ନୂଆଗାଁ,୩୦।୫ (ଡି.ଏନ୍.ଏ.): ନୟାଗଡ଼ ଜିଲା ନୂଆଗାଁ ବ୍ଲକ ଉଦୟପୁର ପଞ୍ଚାୟତସ୍ଥ ସିଙ୍ଗପୁର ଗ୍ରାମରେ ମଙ୍ଗଳବାର ଅପରାହ୍ନରେ କାଳବୈଶାଖୀ ତାଣ୍ଡବ ଲୀଳା ଘଟିଛି। ଏହା ଏକ ଆଦିବାସୀ ଅଧ୍ୟୁଷିତ ଗ୍ରାମ ଓ ୩୦ ପରିବାର ରହୁଛନ୍ତି। ଅଧିକାଂଶ ଲୋକ ଦିନ ମଜୁରିଆ ଭାବେ କାମ କରୁଥିବାବେଳେ କେବଳ ୪ ପରିବାରର ଛାତ ଓ ଅନ୍ୟମାନଙ୍କର ଚାଳ ଛପର ଘର ରହିଛି। କାଳବୈଶାଖୀ ପ୍ରଭାବରେ ଜୋର୍ ପବନ ବହିବା ଯୋଗୁ ଗ୍ରାମବାସୀଙ୍କ ଚାଳଛପର ଘର ସମ୍ପୂର୍ଣ୍ଣ ଉଡିଯାଇଛି । ଗଛ ପଡ଼ି ବିଦ୍ୟୁତ୍ ତାର ଛିଣ୍ଡି ଯାଇଥିବାରୁ ବିଦ୍ୟୁତ୍ ସରବରାହ ମଧ୍ୟ ବ୍ୟାହତ ହୋଇଛି। ଘରର ଛପର ଉଡିଯାଇଥିବା ବେଳେ ତାହାକୁ ମରାମତି କରିବା ପାଇଁ ଲୋକଙ୍କ ପାଖରେ ନଡ଼ା ନାହିଁ । ଖଜୁରି ବାହୁଙ୍ଗିରେ ଘର ଛପର କରିବାକୁ ଚାହିଁଲେ ବି ସ୍ଥାନୀୟ ବଣରେ ଖଜୁରି ଗଛ ପୋଡ଼ି ଯାଇଥିବାରୁ ଏହା ବିପନ୍ନଙ୍କୁ ଚିନ୍ତାଗ୍ରସ୍ତ କରିଛି। ତେଣୁ ବାତ୍ୟା ପୀଡ଼ିତ ଗ୍ରାମବାସୀଙ୍କୁ ସରକାରଙ୍କ ତରଫରୁ ଜରି ପାଲ ସହ ଆର୍ଥତ୍କ ସହଯୋଗ ପ୍ରଦାନ ପାଇଁ ଦାବି ହୋଇଛି। ଉଦୟପୁର ସରପଞ୍ଚ ଅସିତ କୁମାର ପଟ୍ଟନାୟକଙ୍କ ସମେତ କୁଳମଣି ଜାନି, ରବୀନ୍ଦ୍ର ଜାନି, ଭମା ଜାନି, ଗଗନ ଜାନି, ମନ୍ଦର ପ୍ରଧାନ, ସଂସାରି ଜାନି ପ୍ରମୁଖ ଗ୍ରାମବାସୀ ନୂଆଗାଁ ତହସିଲଦାରଙ୍କୁ ଭେଟିିଛନ୍ତି। ରାଜସ୍ବ ନିରୀକ୍ଷକ ଅନୁଧ୍ୟାନ କରିବା ପରେ ନିୟମାନୁସାରେ ସହାୟତା ପ୍ରଦାନ କରାଯିବ ବୋଲି ନୂଆଗାଁ ତହସିଲଦାର ପ୍ରଭାକର ସେଠୀ ସୂଚନା ଦେଇଛନ୍ତି।