କଟକ ଅଫିସ, ୧୪ା୯: କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀ ଗୁରୁବାର ମଙ୍ଗଳାବାଗସ୍ଥିତ ଗୋବର୍ଦ୍ଧନ ଗୋ-ଧାମ ପରିଦର୍ଶନ କରିଥିଲେ। ଗୋମାତାଙ୍କୁ ଏଠାରେ କିଭଳି ରଖା ଯାଉଛି ଏବଂ ସେମାନଙ୍କ ସ୍ବାସ୍ଥ୍ୟବସ୍ଥା ସମ୍ପର୍କରେ ଅବଗତ ହୋଇଥିଲେ। ମାତ୍ର କେନ୍ଦ୍ରମନ୍ତ୍ରୀଙ୍କ ପରିଦର୍ଶନ ୨୪ଘଣ୍ଟା ନପୂରୁଣୁ କଟକ ମହାନଗର ନିଗମ ପକ୍ଷରୁ ଏହାକୁ ଭାଙ୍ଗି ଦିଆଯାଇଛି। ସରକାରୀ ଜମି ଉପରେ ରହିଥିବାରୁ ଏହାକୁ ଉଚ୍ଛେଦ କରାଯାଇଛି। ଶୁକ୍ରବାର ମଙ୍ଗଳାବାଗରୁ ହାଓଡ଼ା ମୋଟରର୍ସ ଓ ମାତାମଠରୁ ମେରିଟାଇମ୍ ମ୍ୟୁଜିୟମ ପର୍ଯ୍ୟନ୍ତ ଉଚ୍ଛେଦ କରାଯାଇଥିଲା। କଟକ ମହାନଗର ନିଗମ, ଜିଲାପ୍ରଶାସନ ଓ ପୋଲିସ ପ୍ରଶାସନ ମିଳିତ ଭାବେଜବରଦଖଲ ଉଚ୍ଛେଦ କରିଥିଲେ। ଏଥିରେ ପ୍ରାୟ ୩୦ଟି ଉଠା ଦୋକାନ ଉଚ୍ଛେଦ କରାଯାଇଥିବାବେଳେ ଗୋବର୍ଦ୍ଧନ ଗୋ-ଧାମ ମଧ୍ୟ ବାଦ ପଡ଼ି ନ ଥିଲା। ଏହାକୁ ନେଇ ଅଞ୍ଚଳରେ ଚାପା ଉତ୍ତେଜନା ଦେଖା ଦେଇଥିଲା।
ଗୋ-ଧାମକୁ ଉଚ୍ଛେଦ କରିବା ପୂର୍ବରୁ ଏଠାରେ ଥିବା ୫୦ଟି ଗାଈ ବାଛୁରୀ ଆଦିଙ୍କୁ ଜଗତପୁରସ୍ଥିତ ଗୋଶାଳାକୁ ସ୍ଥାନାନ୍ତର କରାଯାଇଥିଲା। ଏଥିସହ ସାଇ ମନ୍ଦିର ପାର୍ଶ୍ୱରେ ଜବରଦଖଲ ଜମିରେ ଥିବା ଘରଗୁଡ଼ିକୁ ମଧ୍ୟ ଉଚ୍ଛେଦ କରାଯାଇଥିଲା। ତେବେ ଏହି ସ୍ଥାନକୁ ଜବରଦଖଲ ମୁକ୍ତ କରିବା ପରେ ଏଠାରେ କଟକ ସହରର ସବୁଠାରୁ ବଡ଼ ପାର୍କିଂସ୍ଥାନ ନିର୍ମାଣ କରିବା ପାଇଁ ସିଏମ୍ସି, ଜିଲା ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଥିବା ସିଏମ୍ସିର ଜଣେ ଅଧିକାରୀ ପ୍ରକାଶ କରିଛନ୍ତି। ବହୁ ପୂର୍ବରୁ ଏହି ଜବରଦଖଲ ଉଚ୍ଛେଦ କରାଯିବାକୁ ନିଷ୍ପତ୍ତି ହୋଇଥିବା ଏହି ଅଧିକାରୀ କହିଛନ୍ତି। ସହର ଟ୍ରାଫିକ ସମସ୍ୟା ତଥା କଟକ ବଡ଼ମେଡିକାଲକୁ ରୋଗୀମାନଙ୍କୁ ନେଇ ଆସୁଥିବା ଯାନବାହନଗୁଡ଼ିକ ଏଠାରେ ପାର୍କିଂ କରାଇବା ପାଇଁ ପ୍ରଶାସନିକସ୍ତରରେ ନିଷ୍ପତ୍ତି ହୋଇଥିଲା। କେନ୍ଦ୍ରମନ୍ତ୍ରୀ ଏହି ଗୋଧାମକୁ ପରିଦର୍ଶନରେ ଆସିବା ଏକ ସଂଯୋଗ ଥିଲା ବୋଲି ଅଧିକାରୀ ଜଣକ ନିଜ ନାମଗୋପନ ରଖିବା ସର୍ତ୍ତରେ କହିଛନ୍ତି । ସେହିପରି ମାତାମଠ ନିକଟରେ ମଧ୍ୟ ଜବରଦଖଲ ଉଚ୍ଛେଦ କରାଯାଇ ସେଠାରେ ଏକ ପାର୍କିଂ ସ୍ଥାନ ନିର୍ମାଣ ହେବାର ଯୋଜନା ରହିଥିବା ସିଏମସି ଏନଫୋର୍ସମେଣ୍ଟ ବିଭାଗ ପକ୍ଷରୁ ଜଣାପଡ଼ିଛି। ଉଚ୍ଛେଦ ସମୟରେ ସିଏମ୍ସି ଏନଫୋର୍ସମେଣ୍ଟ ଅଧିକାରୀ ପ୍ରଭାକର ସାହୁ, ମଙ୍ଗଳାବାଗ ଆଇଆଇସି ଅମିତାଭ ମହାପାତ୍ର ପ୍ରମୁଖ ଉପସ୍ଥିତ ଥିଲେ।