ନୂଆଦିଲ୍ଲୀ,୨୨-୩ : ହ୍ୟାଣ୍ଡ ସାନିଟାଇଜର ମୂଲ୍ୟ ଉପରେ ସରକାର କଟକଣା ଲଗାଇବା ସହ ସୀମା ଧାର୍ଯ୍ୟ କରିଛନ୍ତି। ଜୁନ ୩୦ ପର୍ଯ୍ୟନ୍ତ ଏହି ନିୟମ ବଳବତ୍ତର ରହିବ। ୨୦୦ ମିଲିଗ୍ରାମ ହ୍ୟାଣ୍ଡ ସାନିଟାଇଜର ବୋତଲର ସର୍ବାଧିକ ରିଟେଲ ମୂଲ୍ୟ ୧୦୦ ଟଙ୍କା ଧାର୍ଯ୍ୟ କରାଯାଇଛି। କରୋନା ପ୍ରଭାବରେ ସାନିଟାଇଜର ମୂଲ୍ୟ ବଢିବା ଆଶଙ୍କା କରି ସରକାର ଏଭଳି ପଦକ୍ଷେପ ଗ୍ରହଣ କରିଛନ୍ତି। ଏହାବାଦ ୨ ପ୍ଲାଏ ସର୍ଜିକାଲ ମାସ୍କର ମୂଲ୍ୟକୁ ୮ ଟଙ୍କା ନିର୍ଦ୍ଧାରଣ କରାଯାଇଥିବା ବେଳେ ୩ ପ୍ଲାଏ ସର୍ଜିକାଲ ମାସ୍କର ମୂଲ୍ୟ ଜୁନ ୩୦ ଯାଏ ୧୦ ଟଙ୍କା ବିକ୍ରି ହେବ ବୋଲି ଖାଉଟି ବ୍ୟାପାର ମନ୍ତ୍ରୀ ରାମବିଳାସ ପାଶ୍ୱାନ ସୂଚନା ଦେଇଛନ୍ତି। ଲୋକଙ୍କ ପାଇଁ ଫେସ୍ ମାସ୍କ ଏବଂ ହ୍ୟାଣ୍ଡ ସାନିଟାଇଜରର ଉପଲବ୍ଧତା ବଢାଇବା ଲାଗି ସରକାର ପଦକ୍ଷେପ ନେଇଥିବା ପାଶ୍ୱାନ କହିଛନ୍ତି। କଳାବଜାରୀ ଏବଂ ମୂଲ୍ୟ ବୃଦ୍ଧିକୁ ଧ୍ୟାନରେ ରଖି ଚଳିତ ମାସ ସରକାର ସାନିଟାଇଜର ଏବଂ ମାସ୍କକୁ ଆବଶ୍ୟକ ସାମଗ୍ରୀ ବୋଲି ଘୋଷଣା କରିଥିଲେ। ଏହାବାଦ ହ୍ୟାଣ୍ଡ ସାନିଟାଇଜର ପ୍ରସ୍ତୁତିରେ ବ୍ୟବହୃତ ହେଉଥିବା ଆଲକହଲର ମୂଲ୍ୟକୁ ମାର୍ଚ୍ଚ ୧୯ରେ ସୀମା ନିର୍ଦ୍ଧାରଣ କରିଛନ୍ତି।