ଟୋକିଓ,୨୭।୭(ପି.ଟି.)- ଖରାପ ପୋଲିସ ରେକର୍ଡ ଯୋଗୁ ଭାରତୀୟ ପେସର ମହମ୍ମଦ ସାମିଙ୍କ ଆମେରିକା ଭିଜାକୁ ପ୍ରାଥମିକ ଭାବେ ରଦ୍ଦ କରାଯାଇଥିଲା। ଫଳରେ ସାମି ଭାରତୀୟ ଦଳ ସହ ଆମେରିକା ଗସ୍ତ ନ କରି ପାରନ୍ତି ବୋଲି ସମ୍ଭାବନା ସୃଷ୍ଟି ହୋଇଥିଲା। କିନ୍ତୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ହସ୍ତକ୍ଷେପ ଯୋଗୁ ସାମି ଲଜ୍ଜିତ ହେବାରୁ ବଞ୍ଚିଯାଇଛନ୍ତି। ତାଙ୍କ ଭିଜା ଆବେଦନ ପତ୍ରରେ ପୋଲିସ ରିପୋର୍ଟ ସମ୍ପୂର୍ଣ୍ଣ ନ ଥିବାରୁ ପ୍ରାଥମିକ ଭାବେ ମୁମ୍ବାଇସ୍ଥିତ ଆମେରିକା ଦୂତାବାସ ନାକଚ କରିଦେଇଥିଲା। ସାମିଙ୍କ ନାମରେ ଯୌତୁକ ନିର୍ଯାତନା (୪୯୮ଏ) ଓ ଯୌନ ଉତ୍ପୀଡ଼ନା (୩୫୪ଏ) ମାମଲା ରହିଛି। ଏଥିଯୋଗୁ ବିସିସିଆଇକୁ ହସ୍ତକ୍ଷେପ କରିବାକୁ ପଡ଼ିଥିଲା। ବିସିସିଆଇ କାର୍ଯ୍ୟାଳୟ ପକ୍ଷରୁ ଦେଶ ପାଇଁ ସାମିଙ୍କ ସଫଳତାର ତାଲିକା ପ୍ରଦାନ କରାଯିବା ସହ ସମ୍ପୂର୍ଣ୍ଣ ପୋଲିସ ରିପୋର୍ଟ ଦିଆଯାଇଥିଲା। ଏହାପରେ ସାମିଙ୍କ ଭିଜାକୁ ସ୍ବୀକୃତି ମିଳିଛି। ଭାରତୀୟ କ୍ରିକେଟ ଦଳ ଆସନ୍ତା ୨୯ ତାରିଖରେ ମୁମ୍ବାଇରୁ ଆମେରିକା ଯାତ୍ରା କରିବ। ସେଠାରେ ଭାରତୀୟ ଦଳ ଓ୍ବେଷ୍ଟଇଣ୍ଡିଜ ବିପକ୍ଷରେ ଦୁଇଟି ଟି୨୦ ମ୍ୟାଚ୍ ଖେଳିବ। ପ୍ରଥମଟି ଲୌଡେରହିଲ୍ ଓ ଦ୍ୱିତୀୟ ମ୍ୟାଚ୍ ଫ୍ଲୋରିଡାରେ ଖେଳାଯିବ। ତେବେ ଭାରତୀୟ ଟି୨୦ ଦଳରେ ସାମିଙ୍କୁ ସ୍ଥାନ ମିଳିନାହିଁ। ହେଲେ ଟିମ୍ ଇଣ୍ଡିଆ ଜାମାଇକାରେ ଦ୍ୱିତୀୟ ଟେଷ୍ଟ ମ୍ୟାଚ୍ ଖେଳିବା ପରେ ଆମେରିକା ଦେଇ ଭାରତ ଫେରିବ। ଏଥିଯୋଗୁ ତାଙ୍କୁ ଆମେରିକା ଭିଜା ଦରକାର।