ନୂଆଦିଲ୍ଲୀ,୧୦।୧୧: ନକଲି ବାବା ଏବଂ ଆଧ୍ୟାତ୍ମିକ ଗୁରୁଙ୍କଠାରୁ ସାବଧାନ ରହିବାକୁ ଚେତାବନୀ ଜାରି କରିଛି ଭାରତୀୟ ସେନା। ପାକିସ୍ତାନ ଗୋଇନ୍ଦା ଅପରେଟର(ପିଆଇଓ)ମାନେ ସାଧୁ-ମହାତ୍ମା ବେଶରେ ବୁଲୁଛନ୍ତି, ବିଭିନ୍ନ ପ୍ରକାର ଲୋଭନୀୟ କଥା କହି ସେମାନେ ସେନା କର୍ମଚାରୀଙ୍କଠାରୁ ଗୋପନୀୟ ତଥ୍ୟ ହାସଲ କରିବାକୁ ଚେଷ୍ଟା କରିପାରନ୍ତି। ଆଇଏସଆଇର ଏହା ନୂଆ ଫର୍ମୁଲା, ଏହାଠାରୁ ଯଥାସମ୍ଭବ ଦୂରେଇ ରହିବା ଆବଶ୍ୟକ ବୋଲି ଭାରତୀୟ ସେନା ପକ୍ଷରୁ କୁହାଯାଇଛି। ପାକିସ୍ତାନୀ ଏଜେଣ୍ଟମାନେ ସୋସିଆଲ ମିଡିଆ ପ୍ଲାଟଫର୍ମ ଯଥା ହ୍ବାଟ୍ସଆପ୍ ଏବଂ ସ୍କାଇପେ ଜରିଆରେ ଭାରତୀୟ ସୈନିକଙ୍କୁ ନିଜ ଜାଲରେ ଫସାଇବାକୁ ଚେଷ୍ଟା କରୁଛନ୍ତି। ଏପରିକି ମହିଳାଙ୍କ ନାଁରେ ପ୍ରୋଫାଇଲ୍ ପ୍ରସ୍ତୁତ କରି ଚାଟିଂ କରୁଛନ୍ତି। ତେଣୁ ସୈନିକମାନେ ସତର୍କ ରହିବା ଆବଶ୍ୟକ ବୋଲି ସେନା ପକ୍ଷରୁ ସୂଚନା ଦିଆଯାଇଛି।
