ସାଥୀଙ୍କଠାରୁ ଦୂରେଇ ରହିବା ବାସ୍ତବରେ କଷ୍ଟଦାୟକ। କିନ୍ତୁ କିଛି ଲୋକ କୁହନ୍ତି, ଦୂରତା ଦୁଇଟି ହୃଦୟକୁ ନିକଟତର କରିଥାଏ। ଆଉ କିଛି ଭାବନ୍ତି, ଯିଏ ଆଖିରୁ ଦୂରରେ, ସେ ମଧ୍ୟ ହୃଦୟଠାରୁ ଦୂରରେ। ମାତ୍ର ଏମିତି ଭ୍ରାନ୍ତ ଧାରଣା ଦୂର କରିବା ପାଇଁ ଏମିତି କିଛି କରନ୍ତୁ ଯେପରି କେବେ ଅନୁଭବ କରିବେ ନାହିଁ ଯେ, ସାଥୀଙ୍କଠାରୁ ଆପଣ ଦୂରରେ ବୋଲି।
ଶୁଭ ସକାଳ ଏବଂ ଶୁଭ ରାତ୍ରିର ଶୁଭେଚ୍ଛା ଦେବାକୁ ଭୁଲନ୍ତୁ ନାହିଁ :
ଏହି ଛୋଟ ଛୋଟ କଥା ବା ଶୁଭେଚ୍ଛା ଅନ୍ୟ ଜଣଙ୍କ ଭଲ ପାଇବାକୁ ଦୂରେଇ ଦେଇ ପାରେନା। ତେଣୁ ଏକ ଛୋଟ ବାର୍ତ୍ତା ମଧ୍ୟ ପ୍ରେମ ସମ୍ପର୍କକୁ ସୁଦୃଢ଼ କରି ରଖିବାରେ ସହାୟକ ହୋଇଥାଏ। ଆଜିକାଲି ଡିଜିଟାଲ ଯୁଗରେ କିଛି ଅସମ୍ଭବ ନୁହେଁ। ତେଣୁ ମଝିରେ ମଝିରେ ପରସ୍ପରକୁ ଫଟୋ, ଅଡିଓ କ୍ଲିପ୍ ଏବଂ ଭିଡିଓ ପଠାଇ ଯୋଗାଯୋଗ ଜାରି ରଖନ୍ତୁ। ଏହା ଦ୍ୱାରା ସାଥୀଙ୍କ ଭଲପାଇବା ବଢ଼ିଯିବ।
ଯେ କୌଣସି ବିଷୟରେ ପରସ୍ପର ଖୋଲାଖୋଲି କଥା ହୁଅନ୍ତୁ:
ସାଥୀ ଦୂରରେ ରହୁଥିଲେ ପ୍ରତିଟି କଥା ତାଙ୍କ ସହ ଶେୟାର କରିବାକୁ ଆଦୌ ଭୁଲନ୍ତୁ ନାହିଁ। ଯାହା ବି କରୁଛନ୍ତି ମନ ଖୋଲି କଥା ହୁଅନ୍ତୁ। ଦୁହେଁ ଦୁହିଁଙ୍କୁ ସମ୍ମାନ କରନ୍ତୁ। ସାଥୀଙ୍କୁ କୌଣସି କଥା ଲୁଚାନ୍ତୁ ନାହିଁ। ଏପରି କରିବା ଦ୍ୱାରା ସାଥୀ ଯେତେ ଦୂରରେ ଥିଲେ ପାଖରେ ଥିବା ପରି ଅନୁଭବ ହୁଏ।
ପରସ୍ପର ଦୂରତାକୁ ବିଚାର କରନ୍ତୁ:
ଦୂରତା ଦୁହିଁଙ୍କୁ ଅଲଗା କରୁଛି ବୋଲି ଭାବିବା ପରିବର୍ତ୍ତେ ଏହାକୁ ଏକ ଶିକ୍ଷଣ ପର୍ଯ୍ୟାୟ ଭାବରେ ଗ୍ରହଣ କରନ୍ତୁ। ଅଲଗା ରହିବା, ପରସ୍ପରକୁ ଭଲ ପାଇବା ଏହି ଅଭିଜ୍ଞତା ସହିତ ବନ୍ଧନ ଅତୁଟ ରହିଥାଏ ବୋଲି ମନକୁ ଆଣନ୍ତୁ। ସବୁଠୁ ବଡ଼ କଥା ହେଲା ଉତ୍ତମ ବୁଝାମଣା। ପରସ୍ପର ମଧ୍ୟରେ ସର୍ବଦା ବୁଝାମଣା ଠିକ୍ ରଖନ୍ତୁ। ଏପରି କଲେ ସାଥୀଙ୍କ ଦୂରତା କେବେ କଷ୍ଟ ଦେବନି ବରଂ ପ୍ରେମସମ୍ପର୍କ ଆହୁରି ନିବିଡ଼ ହେବ।