ସିଏଏ ହିଂସା: ପ୍ରଦର୍ଶନକାରୀଙ୍କୁ ପାକିସ୍ତାନ ପଳାଇବାକୁ କହିଲେ ଏସ୍ପି; ଭିଡ଼ିଓ ଭାଇରାଲ
01 ମିରଟ,୨୮।୧୨: ସିଏଏ ହିଂସା ସମୟର ଏକ ଭିଡ଼ିଓ ଏବେ ଭାଇରାଲ ହେବାରେ ଲାଗିଛି। ଭିଡ଼ିଓରେ ମିରଟ ସିଟି ଏସ୍ପି ଅଖିଳେଶ ନାରାୟଣ ପ୍ରଦର୍ଶନକାରୀଙ୍କୁ ପାକିସ୍ତାନ ପଳାଇବାକୁ କହୁଥିବାର ଦେଖିବାକୁ ମିଳୁଛି। ଏହି ଭିଡ଼ିଓ ଭାଇରାଲ ହେବାପରେ ଏସ୍ପି କହିଛନ୍ତି ଯେ, ପ୍ରଦର୍ଶନ କାରୀ ହାତରେ କଳାକନା ବାନ୍ଧି ପାକିସ୍ତାନ ଜିନ୍ଦାବାଦ୍ କହୁଥିଲେ। ତେଣୁ ସେମାନଙ୍କୁ ଶିକ୍ଷା ଦେବା ପାଇଁ ଏଭଳି କୁହାଯାଇଥିଲା। ତେବେ ଏସବୁ ପ୍ରଦର୍ଶନକାରୀଙ୍କୁ ଚିହ୍ନଟ କରାଯାଇଛି। ସେମାନଙ୍କ ବିରୋଧରେ ଦୃଢ଼କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ପି କହିଛନ୍ତି। ସଂଶୋଧିତ ନାଗରିକତ୍ୱ ଆଇନ (ସିଏଏ)କୁ ବିରୋଧ କରି ରାସ୍ତାକୁ ଓହ୍ଲାଇଥିବା ବିକ୍ଷୋଭକାରୀଙ୍କୁ ମିରଟ ଏସ୍ପି ‘ପାକିସ୍ତାନ ଯାଅ’ ବୋଲି କହୁଥିବାର ଭିଡିଓ ଭାଇରାଲ ହେବା ପରେ ଏହାକୁ ନେଇ ବିବାଦ ଦେଖାଦେଇଛି। ଏସ୍ପିଙ୍କୁ ବିଭିନ୍ନ ମହଲରୁ ନିନ୍ଦା କରାଯାଇଛି। ଭାଜପା ଅନୁଷ୍ଠାନଗୁଡ଼ିକରେ ସାମ୍ପ୍ରଦାୟିକତାର ମଞ୍ଜି ବୁଣୁଥିବା କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ଅଭିଯୋଗ କରିଛନ୍ତି।
ଗତ ୨୦ ତାରିଖରେ ସିଏଏକୁ ବିରୋଧ କରି ମିରଟରେ ବିକ୍ଷୋଭ ହିଂସାତ୍ମକ ରୂପ ନେଇଥିଲା, ଯେଉଁଥିରେ ୫ ଜଣ ପ୍ରାଣ ହରାଇଥିଲେ। ଏହି ଘଟଣା ପରେ ଲିସାରି ଗେଟ୍ ଥାନା ଅଞ୍ଚଳରେ ଥିବା ଏକ ସଂକୀର୍ଣ୍ଣ ଗଳିରେ ଏସ୍ପି ଅଖିଳେଶ ନାରାୟଣ ସିଂ କେତେଜଣ ସ୍ଥାନୀୟ ଲୋକଙ୍କ ସହ ପାଟିତୁଣ୍ଡ କରୁଥିବା ଭିଡିଓରେ ଦେଖାଯାଇଛି। ବିକ୍ଷୋଭକାରୀ ପାକିସ୍ତାନ ଚାଲିଯାଆନ୍ତୁ ବୋଲି ସେ କହିଥିଲେ। ବିକ୍ଷୋଭରେ ସାମିଲ ଥିବା କିଛି ଯୁବକ ପାକିସ୍ତାନ ସପକ୍ଷରେ ସ୍ଲୋଗାନ ଦେଉଥିତ୍ବାରୁ ସେ ଏପରି କହିଥିଲେ ବୋଲି ସଫେଇ ଦେଇଛନ୍ତି। ସେମାନେ ଯାହା ସପକ୍ଷରେ ସ୍ଲୋଗାନ ଦେଉଛନ୍ତି, ସେଠାରେ ଯାଇ ରହନ୍ତୁ ବୋଲି ପରାମର୍ଶ ଦେଇଥିବା ଏସ୍ପି ସ୍ବୀକାର କରିଛନ୍ତି। ୧.୪୩ ମିନିଟର ଏହି ଭିଡିଓ ବେଶ୍ ପ୍ରସାରିତ ହେବାରେ ଲାଗିଛି।
ଏଭଳି ଭାଷା ପ୍ରୟୋଗ କରିବାକୁ ଭାରତର ସମ୍ବିଧାନ କାହାକୁ ଅନୁମତି ଦେଇନାହିଁ ବୋଲି ପ୍ରିୟଙ୍କା ଟୁଇଟ୍ କରିଛନ୍ତି। ମିରଟ ଜୋନ୍ ଏଡିଜି ପ୍ରଶାନ୍ତ କୁମାର କହିଛନ୍ତି, ଡିସେମ୍ବର ୨୦ ବିକ୍ଷୋଭ ପରେ କେତେଜଣ ଲୋକ ପାକିସ୍ତାନ ସପକ୍ଷରେ ସ୍ଲୋଗାନ ଦେବା ସହ ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫ୍ଆଇ) ଏବଂ ସୋସିଆଲ ପାର୍ଟି ଅଫ ଇଣ୍ଡିଆ ସମର୍ଥନରେ ଆପତ୍ତିଜନକ ପ୍ରଚାରପତ୍ର ବାଣ୍ଟିଥିଲେ। ପିଏଫ୍ଆଇ ବେଆଇନ ଘୋଷିତ ଆତଙ୍କବାଦୀ ସଂଗଠନ ଷ୍ଟୁଡେଣ୍ଟସ୍ ଇସ୍ଲାମିକ ମୁଭ୍ମେଣ୍ଟ ଅଫ୍ ଇଣ୍ଡିଆ (ସିମି) ଦ୍ୱାରା ପ୍ରଭାବିତ ସଂଗଠନ। ଖବର ପାଇଁ ଏସ୍ପି ଓ ଅନ୍ୟ ଜିଲା ପଦାଧିକାରୀ ସେଠାକୁ ଯାଇଥିଲେ। ଯଦି ସେମାନେ ଚାହୁଁଛନ୍ତି ତେବେ ଦେଶ ଛାଡ଼ିପାରିବେ ବୋଲି ସେମାନେ ଲୋକମାନଙ୍କୁ କହିଥିଲେ ବୋଲି କୁମାର କହିଛନ୍ତି। ଉତ୍ତରପ୍ରଦେଶରେ ଶାନ୍ତି ଫେରିବା ପରେ ଏଭଳି ଭିଡିଓ ପ୍ରସାରଣ କରାଯିବା ପଛରେ ଷଡ଼ଯନ୍ତ୍ର ରହିଥିବା ଏଡିଜି ଅଭିଯୋଗ କରିଛନ୍ତି।
ଜଣେ ଏସ୍ପିଙ୍କର ଏଭଳି ଅସାମ୍ବିଧାନିକ ମନ୍ତବ୍ୟ ଦେବାର ନ ଥିଲା ବୋଲି ସମାଜବାଦୀ ପାର୍ଟି ବିଧାୟକ ରଫିକ୍ ଅନ୍ସାରି ମତ ଦେଇଛନ୍ତି। ଅନ୍ୟ ପକ୍ଷରେ ବରିଷ୍ଠ ଭାଜପା ନେତ୍ରୀ ଉମା ଭାରତୀ ଏସ୍ପିଙ୍କ ସମର୍ଥନରେ ଆଗେଇ ଆସିଛନ୍ତି। କଂଗ୍ରେସ ଏହି ପ୍ରସଙ୍ଗକୁ ରାଜନୀତୀକରଣ କରିବାକୁ ଉଦ୍ୟମ କରୁଥିବା ସେ ଅଭିଯୋଗ କରିଛନ୍ତି। ପାକିସ୍ତାନ ସପକ୍ଷରେ ସ୍ଲୋଗାନ ଦେବା ସହ ପୋଲିସକୁ ଗାଳିଦେବା ଓ ଟେକାମାଡ଼ କରୁଥିତ୍ବା ବିକ୍ଷୋଭକାରୀଙ୍କୁ ପାକିସ୍ତାନ ଚାଲିଯାଅ କହିବା ଯଥାର୍ଥ ବୋଲି ଉମା ଭାରତୀ କହିଛନ୍ତି।