ପୁରୀ ଅଫିସ, ୬।୮: ଦୀର୍ଘବର୍ଷ ଧରି ଅନୁଚ୍ଛେଦ ୩୭୦କୁ ନେଇ ଯେଉଁ କଳ୍ପନାଜଳ୍ପନା ଲାଗି ରହିଥିଲା ସେଥିରେ ପୂର୍ଣ୍ଣଚ୍ଛେଦ ପଡ଼ିିଛି। ଜମ୍ମୁ-କଶ୍ମୀରରୁ ଉଚ୍ଛେଦ ହୋଇଛି ଏହି ଅନୁଚ୍ଛେଦ। ଏହାକୁ ନେଇ ଦେଶବ୍ୟାପୀ ଖୁସିର ଲହରି ଖେଳିଯାଇଥିବା ବେଳେ ସିଂହଦ୍ୱାର ସମ୍ମୁଖରେ ମଧ୍ୟ ଏହାକୁ ନେଇ ଦୀପଦାନ ଏବଂ ମିଠା ବାଣ୍ଟି ଖୁସି ମନାଇଛନ୍ତି ପୁରୀ ଜିଲା ଭାଜପା ଏବଂ ଶ୍ରୀଜଗନ୍ନାଥ ସେନା। ସୋମବାର ସନ୍ଧ୍ୟାରେ ଜିଲା ଭାଜପା ପକ୍ଷରୁ ସିଂହଦ୍ୱାର ସମ୍ମୁଖରେ ଦୀପଦାନ କରାଯାଇଥିଲା। ଦଳୀୟ କର୍ମୀମାନେ ଏକଜୁଟ୍ ହୋଇ ଦୀପଦାନ କରିବା ସହ ମିଠା ବାଣ୍ଟି ଖୁସି ମନାଇଥିଲେ। ଏଥିରେ ବିଧାୟକ ଜୟନ୍ତ କୁମାର ଷଡ଼ଙ୍ଗୀ, ଜିଲା ସଭାପତି ପ୍ରଭଞ୍ଜନ ମହାପାତ୍ରଙ୍କ ସମେତ ବହୁ କର୍ମୀ ସାମିଲ ଥିଲେ। ସେହିପରି ଅପରାହ୍ନରେ ଶ୍ରୀଜଗନ୍ନାଥ ସେନା ପକ୍ଷରୁ ଆବାହକ ପ୍ରିୟଦର୍ଶନ ପଟ୍ଟନାୟକଙ୍କ ନେତୃତ୍ୱରେ ବହୁ କର୍ମୀ ଦୀପଦାନ କରିବା ସହ ମିଠା ବାଣ୍ଟି ଖୁସି ମନାଇଥିଲେ।