କଟକ ଅଫିସ,୧୭ା୪: ଖ୍ରୀଷ୍ଟ କଲେଜ ପକ୍ଷରୁ ପ୍ରସ୍ତୁତ ହୋଇଛି ୫୦୦ ବୋତଲ ସାନିଟାଇଜର। ଏସବୁକୁ ଗୁରୁବାର କଟକ ଡିସିପି ଅଖିଳେଶ୍ୱର ସିଂଙ୍କୁ ପ୍ରଦାନ କରାଯାଇଛି। ଡିସିପିଙ୍କ ଜରିଆରେ ସହରର ବିଭିନ୍ନ ଛକରେ ଡ୍ୟୁଟି କରୁଥିବା ପୋଲିସ କର୍ମଚାରୀଙ୍କୁ ଏହା ବଣ୍ଟାଯିବ ବୋଲି କଲେଜ ପକ୍ଷରୁ ସୂଚନା ଦିଆଯାଇଛି।
ଖ୍ରୀଷ୍ଟ କଲେଜ ଅଧ୍ୟକ୍ଷ ଡ. ସିଦ୍ଧାର୍ଥ ସାହୁଙ୍କ ସହଯୋଗରେ ରସାୟନ ବିଜ୍ଞାନ ଅଧ୍ୟାପକ ଡ. ଦିଲ୍ଲୀପ ବରାଳ, ଡ. ପ୍ରଦ୍ୟୁମ୍ନ କୁମାର ଦାଶ, ଅଶୋକ କୁମାର ସାହୁ, ପ୍ରିୟରଞ୍ଜନ ଦାଶ ଏବଂ ଲାବୋରୋଟରି ଆଟେଣ୍ଡାଣ୍ଟ ଦେବଦୀପ୍ତ ନାୟକ ଏହି ସାନିଟାଇଜର୍ ପ୍ରସ୍ତୁତ କରିଛନ୍ତି। ଏଥିଲାଗି ୫ଦିନ ପରିଶ୍ରମ କରିବାକୁ ପଡ଼ିଛି। ପ୍ରଥମେ ପରୀକ୍ଷାମୂଳକ ଭାବେ ୫୦ ବୋତଲ ସାନିଟାଇଜର ତିଆରି କରାଯାଇଥିଲା। ସଫଳ ହେବା ପରେ ୫୦୦ ବୋତଲ ପ୍ରସ୍ତୁତ ପାଇଁ ଯୋଜନା ହୋଇଥିଲା। ଏଥିରେ ଆଇସୋପ୍ରୋପାଇଲ୍ ଆଲ୍କହଲ୍, ଗ୍ଲିସେରଲ୍, ହାଡ୍ରୋଜେନ୍ ପେରକ୍ସାଇଡ୍, ଡିଷ୍ଟିଲ୍ ୱାଟର୍ ଏବଂ ସୁଗନ୍ଧ ପାଇଁ ଲେମନ୍ ଫ୍ଲେଭର୍ ବ୍ୟବହାର କରାଯାଇଥିବା ବୋଲି ବିଭାଗୀୟ ମୁଖ୍ୟ ଡ. ଆଲୋକ ମିଶ୍ର କହିଛନ୍ତି। ଡିସିପିଙ୍କ କାର୍ଯ୍ୟାଳୟରେ ୫୦୦ ବୋତଲ ସାନିଟାଇଜର ପ୍ରଦାନ କରିବା ଅବସରରେ ଡ. ମିଶ୍ରଙ୍କ ସମେତ ମହାବିଦ୍ୟାଳୟ ପରିଚାଳନା ସମିତି ସଭ୍ୟ ଚନ୍ଦନ ଦାସ, ଶୁଭାଶିଷ ସାହୁ ଏବଂ ପୁରାତନ ଛାତ୍ର ତଥା ଓଲିଉଡ୍ ଷ୍ଟାର୍ ଅରିନ୍ଦମ ରାୟ ଉପସ୍ଥିତ ଥିଲେ।