍ରାଣୀ ବିଶେଷଜ୍ଞ ରୁଦ୍ର ନାରାୟଣ ପ୍ରଧାନଙ୍କ ସମେତ କୁସଙ୍ଗର ଡେପୁଟି ରେଞ୍ଜର ପ୍ରଦୀପ ଭୂତିଆ, ଟିକରପଡା ରେଞ୍ଜର ଜୟନ୍ତ ପଟ୍ଟନାୟକ, ବାଣୀଗୋଛା ରେଞ୍ଜର ସଂସାର ବର୍ଗିଆ, କୁଆଁରିଆ ରେଞ୍ଜର ମାଧବ ନାଏକ, ଛାମୁଣ୍ଡିଆ ରେଞ୍ଜର ବେଣୁଧର ବେହେରା, ଜିଲିଣ୍ଡା ରେଞ୍ଜେର ହରିଶ ପ୍ରଧାନ ପ୍ରମୁଖ ଉପସ୍ଥିତ ଥିଲେ।