ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁରଙ୍କ ଆତ୍ମହତ୍ୟା ଘଟଣା ତାଙ୍କ ପ୍ରଶଂସକଙ୍କଠାରୁ ଆରମ୍ଭ କରି ପରିବାର ତଥା ବନ୍ଧୁବର୍ଗକୁ ଆଶ୍ଚର୍ଯ୍ୟ କରିଦେଇଛି। ପ୍ରଶଂସକମାନେ ସେମାନଙ୍କ ପୁରୁଣା ସ୍ମୃତି ସୋସିଆଲ ମିଡିଆରେ ଶେୟାର କରୁଛନ୍ତି। ସୁଶାନ୍ତଙ୍କ ହଠାତ୍ ମୃତ୍ୟୁ ପରେ ସେ ସାଇନ୍ କରିଥିବା ଅନେକ ପ୍ରୋଜେକ୍ଟ ଅଧାରେ ପଡ଼ିରହିଛି। ଏହିପରି ଗୋଟିଏ ପ୍ରୋଜେକ୍ଟ ହେଉଛି ‘ବନ୍ଦେ ଭାରତମ୍’। ସୁଶାନ୍ତଙ୍କୁ ଲିଡ୍ ରୋଲ୍ରେ ନେଇ ତାଙ୍କ ବନ୍ଧୁ ତଥା ଫିଲ୍ମ ନିର୍ମାତା ସନ୍ଦୀପ ସିଂହ ଏହାକୁ ନିର୍ମାଣ କରୁଥିଲେ। ତେବେ ବନ୍ଧୁ ସୁଶାନ୍ତଙ୍କ ମୃତ୍ୟୁରେ ସନ୍ଦୀପ ସମ୍ପୂର୍ଣ୍ଣ ଭାଙ୍ଗିପଡ଼ିଛନ୍ତି। ସବୁ ସମୟରେ ସେ ସୋସିଆଲ ମିଡିଆ ଇନ୍ଷ୍ଟାଗ୍ରାମ୍ରେ ସୁଶାନ୍ତଙ୍କୁ ମନେ ପକାଇ କିଛି ନା କିଛି ଶେୟାର କରୁଛନ୍ତି। ଏବେ ସନ୍ଦୀପ ସୁଶାନ୍ତଙ୍କ ଫିଲ୍ମ ‘ବନ୍ଦେ ଭାରତମ୍’ର ପ୍ରଥମ ପୋଷ୍ଟର ଶେୟାର କରିଛନ୍ତି। ଏଥିସହ ସେ ଲେଖିଛନ୍ତି: ଆମେ ୨ ବିହାରି ଭାଇ ଦିନେ ଏହି ଫିଲ୍ମ ଇଣ୍ଡଷ୍ଟ୍ରିରେ ରାଜ୍ କରିବା ଏବଂ ସମସ୍ତ ଯୁବକଙ୍କ ପାଇଁ ପ୍ରେରଣା ସାଜିବା ବୋଲି କଥା ହୋଇଥିଲେ। ନିର୍ଦ୍ଦେଶକ ଭାବେ ତୁମେ ମୋର ପ୍ରଥମ ଫିଲ୍ମରେ କାମ କରିବ ବୋଲି ପ୍ରତିଶ୍ରୁତି ଦେଇଥିଲ। ହେଲେ ଏବେ ମୋତେ ଅଧା ରାସ୍ତାରେ ଛାଡି ଚାଲିଗଲ ମୋ ଭାଇ ବୋଲି ସନ୍ଦୀପ ଲେଖିଛନ୍ତି।