କାଠମାଣ୍ଡୁ,୨୪।୯(ପି.ଟି.)- ଏଠାରେ ଆରମ୍ଭ ହୋଇଥିବା ସାଫ୍ ୧୮ ବର୍ଷରୁ କମ୍ ଫୁଟବଲ ଟୁର୍ନାମେଣ୍ଟରେ ଭାରତ ଡ୍ର’ ଅଭିଯାନ ଆରମ୍ଭ କରିଛି। ସୋମବାର ଭାରତ ତା’ର ପ୍ରଥମ ମ୍ୟାଚ୍ରେ ବାଂଲାଦେଶକୁ ଭେଟିଥିଲା। କଡ଼ା ସଂଘର୍ଷପୂର୍ଣ୍ଣ ଏହି ମ୍ୟାଚ୍ ଗୋଲ ଶୂନ୍ୟ ଭାବେ ଡ୍ର ରହିଛି। ମ୍ୟାଚ୍ ଆରମ୍ଭରୁ ଭାରତ ଆକ୍ରମଣାତ୍ମ ପ୍ରଦର୍ଶନ କରିଥିଲା। ନବମ ମିନିଟ୍ରେ ଭାରତୀୟ ଗୋଲ କିପର ପ୍ରଭୁସୁକନ ସିଂ ଗିଲ ଆହତ ହୋଇଥିଲେ। ଫଳରେ କୋଚ୍ ଫ୍ଲଏଡ ପିଣ୍ଟୋଙ୍କୁ ଦଳରେ ପରିବର୍ତ୍ତନ କରିବାକୁ ପଡିଥିଲା। ବାଂଲାଦେଶ ଡିଫେନ୍ସ ବେଶ୍ ଦୃଢ଼ ଥିଲା। ଫଳରେ ଭାରତ ଗୋଲ ସ୍କୋର କରିବାକୁ ସକ୍ଷମ ହୋଇ ନ ଥିଲା। ୩୬ତମ ମିନିଟରେ ସୁମିତ ରଥି ଗୋଲ ସୁଯୋଗ ସୃଷ୍ଟି କରିଥିଲେ। ତେବେ ତାଙ୍କ ଶଟ୍ ବାରର ଠିକ ଉପର ଦେଇ ଚାଲିଯାଇଥିଲା। ଫଳରେ ଗୋଲ ସମ୍ଭବ ହୋଇପାରି ନ ଥିଲା। ଏହାପରେ ଭାରତ ପ୍ରଭାବି ବିସ୍ତାର କରି ଖେଳିଥିଲେ ମଧ୍ୟ ଗୋଲ ହୋଇପାରି ନ ଥିଲା। ଆଟାକିଂ ଲାଇନ୍ରେ ଭାରତ ଦୁଇଟି ପରିବର୍ତ୍ତନ କରିଥିଲେ ଗୋଲ ସମ୍ଭାବାନ ସୃଷ୍ଟି କରିପାରି ନ ଥିଲା। ଏହି ମ୍ୟାଚ୍ ବେଶ୍ କଷ୍ଟକର ଥିଲା ବୋଲି ପିଣ୍ଟୋ ସ୍ବୀକାର କରିଛନ୍ତି। ୧୦ଜଣ ଖେଳାଳିଙ୍କ ନେଇ ବାଂଲାଦେଶ ଭଲ ପ୍ରଦର୍ଶନ କରିଥିଲା। ମ୍ୟାଚ୍ ଡ୍ର ହେବା ଫଳରେ ଉଭୟ ଦଳ ପଏଣ୍ଟ ଭାଗ କରିଛନ୍ତି। ଏବେ ଭାରତ ତା’ର ଅନ୍ତିମ ଗ୍ରୁପ୍ ମ୍ୟାଚ୍ରେ ୨୫ ତାରିଖରେ ଶ୍ରୀଲଙ୍କାକୁ ଭେଟିବ। ଶ୍ରୀଲଙ୍କା ତା’ର ଗତ ମ୍ୟାଚ୍ରେ ବାଂଲାଦେଶଠାରୁ ୦-୩ରେ ପରାସ୍ତ ହୋଇଥିଲା। ଦୁଇଟି ଗ୍ରୁପ୍ର ଶ୍ରେଷ୍ଠ ଦୁଇଟି ଦଳ ସେମିଫାଇନାଲରେ ପ୍ରବେଶ କରିବେ। ୨୭ ତାରିଖରେ ଦୁଇଟି ସେମିଫାଇନାଲ ଖେଳାଯିବ।