ଜୋହାନ୍ସ୍ବର୍ଗ: ଦକ୍ଷିଣଆଫ୍ରିକାର କ୍ରୁଗୁର ନ୍ୟାଶନାଲ ପାର୍କରେ ଏକ ଅଜବ ଦୃଶ୍ୟ ଦେଖିବାକୁ ମିଳିଛି। ଗୋଟିଏ ମାଙ୍କଡ଼ ଏକ ସିଂହ ଛୁଆକୁ ଟେକି ନେଇ ଗଛ ଉପରକୁ ଚଢ଼ିଯାଇଛି। ଏହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ସିଂହଛୁଆଟିକୁ ମାଙ୍କଡ଼ ଗଛ ଉପରକୁ ନେଇ ତାକୁ କୋଳରେ ବସାଇବା ସହ ସ୍ନେହ ଆଦର କରୁଥିବା ଫଟୋରେ ଦେଖିବାକୁ ମିଳିଛି। ଏହି ଫଟୋଟିକୁ ପାର୍କର ସୁରକ୍ଷାକର୍ମୀ କର୍ଟ ସୁଲ୍ଟଜ୍ ଉଠାଇଛନ୍ତି।
ସେ କୁହନ୍ତି, ସିଂହ ଉପରେ ଏକ ଫିଲ୍ମ ନିର୍ମାଣ କରିବାକୁ ଯାଉଛନ୍ତି। ତେଣୁ ଏହି ଦୃଶ୍ୟଟି ତାଙ୍କ ହୃଦୟକୁ ଛୁଇଁଛି। କାରଣ ତାଙ୍କ ଜୀବନକାଳ ଭିତରେ ଏମିତି ଲାଇଭ୍ ସିନ୍ କେବେ ଦେଖି ନ ଥିଲେ। କର୍ଟ କୁହନ୍ତି, କିଛି ସମୟ ସେ ଭୟଭୀତ ହୋଇପଡ଼ିଥିଲେ। କାରଣ ମାଙ୍କଡ଼ ଦଳ ସିଂହ ଛୁଆ ଚାରିପଟେ ଏକାଠି ହୋଇଯାଇଥିଲେ। ମୋତେ ଲାଗୁଥିଲା ସିଂହଛୁଆଟିକୁ ମାଙ୍କଡ଼ ଦଳ ମାରିଦେବେ। କିନ୍ତୁ ମାଙ୍କଡ଼ଟି ସିଂହଛୁଆଟିକୁ ଧରି ଗଛ ଉପରକୁ ଚଢ଼ିଗଲା ପରେ ବେଶ୍ ଖୁସିରେ ଖେଳିବାରେ ଲାଗିଲା। ଏହି ଫଟୋକୁ ଏବେ ହଜାର ହଜାର ଲାଇକ୍ ମିଳିସାରିଲାଣି। କର୍ଟ କୁହନ୍ତି, ଏହି ଦୃଶ୍ୟ ଉପରେ ସେ ଏକ ଆନିମେଶନ ଫିଲ୍ମ ନିର୍ମାଣ କରିବେ।
