ବେଜିଂ,୨୬।୩: ସାରା ବିଶ୍ୱରେ ପ୍ରାୟ ୨୦ ପ୍ରତିଶତ ଜନସଂଖ୍ୟା କେରାନା ଭାଇରସ୍ ଯୋଗୁ ଏବେ ଲକ୍ଡାଉନ୍ରେ ରହିଛନ୍ତି। ମହାମାରୀ କରୋନାକୁ ରୋକିବା ପାଇଁ ଲୋକମାନେ ଘର ବନ୍ଦୀ ଥିବା ବେଳେ ଦୋକାନ ବଜାର ଓ ସରକାରୀ କାର୍ଯ୍ୟାଳୟରେ ତାଲା ପଡ଼ିଛି। ହେଲେ ଯେଉଁଠାରୁ କରୋନା ଭାଇରସ୍ ବ୍ୟାପିବା ଆରମ୍ଭ ହୋଇଥିଲା ସେଠାରେ ଏବେ ପରିସ୍ଥିତି ସ୍ବାଭାବିକ ହେଉଛି। ଚାଇନାରେ ଏବେ ସାଧାରଣ ଜୀବନ ଟ୍ରାକ୍କୁ ଫେରୁଥିବା ଦେଖିବାକୁ ମିଳିଛି। ହୁବାଇ ଅଞ୍ଚଳରେ ଯାତାୟତରେ ଲାଗିଥିବା ପ୍ରତିବନ୍ଧକକୁ ହଟାଇ ଦିଆଯାଇଥିବା ବେଳେ ଲୋକମାନେ ଘର ବହାରିବା ସହ ଟ୍ରେନ୍ ଓ ବସ୍ରେ ଯାତାୟାତ କରୁଛନ୍ତି।
ସେହିପରି ପ୍ରାୟ ୨ମାସ ପରେ ଚାଇନାର କାର୍ଯ୍ୟାଳୟ ଓ ଫ୍ୟାକ୍ଟ୍ରି ଖୋଲା ହୋଇଥିବା ବେଳେ ଲୋକେ ନିଜ କାର୍ଯ୍ୟକୁ ଫେରିଛନ୍ତି। ଲୋକମାନେ ଘରୁ ବାହାରି ରେଷ୍ଟୁରାଣ୍ଟ, ବଜାର, ମଲ୍ ଓ ହସ୍ପିଟାଲ ଆଦି ସ୍ଥାନକୁ ଯାଉଥିବାର ନଜର ଆସିଛି। ଫ୍ୟାକ୍ଟି ଖୋଲା ହେବାରୁ ଲୋକ ମାସ୍କ, ଜିପର ବ୍ୟାଗ ଓ କରୋନା ସହ ମୁକାବିଲା ପାଇଁ ଆବଶ୍ୟକ ସାମଗ୍ରୀକୁ ତିଆରି କରିବାରେ ଲାଗିପଡ଼ିଛନ୍ତି। ତେବେ ଯେଉଁମାନେ କାର୍ଯ୍ୟକୁ ଫେରିଛନ୍ତି ସେମାନଙ୍କୁ ସରକାରଙ୍କ ଦ୍ୱାରା କରାଯାଇଥିବା କରୋନା ସମ୍ବନ୍ଧୀୟ କିଛି ନିୟମ ମାନିବାକୁ ବାଧ୍ୟ। କାରଣ ପୁଣି ଥରେ ଯେପରି ଏହି ସମସ୍ୟା ଭୋଗିବାକୁ ନ ପଡ଼େ। ଫାକ୍ଟ୍ରିରେ ଯାଉଥିବା ଲୋକଙ୍କୁ ପ୍ରତିଦିନ ୩୦ମିନିଟ୍ ଯାଞ୍ଚ କରାଯାଉଥିବା ସୂଚନା ମିଳିଛି। ଅପରପକ୍ଷେ କରୋନା ଆରମ୍ଭ ହୋଇଥିବା ସହର ଉହାନରେ ଲକ୍ଡାଉନ୍ ଏପ୍ରିଲ ୮ରେ ଶେଷ ହେବ।