ପୁରୀ ଅଫିସ,୩୦।୧୨: ସିଂହଦ୍ୱାରରେ ସୌନ୍ଦର୍ଯ୍ୟକରଣ କାମ ଦ୍ରୁତଗତିରେ ଚାଲିଛି। ରବିବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାର ଏହି ସୌନ୍ଦର୍ଯ୍ୟକରଣ କାମ ବୁଲି ଦେଖିଛନ୍ତି। ସେହିପରି ନୂଆ ପାଦ ପ୍ରକ୍ଷାଳନ କାମ ବି ଆରମ୍ଭ ହୋଇଛି।
ଆସୁଛି ନୂଆବର୍ଷ। ପୁରୀକୁ ଲକ୍ଷ ଲକ୍ଷ ଭକ୍ତ, ପର୍ଯ୍ୟଟକ ଆସିବେ। ତେଣୁ ଶ୍ରଦ୍ଧାଳୁଙ୍କ ପାଇଁ ବିଭିନ୍ନ ପ୍ରକାର ସୁବିଧା କରାଯାଉଛି। ସିଂହଦ୍ୱାର ସମ୍ମୁଖ ଅଞ୍ଚଳକୁ ନୂଆ ରୂପ ଦିଆଯାଉଛି। ନୂଆ ବ୍ୟାରିକେଡ, ସ୍ଥାୟୀ ଜୋତା, ମୋବାଇଲ ଷ୍ଟାଣ୍ଡ ତିଆରି ଚାଲିଛି। ପାନୀୟ ଜଳ, ଟଏଲେଟ୍ ସୁବିଧା ବି କରାଯାଇଛି। ରବିବାରଠାରୁ ନୂଆ ପାଦ ପ୍ରେକ୍ଷାଳନ କାମ ଆରମ୍ଭ ହୋଇଛି। ପୂର୍ବରୁ ଯେଉଁ ପାଦ ପ୍ରକ୍ଷାଳନ ରହିଛି ତାହାକୁ ଭଙ୍ଗାଯାଇ ସ୍ଥାନାନ୍ତର କରାଯାଇ ପାରୁଥିବା ପାଦ ପ୍ରକ୍ଷାଳନ ତିଆରି ହେବ। ଏଥିଲାଗି ସନ୍ଧ୍ୟାରେ ୪ଟି କୁଣ୍ଡ ଅଣାଯାଇ ସିଂହଦ୍ୱାର ସମ୍ମୁଖରେ ରଖାଯାଇଛି । ବ୍ୟାରିକେଡରେ ଭକ୍ତମାନେ ଯିବା ସମୟରେ ଏହା ମଧ୍ୟରେ ପଶି ଯିବେ । ଫଳରେ ସେମାନଙ୍କୁ ଆଉ ପାଦ ଧୋଇବା ପାଇଁ ବାହାରକୁ ଯିବାକୁ ପଡ଼ିବନି। ଏହିସବୁ ସୌନ୍ଦର୍ଯ୍ୟକରଣ କାମକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୁଲି ଦେଖିବା ସହ ଆଉ କେତେକ ପରାମର୍ଶ ମଧ୍ୟ ଦେଇଥିବା ଜଣାପଡ଼ିଛି ।