ବଇଣ୍ଡା, ୨୧ା୫(ଡି.ଏନ.ଏ.)- କିଶୋରନଗର ବ୍ଲକ ବଇଣ୍ଡା ଅଞ୍ଚଳରେ ସାମାଜିକ ଦୂରତା ରକ୍ଷା ନ କରି ଜିନିଷ ବିକୁଥିବା ବେଳେ କିଶୋରନଗର ତହସିଲ କାର୍ଯ୍ୟାଳୟ ପକ୍ଷରୁ ୪ଟି ଦୋକାନକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରାଯାଇଛି। ମଙ୍ଗଳବାର ବଇଣ୍ଡା ହାଇସ୍କୁଲ ରୋଡରେ ଥିବା ଦୋକାନଗୁଡିକରେ ମାଜିଷ୍ଟ୍ରେଟ ତଥା ତହସିଲଦାର ଡ. ଲକ୍ଷ୍ମୀପ୍ରସାଦ ସାହୁ ଚଢ଼ାଉ କରି ଚିତ୍ରସେନ ଦାସ, ସୁଶୀଲ କୁମାର ସାହୁଙ୍କ ଭେରାଇଟି ଷ୍ଟୋର, ସୁରେଶ ସାଥୁଆ ମହାପାତ୍ରଙ୍କ ସୁନା ଦୋକାନ ଏବଂ ପ୍ରଦୀପ କୁମାର ସାହୁଙ୍କ ଲୁଗା ଦୋକାନ ବନ୍ଦ ରଖିବାକୁ ନିର୍ଦ୍ଦେଶ ଦେଇଥିଲେ। ଏ ନେଇ ତହସିଲ କାର୍ଯ୍ୟାଳୟ ପକ୍ଷରୁ ଚିଠି ନଂ. ୨୧୩୭, ୨୧୩୮, ୨୧୩୯, ୨୧୪୦, ୨୦ା୫ା୨୦୨୦ରେ ନୋଟିସ୍ ଜାରି କରାଯିବା ସହ ପୋଲିସକୁ ଏହାର ନକଲ ଦିଆଯାଇଛି।