କଟକ ଅଫିସ,୨୪ା୧- ଚଳିତ ସି.କେ. ନାଇଡୁ ଟ୍ରଫିରେ ରାଜ୍ୟ ୨୩ବର୍ଷରୁ କମ୍ ବାଳକ ଦଳ ଲଗାତାର ୬ଷ୍ଠ ବିଜୟ ହାସଲ କରିଛ। ଏଥି ସହିତ ଦଳ ପ୍ଲେଟ୍ ଗ୍ରୁପର ଶୀର୍ଷ ସ୍ଥାନ ବଜାୟ ରଖିଛ। କୋଲକାତାର ଭିଡ଼ିଓକନ୍ ଗ୍ରାଉଣ୍ଡରେ ଗୁରୁବାର ଶେଷ ହୋଇଥିବା ମ୍ୟାଚ୍ରେ ଓଡ଼ିଶା ଇନିଂସ ଓ ୧୮୨ରନରେ ମଣିପୁରକୁ ପରାସ୍ତ କରିଥିଲା। କାର୍ତ୍ତିକ ବିଶ୍ୱାଳଙ୍କ ଅଲରାଉଣ୍ଡର ପ୍ରଦର୍ଶନ ବଳରେ ଓଡ଼ିଶା ଏହି ମ୍ୟାଚ୍ ଜିତିଛି।
ପ୍ରଥମେ ବ୍ୟାଟିଂ କରିଥିବା ଓଡ଼ିଶା ୯ ଉଇକେଟ ହରାଇ ୫୦୯ରନ କରି ଇନିଂସ ଘୋଷଣା କରିଥିଲା। କାର୍ତ୍ତିକ ଅପରାଜିତ ୧୧୮ରନ କରିଥିବା ବେଳେ ଅଧିନାୟକ ସ୍ବସ୍ତିକ ସାମଲ ୫୯, ବିନିତ କୁମାର ମହାନ୍ତି ୬୦, ରାହୁଲ ଚୌଧୁରୀ ୭୬, ଶୁଭମ ଶତ୍ରୁଜିତ ୫୩ରନ କରିଥିଲେ। ମଣିପୁର ପକ୍ଷରୁ କିଶାନ ସର୍ବାଧିକ ୪ଟି ଉଇକେଟ ଅକ୍ତିଆର କରିଥିଲେ। ଜବାବରେ ମଣିପୁରର ପ୍ରଥମ ଇନିଂସ ୧୦୫ରନରେ ସୀମିତ ରହିଥିଲା। କାର୍ତ୍ତିକ ସର୍ବାଧିକ ୫ଟି ଉଇକେଟ ଅକ୍ତିଆର କରିଥିବା ବେଳେ ପ୍ରୀତ କନୱର ସିଂ ଚୌହ୍ବାନ ୨ଟି, ତାରିଣୀ ଶ’ ଓ ହର୍ଷିତ ରାଥୋଡ଼ ଗୋଟିଏ ଲେଖାଏ ଉଇକେଟ ପାଇଥିଲେ। ଫଲୋଅନ ପାଇ ମଣିପୁର ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିଲା। ଦ୍ୱିତୀୟ ଇନିଂସରେ ମଧ୍ୟ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା ମଣିପୁର। ୨୨୨ରନରେ ଦଳ ଅଲଆଉଟ ହୋଇଥିଲା। ବିକାଶ ସିଂ ସର୍ବାଧିକ ୬୧ରନ କରିଥିଲେ। ଓଡ଼ିଶା ପକ୍ଷରୁ ହର୍ଷିତ ରାଥୋଡଙ୍କୁ ୩ଟି ଉଇକେଟ ମିଳିଥିବା ବେଳେ ରାହୁଲ ଚୌଧୁରୀ ଓ ପ୍ରୀତ କନୱର ୨ଟି ଲେଖାଏ ଉଇକେଟ ପାଇଥିଲେ।
