ନୂଆଦିଲ୍ଲୀ,୨ା୨: ଦିଲ୍ଲୀର ଶାହିନ୍ବାଗ୍ଠାରେ ସିଏଏକୁ ବିରୋଧ କରି ବିକ୍ଷୋଭ ଚାଲିଥିବାବେଳେ ଶନିବାର ଗୁଳିକାଣ୍ଡ ଘଟିଛି। ଗୁଳି ଫୁଟାଇଥିବା ଯୁବକଙ୍କୁ ପୋଲିସ ଗିରଫ କରିଥିବାବେଳେ କେହି ମୃତାହତ ହୋଇ ନ ଥିବା ଜଣାପଡ଼ିଛି। ଅଭିଯୁକ୍ତ ଜଣକ କପିଲ ଗୁଜ୍ଜର(୨୫) ବୋଲି ଚିହ୍ନଟ କରାଯାଇଛି। ‘ଜୟ ଶ୍ରୀରାମ’ ସହ ଆମ ଦେଶରେ କେବଳ ହିନ୍ଦୁଙ୍କ ରାଜ୍ ଚାଲିବ ବୋଲି କହି ସେ ଦୁଇ-ତିନି ଥର ଆକାଶକୁ ଗୁଳି ଚଳାଇଥିଲେ। ପୋଲିସ ଏହା ପରେ ତାଙ୍କୁ ସଙ୍ଗେ ସଙ୍ଗେ କାବୁ କରିନେଇଥିଲା। ୩ ଦିନ ତଳେ ଜାମିଆ ମିଲିଆ ବିଶ୍ୱବିଦ୍ୟାଳୟ ନିକଟରେ ଜଣେ ଯୁବକ ଗୁଳିମାଡ଼ କରିବାରୁ ଜଣେ ଆହତ ହୋଇଥିଲେ। ପୋଲିସ ଅଭିଯୁକ୍ତଙ୍କୁ ଗିରଫ କରିଥିଲା।
ସିଏଏ ବିରୋଧୀ ହିଂସା ବଢ଼ିବା ଓ ୩ ଦିନ ମଧ୍ୟରେ ଦୁଇଥର ଗୁଳି ଫୁଟିବାକୁ ନେଇ ପ୍ରଶାସନ ପକ୍ଷରୁ ଚିନ୍ତାପ୍ରକଟ କରାଯାଇଛି। ଆଗକୁ ବିଧାନସଭା ନିର୍ବାଚନ ଥିବାରୁ ଦିଲ୍ଲୀ ଉପରାଜ୍ୟପାଳ ଲ୍ୟୁଟନାଣ୍ଟ ଅନିଲ ବୈଜଲ୍ ଆଇନଶୃଙ୍ଖଳା ରକ୍ଷା ସହ କଡ଼ା ସୁରକ୍ଷା ଲାଗି ପଦକ୍ଷେପ ନେବାକୁ ପୋଲିସ କମିଶନର ଅମୂଲ୍ୟ ପଟ୍ଟନାୟକଙ୍କୁ କହିଛନ୍ତି।