ଗାଙ୍ଗଟକ୍,୨୮ା୫(ପି.ଟି.): ସିକିମ୍ ମୁଖ୍ୟମନ୍ତ୍ରୀ ଭାବେ ଏସ୍କେଏମ୍ (ସିକିମ୍ କ୍ରାନ୍ତିକାରୀ ମୋର୍ଚ୍ଚା) ଅଧ୍ୟକ୍ଷ ପ୍ରେମ୍ ସିଂ ତମାଙ୍ଗ ଓରଫ ପି.ଏସ୍. ଗୋଲେ ସୋମବାର ଶପଥ ଗ୍ରହଣ କରିଛନ୍ତି। ତାଙ୍କ ସହିତ ୧୧ ଏସ୍କେଏମ୍ ବିଧାୟକ ମନ୍ତ୍ରୀ ଭାବେ ଶପଥ ନେଇଛନ୍ତି। ପାଲଜୋର ଷ୍ଟାଡିୟମ୍ରେ ଅନୁଷ୍ଠିତ ଶପଥ ଗ୍ରହଣ ଉତ୍ସବରେ ରାଜ୍ୟପାଳ ଗଙ୍ଗା ପ୍ରସାଦ ମୁଖ୍ୟମନ୍ତ୍ରୀ ଓ ବିଧାୟକମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ବିଧାୟକ ନ ଥିବା ଗୋଲେଙ୍କୁ ଶନିବାର ଏସ୍କେଏମ୍ ବିଧାୟକ ଦଳ ବୈଠକରେ ନେତା ନିର୍ବାଚନ କରାଯାଇଥିଲା। ଶପଥ ନେଇଥିବା ମନ୍ତ୍ରୀମାନେ ହେଲେ କୁଙ୍ଗା ନିମା ଲେପ୍ଚା, ସୋନମ୍ ଲାମା, ବେଦୁ ସିଂ ପନ୍ଥ, ଡ. ମଣିକୁମାର ଶର୍ମା, ଅରୁଣ କୁମାର ଉପ୍ରେତି, ସନ୍ଦୁପ୍ ଲାପ୍ଚା, ଲୋକନାଥ ଶର୍ମା, ମିଙ୍ଗ୍ମା ନୋର୍ବୁ ଶେର୍ପା, କର୍ମା ଲୋଡେ ଭୂତିଆ, ଭୀମ୍ ହାଙ୍ଗ ଲିମ୍ବୁ ଏବଂ ସଞ୍ଜିତ ଖରେଲ।
ଗୋଲେ ନେପାଳୀ ଭାଷାରେ ଶପଥ ନେଇଥିବାବେଳେ ଷ୍ଟାଡିୟମ୍ରେ ହଜାର ହଜାର ଦଳୀୟ ସମର୍ଥକ ଉପସ୍ଥିତ ରହି ତାଙ୍କୁ ଉତ୍ସାହିତ କରିଥିଲେ। ଶପଥ ଗ୍ରହଣ ଉତ୍ସବରେ ବିଦାୟୀ ମୁଖ୍ୟମନ୍ତ୍ରୀ ପଓ୍ବନ କୁମାର ଚାମଲିଙ୍ଗ୍ ଏବଂ ସିକିମ୍ ଡେମୋକ୍ରାଟିକ୍ ଫ୍ରଣ୍ଟ (ଏସ୍ଡିଏଫ୍)ର ବରିଷ୍ଠ ନେତାମାନେ ଯୋଗଦେଇ ନ ଥିଲେ। ୨୦୧୩ରେ ଗଠିତ ଏସ୍କେଏମ୍ ୩୨ ଆସନ ବିଶିଷ୍ଟ ସିକିମ ବିଧାନସଭାରେ ୧୭ ଆସନରେ ବିଜୟୀ ହୋଇଥିବାବେଳେ ଶାସକ ଦଳ ଏସ୍ଡିଏଫ୍କୁ ୧୫ ଆସନ ମିଳିଥିଲା। ଫଳରେ ଦୀର୍ଘ ୨୪ ବର୍ଷ ଧରି କ୍ଷମତାରେ ରହିଆସିଥିବା ଚାମ୍ଲିଙ୍ଗ୍ ସରକାରଙ୍କୁ ବିଦାୟ ନେବାକୁ ହୋଇଛି।