ମୁମ୍ବାଇ: ଅଭିନେତ୍ରୀ ସାୟାନୀ ଗୁପ୍ତା ଅନୁଭବ ସିହ୍ନାଙ୍କ ‘ଆର୍ଟିକିଲ୍ ୧୫’ରେ ଏକ ଭିନ୍ନ ଅବତାରରେ ଦେଖିବାକୁ ମିଳିବେ। ଏହି ଭୂମିକା ତାଙ୍କ ପାଇଁ ନୂଆ ହୋଇଥିଲେ ହେଁ ଏହାକୁ ଚ୍ୟାଲେଞ୍ଜ୍ ରୂପେ ଗ୍ରହଣ କରିବେ ବୋଲି ସେ କହିଛନ୍ତି। ସାଧାରଣ ସାଲଓ୍ବାର-ସୁଟ୍ ସହିତ ଖୁବ୍ କମ୍ ମେକ୍-ଅପ୍ରେ ଆୟୁଷ୍ମାନ ଖୁରାନାଙ୍କ ସହ ସାୟାନୀ ଅଭିନୟ କରିବେ। ଏ ସମ୍ପର୍କରେ ସେ କହନ୍ତି, ମୁଁ କିଭଳି ଚରିତ୍ରକୁ ଭଲ ପାଏ ତାହାକୁ ନିର୍ଭର କରି ଫିଲ୍ମ ପସନ୍ଦ କରେନାହିଁ। ବରଂ କାହାଣୀ କେତେଦୂର ମୋତେ ଆକର୍ଷଣ କରେ ତାହା ଉପରେ ନିର୍ଭର କରିବାକୁ ପଡିଥାଏ। ଏଥିସହିତ ଅଭିନୟ କରିବା ବେଳେ ପ୍ରତି ଚରିତ୍ରକୁ କିପରି ଜୀବନ୍ତ କରିବାକୁ ହେବ ସେଥିପାଇଁ ଉଦ୍ୟମ କରିଥାଏ।
ଅନୁଭବ ସିହ୍ନାଙ୍କ ଦ୍ୱାରା ପ୍ରସ୍ତୁତ ଉକ୍ତ ଫିଲ୍ମ ସମ୍ବିଧାନର ଅନୁଚ୍ଛେଦ ୧୫ ବିଷୟରେ ଜନସାଧାରଣଙ୍କୁ ମନେପକାଇ ଦିଏ। ଧର୍ମ, ଜାତି, ଲିଙ୍ଗ ଏବଂ ଜନ୍ମସ୍ଥାନ ଆଧାରରେ କୌଣସି ବ୍ୟକ୍ତି ପ୍ରତି ପାତରଅନ୍ତର ମନୋଭାବ ପୋଷଣ ନ କରିବା ପାଇଁ ଏଥିରେ ଉଲ୍ଲେଖ ରହିଥିବାବେଳେ ଏହାର ମୂଲ୍ୟବୋଧକୁ ଲୋକେ କିପରି ଭୁଲିଗଲେଣି ତାହା ଉକ୍ତ ଫିଲ୍ମ ସ୍ମରଣ କରାଇଦିଏ। ଏଥିରେ ଅନ୍ୟମାନଙ୍କ ମଧ୍ୟରେ ଅଭିନୟ କରିଛନ୍ତି ମନୋଜ ପାହ୍ବା, ଇଶା ତଲଓ୍ବାର, କୁମୁଦ ମିଶ୍ର ଏବଂ ମହମ୍ମଦ ଜିଶାନ୍ ଆୟୁବ। ଏହା ଜୁନ୍ ୨୮ରେ ମୁକ୍ତିଲାଭ କରିବାର ଅଛି।