ନୂଆଦିଲ୍ଲୀ,୨୨।୪: କରୋନା ସଂକ୍ରମଣରୁ ଦୂରେଇ ରହିବା ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ମାର୍ଗଦର୍ଶିକା ଜାରି କରାଯାଇଛି। ଏଥିରେ ସାବୁନରେ ହାତ ଧୋଇବା ଅବା ପାଣିର ଅଭାବରେ ସାନିଟାଇଜରର ବ୍ୟବହାର କରିବା ଉପରେ ଗୁରୁତ୍ୱାରୋପ କରାଯାଇଛି। ଭାରତର କେତେକ ଅଞ୍ଚଳରେ କୀଟାଣୁନାଶକ ସ୍ପ୍ରେ କରୁଥିବା ଟନେଲ୍ ମଧ୍ୟ ନିର୍ମାଣ କରାଯାଇଛି। ଏହା ମଧ୍ୟ ଦେଇ ଲୋକେ ମାତ୍ର ୩ରୁ ୫ ସେକେଣ୍ଡ ମଧ୍ୟରେ ସାନିଟାଇଜ୍ ହୋଇପାରୁଛନ୍ତି। ତେବେ ସାନିଟାଇଜର ଅବା କୀଟାଣୁନାଶକ ସ୍ପ୍ରେର ବ୍ୟବହାର ଦ୍ୱାରା ତ୍ୱଚା ଉପରେ ଖରାପ ପ୍ରଭାବ ପଡ଼ିଥାଏ ବୋଲି ଭାରତୀୟ ଆଲକାଲି ମାନ୍ୟୁଫାକରର୍ସ ସଂଘ (ଏଏମ୍ଏଆଇ) ପକ୍ଷରୁ ସୂଚନା ଦିଆଯାଇଛି। ସାନିଟାଇଜର ଏବଂ କୀଟାଣୁନାଶକ ସ୍ପ୍ରେ ପ୍ରସ୍ତୁତିରେ ବିଭିନ୍ନ ପ୍ରକାର ରାସାୟନିକ ପଦାର୍ଥର ବ୍ୟବହାର କରାଯାଇଥାଏ। କୀଟାଣୁନାଶକ ସ୍ପ୍ରେରେ ମୁଖ୍ୟତଃ ସୋଡ଼ିୟମ୍ ହାଇପୋକ୍ଲୋରେଟ୍, ହାଇଡ୍ରୋଜେନ୍ ପେରକ୍ସାଇଡ୍, କ୍ଲୋରିନ୍, ବ୍ଲିଚିଂ ସଲ୍ୟୁଶନ କିମ୍ବା ବ୍ଲିଚିଂ ପାଉଡ଼ର ଆଦିର ବ୍ୟବହାର କରାଯାଇଥାଏ। ସେହିପରି ହାତ ସଫା ସାନିଟାଇଜରରେ ଆଲକୋହଲ, ଆଲୋଭିରା ଜୁସ୍, ଲବଙ୍ଗ ତେଲ, ୟୁକାଲିପଟାସ ତେଲ, ପିପରମେଣ୍ଟ୍ ଅବା ଅଲିଭ୍ ତେଲର ବ୍ୟବହାର ହୋଇଥାଏ। ଏସବୁ ରାସାୟନିକ ପଦାର୍ଥ ଯୋଗୁ ତ୍ୱଚା କୁଣ୍ଡାଇହେବା, ରିବି ରିବି ହୋଇ ଫଳିଯିବା ଆଦି ସମସ୍ୟା ଦେଖାଦେବାର ଆଶଙ୍କା ରହିଥାଏ। ଏସବୁକୁ ପାଟି, ଆଖି, ନାକ ଆଦିରେ ଲଗାଇବା ଅନୁଚିତ। ବେଳେବେଳେ ଏସବୁ ଯୋଗୁ ନିଶ୍ୱାସପ୍ରଶ୍ୱାସରେ ସମସ୍ୟା ଦେଖାଦେବାର ଆଶଙ୍କା ରହିଥାଏ ବୋଲି ଏଏମ୍ଏଆଇ ପକ୍ଷରୁ କୁହାଯାଇଛି। ତେଣୁ କୀଟାଣୁନାଶକ ସ୍ପ୍ରେ କିମ୍ବା ସାନିଟାଇଜର ବ୍ୟବହାର ସମୟରେ ସତର୍କ ରହିବାର ଆବଶ୍ୟକତା ରହିଛି।