ଛତ୍ରପୁର,୧୯।୫(ଡି.ଏନ୍.ଏ.): ଗଞ୍ଜାମ ଜିଲା ସଦରମହକୁମା ଛତ୍ରପୁର ସହର ବଜାର ମେନ୍ରୋଡରେ ଥିବା ସନ୍ତୋଷ ସେନାପତିଙ୍କ ଗ୍ରୋସରୀ ଦୋକାନକୁ ସୋମବାର ପ୍ରଶାସନ ପକ୍ଷରୁ ସିଲ୍ କରାଯାଇଛି। ସାମାଜିକ ଦୂରତା ଉଲ୍ଲଂଘନ ନେଇ ଉକ୍ତ ଦୋକାନକୁ ସିଲ କରାଯାଇଥିବା ଜଣାପଡ଼ିଛି।
ସାମାଜିକ ଦୂରତା, ମାସ୍କ ଓ ଗ୍ଳୋବ୍ସ ବ୍ୟବହାର, ଗ୍ରାହକଙ୍କ ପାଇଁ କଣ୍ଟାକ୍ଟ ଡାଏରୀ ରଖିବା ଏବଂ ଦୋକାନ ଆଗରେ ଗୋଲେଇ ଆଙ୍କିବା ବାଧ୍ୟତାମୂଳକ ବୋଲି ଜିଲାପାଳ ବିଜୟ ଅମୃତା କୁଲାଙ୍ଗେ ନିର୍ଦ୍ଦେଶନାମା ଜାରି କରିଥିଲେ। ଏହାର ଉଲ୍ଲଂଘନ କଲେ ଦୋକାନ ସିଲ ସହ ଜରିମାନା ଆଦାୟ ହେବ ବୋଲି ଜିଲାପାଳ ଉକ୍ତ ନିର୍ଦ୍ଦେଶନାମାରେ କହିଥିଲେ।