ଜାମଟିକ୍ରା, ୧୨।୨ (ଡି.ଏନ୍.ଏ.)- ଦେଶ ସୁଆଧୀନ ହେବାର ୭୦ ବଛରନୁ ଅଧ୍କା ବିତିଗଲାନ। ହେଲେ ଆଏଜ୍ ବି ଆମର ରାଏଜେ ଏନ୍ତା ଗଁାଗଁଡ଼ା ଅଛେ ଯେନ୍କେ ଫିଦିନିଅଁା ରାସ୍ତା ଖଁଡ଼େ ନଁାଇଁନ। ଗଁାବାସୀ ବାରବାର ପଁଚେତ୍ନୁ ବ୍ଲକ ତକ୍ ଗୁହାରି କରି ଥକିଗଲେ ବି କେହି ସମସିଆର ସମାଧାନ ଦିଗେ ଧିଆନ୍ ନାଇଁ ଦେବାର। ଗଁାରେ କାହାରି ଦିହିପା ଖରାପ ହେଲେ, ଘରପୁଡ଼ି ହେଲେ ଲୋକ୍ ଭଗବାନ ଭରସାରେ ରହୁଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ରେ।
ସୂଚନା ଅନ୍ସାରେ ବୁଗବୁଗା ପଁଚେତ୍ ଜାମଟିକ୍ରାନୁ ସହଁରାପଡ଼ାକେ ୧ କି.ମି. ମାଟି ରାସ୍ତା ରହିଛେ। ଖରାଦିନକେ ଛାଡ଼ିଦେଲେ ବାକି ବଛରକୁତା ଇ ରାସ୍ତାଟା କାଦୋ ସରସର ହେଇ ରହୁଛେ। ଏନ୍ତାଥି ପଡ଼ାର ଲୋକ୍, ଛାତ୍ରୀଛାତ୍ର ଯିବାର ଆଏବାରେ ବଡ଼ା ହଇରାନ ହରକତ ହେଉଛନ୍। ଏନ୍ତା କି ସମିଆ ଅସମିଆରେ ଜରୁରି ସେବା ପାଏବାରୁ ପଡ଼ାବାସୀ ବଁଚିତ୍ ହେଉଥିବାର ଅଭିଯୋଗ କରିଛନ୍। ସହଁରାପଡ଼ାର ବୁରୁଧ୍ ଜେଠୁ ଝାଙ୍କର(୮୦) କହିଛନ୍ ଯେ, ଭୋଟ ବେଲେ ପଡ଼ାକେ ନେତାମନ୍ତ୍ରୀ ମାଲମାଲ ଆସୁଛନ୍। ହାତୀ ଦେମୁ, ଘୁଡ଼ା ଦେମୁ, ବଁଧ୍କଟା, ରାସ୍ତା ମରାମତି କରିଦେମୁ ବଲି କେତେ କଥା କହୁଛନ୍। ହେଲେ ଭୋଟ ସରିଗଲେ ୫ ବଛର ତକ୍ ସେମାନକର ଦେଖାଦରଶନ ନାଇଁ ମିଲବାର। ପଡ଼ାବାସୀ ବି କଂକ୍ରିଟ ରାସ୍ତାଟେ ଲାଗି ବ୍ଲକନୁ ଜିଲାପାଳକଁର ଅଫିସ୍ ତକ ଗୁହାରି କରି ନିରାଶ ହେଇଛନ୍। ଆଏଜ୍କେ ୪ ମାସ ତଲେ ଗଁାର କେତେ ପିଲା ରାସ୍ତାର ଫଟୋକେ ରାଏଜ୍ ସରକାରକୁଁ ଟୁଇଟ କରିଥିଲେ। ଜିଲାପାଳ ବିଡିଓକୁଁ ଘଟନାର ତଦଁତ୍ କରବାକେ କହେବେ ବଲି ଟୁଇଟ କରିଥିଲେ। ଇ ଘଟନାକେ ଆଏଜ୍ ୪ ମାସ ବିତିଯାଇଥିଲେ ବି ପଡ଼ାକେ ଝନେ ବି ସରକାରୀ ଅଧ୍କାରୀ ପୁହୁଁଚି ନାଇଁପାରି।