ଢେଙ୍କାନାଳ ଅଫିସ, ୮।୪ – ସାମାଜିକ ଦୂରତ୍ୱ ନିୟମକୁ ଅଧିକ କଡ଼ାକଡ଼ି କରିଛି ଢେଙ୍କାନାଳ ଜିଲା ପ୍ରଶାସନ। ଏଣିକି ସହରରେ କେବଳ ସକାଳ ବେଳା ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିବ। ଏଥିଲାଗି ସକାଳ ୭ଟାରୁ ପୂର୍ବାହ୍ନ ୧୧ଟା ଯାଏ ସମୟ ଧାର୍ଯ୍ୟ କରାଯାଇଥିବା ପୌରସଂସ୍ଥା ପକ୍ଷରୁ ସୂଚନା ଦିଆଯାଇଛି। ତେବେ ଔଷଧ ଦୋକାନକୁ ଏଥିରୁ ବାଦ୍ ଦିଆଯାଇଛି। ଔଷଧ ଦୋକାନ ସବୁ ସମୟରେ ଖୋଲା ରହିପାରିବ। ଏ ନେଇ ଡାକବାଜି ଯନ୍ତ୍ର ସହାୟତାରେ ଜନସାଧାରଣଙ୍କୁ ଅବଗତ କରାଯାଇଛି। ପୂର୍ବରୁ ବୁଧବାର ଏବଂ ରବିବାର ଅପରାହ୍ନରେ ଦୋକାନ ଖୋଲାଯିବାକୁ ନିଷ୍ପତ୍ତି ହୋଇଥିବାବେଳେ ମଙ୍ଗଳବାର ଏହାକୁ ରଦ୍ଦ କରାଯାଇଛି। ସେହିପରି ରଥଗଡ଼ାସ୍ଥିତ ସମସ୍ତ ପରିବା ଏବଂ ଆମିଷ ଦୋକାନକୁ ଜଗନ୍ନାଥରୋଡସ୍ଥିତ ପୋତାପୋଖରୀ ପଡ଼ିଆକୁ ସ୍ଥାନାନ୍ତର କରାଯାଇଛି। ବ୍ୟବସାୟୀମାନେ ଏହାକୁ ଅମାନ୍ୟ କଲେ ଦୋକାନ ସିଲ କରିଦିଆଯିବ ବୋଲି ପୌରସଂସ୍ଥା ପକ୍ଷରୁ ତାଗିଦ୍ କରାଯାଇଛି। ସାମାଜିକ ଦୂରତା ରକ୍ଷାରେ ସହଯୋଗ ନ କଲେ ବ୍ୟବସାୟୀଙ୍କ ଦୋକାନ ସିଲ୍ କରାଯିବ। ତାଙ୍କର ଟ୍ରେଡ୍ ଲାଇସେନ୍ସ ରଦ୍ଦ କରାଯିବ। ଏଥିସହ ଆପରାଧିକ ମାମଲା ରୁଜୁ କରାଯିବ ବୋଲି ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ ସୂଚନା ଦେଇଛନ୍ତି।
ସେହିପରି ସହରରେ ଦୁଇଚକିଆ ଯାନ ଚଳାଚଳ ନିଷେଧ କରାଯାଇଛି। ମଙ୍ଗଳବାର ଟାଉନ ଥାନା ପୋଲିସ ବାଇକ୍ ଆରୋହୀଙ୍କୁ ଏ ନେଇ ସଚେତନ କରାଇଥିଲା। ଏଥିସହ ନିୟମ ଉଲ୍ଲଂଘନ କରିବା ଅଭିଯୋଗରେ ୧୦ଜଣଙ୍କୁ ଗିରଫ କରାଯିବା ସହ ୮ବାଇକ ଜବତ କରାଯାଇଛି। ଏଥିସହିତ ୧୬ ହଜାର ଟଙ୍କା ଜରିମାନା ଆଦାୟ କରାଯାଇଛି। ବାଇକ୍ ଆରୋହୀଙ୍କ ଉପରେ ଏପରି କଟକଣାକୁ ନେଇ ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ବାଇକ୍ ଆରୋହୀମାନେ ଯୁକ୍ତିତର୍କ କରୁଥିବାବେଳେ ସେମାନଙ୍କୁ ବୁଝାଶୁଝା କରି ପୋଲିସ ପଠାଇ ଦେଇଥିଲା। ଏସ୍ପିଙ୍କ ଅନୁପମା ଜେମ୍ସଙ୍କ ନିର୍ଦ୍ଦେଶରେ ଲକ୍ଡାଉନ୍କୁ ସଫଳ କରିବାକୁ ପାଟ୍ରୋଲିଂ ଚାଲିଥିବା ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ ସୂଚନା ଦେଇଛନ୍ତି।