ଉମରକୋଟ,୨୯।୫(ଡି.ଏନ.ଏ): ନବରଙ୍ଗପୁର ଜିଲା ଝରିଗାଁ ବ୍ଲକ ବକଡାବେଢା ପଞ୍ଚାୟତ ନିକଟସ୍ଥ ତେଣ୍ଡକାଗୁଡାରେ ମଙ୍ଗଳବାର ରାତିରେ ସାପ କାମୁଡାରେ ମାଇଁର ମୃତ୍ୟୁ ଘଟିଥିବା ବେଳେ ଭାଣିଜୀ ଗୁରୁତର ହୋଇଛନ୍ତି। ମୃତକ ଜଣକ ହେଲେ ଦମୟତି ଭତ୍ରା। ଭାଣିଜୀ ଝଞ୍ଜାବତୀ ଭତ୍ରାଙ୍କୁ ଉମରକୋଟ ଡାକ୍ତରଖାନାରେ ଭର୍ତ୍ତି କରାଯାଇଛି। ଦମୟତି ଓ ଝଞ୍ଜାବତୀ ମିଳିତ ଭାବେ ବିଡ୍ରୀ ନଦୀ କୂଳରେ ଭାଗ ଚାଷ କରୁଥିଲେ। ମକା ଅମଳ ସମୟ ହୋଇଥିବାରୁ ମକା ଭାଙ୍ଗିବା ସକାଶେ ପୂର୍ଲା ଗ୍ରାମରୁ ତେଣ୍ଡକାଗୁଡା ଉଭୟେ ଯାଇଥିଲେ। ସେଠାରେ ଦିନରେ ମକା ଭାଙ୍ଗି ରାତିରେ ଏକ ଘରେ ଶୋଉଥିଲେ। ମଙ୍ଗଳବାର ରାତିରେ ସମସ୍ତେ ଖାଇ ଶୋଇ ପଡିବା ପରେ ଦମୟତି ଓ ଝଞ୍ଜାବତୀଙ୍କୁ ଏକ ସାପ କାମୁଡି ଦେଇଥିଲା। ଗ୍ରାମବାସୀ ଉଭୟଙ୍କୁ ଗୁରୁତର ଅବସ୍ଥାରେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ଦୟମତିଙ୍କ ମୃତ୍ୟୁ ହୋଇଥିଲା। ଝଞ୍ଜାବତୀ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।