କୋଲକାତା,୨ା୩(ପି.ଟି.): ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନାଗରିକତ୍ୱ ସଂଶୋଧନ ଆଇନ (ସିଏଏ)କୁ ରୋକି ପାରିବେନି। ଶରଣାର୍ଥୀମାନଙ୍କୁ ଭାରତର ନାଗରିକତ୍ୱ ଦେବାରେ ସେ କେନ୍ଦ୍ର ସରକାରଙ୍କୁ ଅଟକାଇ ପାରିବେନି ବୋଲି ରବିବାର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ହୁଙ୍କାର ଦେଇଛନ୍ତି। ସିଏଏର ଦୃଢ଼ ବିରୋଧୀ ଭାବେ ଜଣାଶୁଣା ମମତା ପଶ୍ଚିମବଙ୍ଗରେ ଏହାକୁ ଆଦୌ ଲାଗୁ କରିବାକୁ ଦିଆଯିବ ନାହିଁ ବୋଲି ବାରମ୍ବାର ଗର୍ଜନ କରୁଥିବାବେଳେ ତାଙ୍କୁ ଏଭଳି ଜବାବ ଦେଇଛନ୍ତି ଶାହା।
ସିଏଏ ସପକ୍ଷରେ ଆୟୋଜିତ ଏକ ସଭାକୁ ସମ୍ବୋଧନ କରି ସ୍ବରାଷ୍ଟ୍ରମନ୍ତ୍ରୀ କହିଛନ୍ତି, ବିରୋଧୀ ଦଳଗୁଡ଼ିକ ଶରଣାର୍ଥୀମାନଙ୍କୁ ନାଗରିକତ୍ୱ ପ୍ରଦାନ ପାଇଁ ଉଦ୍ଦିଷ୍ଟ ନବପ୍ରଣୀତ ଆଇନକୁ ନେଇ ମିଥ୍ୟା ଧାରଣା ସୃଷ୍ଟି କରି ଭୟଭୀତ କରାଉଛନ୍ତି। ଏହି ଆଇନକୁ ନେଇ ମମତା ନିଜ ରାଜ୍ୟରେ ଦଙ୍ଗାକୁ ଅନୁମତି ଦେଉଛନ୍ତି। ଏଠାରେ ଟ୍ରେନ୍ ଓ ରେଳ ଷ୍ଟେଶନଗୁଡ଼ିକୁ ଜାଳି ଦିଆଯାଇଛି। ମମତା ଦିଦି ବିରୋଧୀ ଦଳରେ ଥିବାବେଳେ ଶରଣାର୍ଥୀଙ୍କୁ ନାଗରିକତ୍ୱ ପ୍ରଦାନ ପ୍ରସଙ୍ଗ ଉଠାଇଥିଲେ। ହେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଶ୍ଚିମବଙ୍ଗର ଲକ୍ଷ ଲକ୍ଷ ଶରଣାର୍ଥୀଙ୍କୁ ନାଗରିକତ୍ୱ ଦେବା ଲାଗି ଆଇନ ଆଣିଥିବାବେଳେ ମମତା ଏହାକୁ ବିରୋଧ କରିବା ଅତ୍ୟନ୍ତ ଦୁର୍ଭାଗ୍ୟଜନକ। ଏବେ ସେ କଂଗ୍ରେସ ଓ କମ୍ୟୁନିଷ୍ଟମାନଙ୍କ ସହ ପୁଣି ଛିଡ଼ା ହୋଇଛନ୍ତି ବୋଲି ଶାହା ସମାଲୋଚନା କରିଛନ୍ତି।