ନୂଆଦିଲ୍ଲୀ,୩୦ା୧୧(ପି.ଟି.): ସୁପ୍ରିମକୋର୍ଟ ଏକ ନୂଆ ରୋଷ୍ଟର୍ ଜାରି କରିଛନ୍ତି। ଏଣିକି ଜନସ୍ବାର୍ଥ ମାମଲା(ପିଆଇଏଲ୍)ଗୁଡ଼ିକର ଶୁଣାଣି ଭାରତର ପ୍ରଧାନ ବିଚାରପତି (ସିଜେଆଇ) ଏସ୍.ଏ. ବୋବ୍ଡେଙ୍କ ସହ ଅନ୍ୟ ୩ ବରିଷ୍ଠତମ ବିଚାରପତି କରିବେ ବୋଲି ଏଥିରେ ଉଲ୍ଲେଖ କରାଯାଇଛି।
ସୁପ୍ରିମକୋର୍ଟ ବିଚାରପତିମାନଙ୍କ କାର୍ଯ୍ୟ ବଣ୍ଟନ ପାଇଁ ଉଦ୍ଦିଷ୍ଟ ନୂଆ ରୋଷ୍ଟର ନଭେମ୍ବର ୨୬ରୁ ଲାଗୁ ହୋଇଛି। ସିଜେଆଇ ବୋବ୍ଡେଙ୍କ ସହ ଏନ୍.ଭି. ରମାନ୍ନା, ଅରୁଣ ମିଶ୍ର ଏବଂ ଆର୍.ଏଫ୍ ନରିମାନ୍ ପିଆଇଏଲ୍ ଏବଂ ଲେଟର୍ ପିଟିଶନଗୁଡ଼ିକର ଶୁଣାଣି କରିବେ। ଏହି ରୋଷ୍ଟର୍ ପୂର୍ବ ତୁଳନାରେ ସାମାନ୍ୟ ଭିନ୍ନ। ପୂର୍ବତନ ସିଜେଆଇ ରଞ୍ଜନ ଗୋଗୋଇ ପିଆଇଏଲ୍ ବିଷୟଗୁଡ଼ିକୁ ନିଜ ସହ ଶୀର୍ଷ ୫ ବିଚାରପତିଙ୍କୁ ଦେଇଥିଲେ। ସିଜେଆଇ ବୋବ୍ଡେ ପିଆଇଏଲ୍ ସହ ଅବମାନନା, ନିର୍ବାଚନ, ହେବିୟସ୍ କର୍ପସ୍, ସାମାଜିକ ନ୍ୟାୟ, ପ୍ରତ୍ୟକ୍ଷ ଓ ପରୋକ୍ଷ କର ମାମଲା ଆଦି ନିଜ ପାଖରେ ରଖିଛନ୍ତି। ସେହିପରି ଆପରାଧିକ ମାମଲା ଓ ତଦନ୍ତ କମିଶନ, କମ୍ପାନୀ ଆଇନ, ମନୋପଲିଷ୍ଟିକ୍ ଆଣ୍ଡ ରେଷ୍ଟ୍ରିକ୍ଟିଭ୍ ଟ୍ରେଡ୍ ପ୍ରାକ୍ଟିସ୍, ଭାରତର ଟେଲିକମ୍ ନିୟନ୍ତ୍ରକ କର୍ତ୍ତୃପକ୍ଷ, ସିକ୍ୟୁରିଟି ଆଣ୍ଡ ଏକ୍ସଚେଞ୍ଜ ବୋର୍ଡ ଅଫ୍ ଇଣ୍ଡିଆ ଏବଂ ରିଜର୍ଭ ବ୍ୟାଙ୍କ ସଂକ୍ରାନ୍ତ ମାମଲାଗୁଡ଼ିର ଶୁଣାଣି କରିବେ।
ନୂଆ ରୋଷ୍ଟର୍ ଅନୁସାରେ ଜଷ୍ଟିସ୍ ରମାନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସଶସ୍ତ୍ର ବଳ, ଅର୍ଦ୍ଧସାମରିକ ବାହିନୀ, କ୍ଷତିପୂରଣ, ଆପରାଧିକ ଓ ସାଧାରଣ ଦଓ୍ବୋନି ପ୍ରସଙ୍ଗ, ନ୍ୟାୟିକ ଅଧିକାରୀଙ୍କ ସମସ୍ୟା, ସୁପ୍ରିମକୋର୍ଟ କର୍ମଚାରୀ, ହାଇକୋର୍ଟ, ଜିଲା କୋର୍ଟ ଓ ଟ୍ରିବ୍ୟୁନାଲ ସମ୍ପର୍କିତ ମାମଲାଗୁଡ଼ିକର ବିଚାର କରିବେ। ସେହିପରି ଜଷ୍ଟିସ୍ ଅରୁଣ ମିଶ୍ରଙ୍କ ଖଣ୍ଡପୀଠ ଭୂମି ଅଧିଗ୍ରହଣ, ଅଧିଯାଚନା, ମେଡିକାଲ କଲେଜଗୁଡ଼ିକରେ ଆଡ୍ମିଶନ ପାଇଁ ସଂରକ୍ଷଣ ଆଦି ପ୍ରସଙ୍ଗ ବୁଝିବେ। ଜଷ୍ଟିସ୍ ଆର୍.ଏଫ୍. ନରିମାନ୍ ପିଆଇଏଲ୍ ସହ ଫାମିଲି ଆଇନ ସମ୍ପର୍କିତ ମାମଲା, ସରକାର ଓ ସ୍ବାୟତ୍ତ ସଂସ୍ଥାଗୁଡ଼ିକ ପକ୍ଷରୁ ଦିଆଯାଉଥିବା ଲିଜ୍ ଓ କଣ୍ଟ୍ରାକ୍ଟ ପ୍ରସଙ୍ଗରେ ଶୁଣାଣି କରିବେ। ଜଷ୍ଟିସ୍ ଆର୍. ବାନୁମତୀଙ୍କ ଖଣ୍ଡପୀଠ ଶ୍ରମ, ଭଡ଼ା ଆଇନ, ଜମି ଆଇନ, ଚାଷଜମିର ସ୍ବତ୍ୱ ଆଦି ପ୍ରସଙ୍ଗରେ ଦାଏର ପିଟିଶନର ଶୁଣାଣି କରିବେ। ସେହିପରି ସୁପ୍ରିମକୋର୍ଟ କଲେଜିୟମ୍ରେ ସିଜେଆଇଙ୍କ ସହ ଜଷ୍ଟିସ୍ ରମାନ୍ନା, ମିଶ୍ର, ନରିମାନ୍ ଓ ବାନୁମତୀ ରହିଛନ୍ତି।