ଭୁବନେଶ୍ୱର, ୨।୪ (ବ୍ୟୁରୋ)/ କଟକରୋଡ, (ଡି.ଏନ.ଏ.): କରୋନା ଭୂତାଣୁ ସଂକ୍ରମଣରୁ ଭୁବନେଶ୍ୱରକୁ ରକ୍ଷା କରିବା ପାଇଁ ଆରମ୍ଭ ହୋଇଛି ବିଶୋଧନ କାର୍ଯ୍ୟକ୍ରମ। ବୁଧବାର ଦ୍ୱିତୀୟ ଦିନରେ ହାଇପୋକ୍ଲୋରାଇଡ୍ ମିଶା ପାଣିରେ ରାସ୍ତାଘାଟ ବଜାର, କଲୋନୀ ଆଦିକୁ ସାନିଟାଇଜ୍ କରାଯାଇଥିବାବେଳେ ଭୂତାଣୁନାଶକ ଧୂଆଁ ସ୍ପ୍ରେ ଆରମ୍ଭ ହୋଇଛି। ବିଏମ୍ସି ଓ ଅଗ୍ନିଶମ ବାହିନୀ ପକ୍ଷରୁ ଏହି କାର୍ଯ୍ୟ ଚାଲିଥିବାବେଳେ ଭୁବନେଶ୍ୱରର ୬୭ ଓ୍ବାର୍ଡ ମଧ୍ୟରୁ ୪୦ରୁ ଊର୍ଦ୍ଧ୍ୱ ଓ୍ବାର୍ଡକୁ ବିଶୋଧନ କରାଯାଇଛି। ଚଳିତ ସପ୍ତାହରେ ଏହି ପ୍ରକ୍ରିୟାରେ ସମସ୍ତ ଓ୍ବାର୍ଡ ସାମିଲ ହୋଇସାରିଥିବ ବୋଲି ବିଏମ୍ସି ପକ୍ଷରୁ କୁହାଯାଇଛି।
ମିଳିଥିବା ସୂଚନାନୁସାରେ, ଡେପୁଟି ଫାୟାର ଅଫିସର ରମେଶ ଚନ୍ଦ୍ର ମାଝିଙ୍କ ସହ ୩ ଅଗ୍ନିଶମ ଅଧିକାରୀ ଓ ଭୁବନେଶ୍ୱର ମହାନଗର ନିଗମ(ବିଏମ୍ସି) ଅଧୀନରେ ଥିବା ସ୍ବାସ୍ଥ୍ୟ ବିଭାଗର ଏକ ଟିମ ସାନିଟାଇଜରେ ସାମିଲ ଅଛନ୍ତି। ମଙ୍ଗଳ ଓ ବୁଧବାର ଦୁଇଦିନରେ ରବି ଟକିଜ ଛକଠାରୁ କଳ୍ପନା ଛକ ଓ କଟକରୋଡ୍ ଦେଇ ରସୁଲଗଡ଼ ଛକ, ରସୁଲଗଡ଼ ଶିଳ୍ପାଞ୍ଚଳ, ବଡ଼ଗଡ଼ ହାଟ, ବାପୁଜୀ ନଗର, ଜନପଥ, ସିଆର୍ପି, ଫାୟାର ଷ୍ଟେଶନ ଛକ ଆଦି ଅଞ୍ଚଳକୁ ବିଶୋଧନ କରାଯାଇଛି। ଅନ୍ୟପକ୍ଷରେ ଥର୍ମାଲ ଆପ୍ଲିକେଟର ମାଧ୍ୟମରେ ଏବେ ସାରା ସହରକୁ କେମିକାଲଯୁକ୍ତ ଧୂଆଁ ସ୍ପ୍ରେ ବା ଫଗିଂ କରାଯାଉଛି। ଏନେଇ ବିଏମ୍ସି ମୋଟ ୧୦ ମେଶିନ ନିୟୋଜିତ କରିଛି।