ଆଇପିଏଲ ଏଭଳି ଏକ ପ୍ଲାଟଫର୍ମ, ଯେଉଁଠାରେ ପ୍ରାୟତଃ ଅନ୍ତର୍ଜାତୀୟ ଷ୍ଟାରମାନେ ଖେଳନ୍ତି। ମାତ୍ର ଆଇପିଏଲରେ ଏମିତି ଜଣେ ଖେଳାଳି ଅଛନ୍ତି, ଅନ୍ତର୍ଜାତୀୟ କ୍ରିକେଟ ଖେଳିବା ତ ପର କଥା ସେ ଘରୋଇ କ୍ରିକେଟରେ ମଧ୍ୟ ଖେଳି ନ ଥିଲେ। ଆଉ ଯେଉଁ ବୟସରେ କ୍ରିକେଟରମାନେ ଅବସର ନେଇ ଅନ୍ୟ କାର୍ଯ୍ୟରେ ମନ ଦିଅନ୍ତି, ସେ ବୟସରେ ଆଇପିଏଲରେ ପଦାର୍ପଣ କରିଥିଲେ। ସେ ହେଉଛନ୍ତି ଲେଗ୍ ସ୍ପିନର ପ୍ରବୀଣ ତାମ୍ବେ। ୨୦୧୩ରେ ୪୧ ବର୍ଷ ୨୧୨ ଦିନ ବୟସରେ ସେ ଆଇପିଏଲ ପ୍ରଥମ ମ୍ୟାଚ୍ ଖେଳିଥିଲେ। ସେହିବର୍ଷ ହିଁ ତାଙ୍କୁ ମୁମ୍ବାଇ ପାଇଁ ରଣ୍ଜୀ ଖେଳିବାକୁ ସୁଯୋଗ ମିଳିଥିଲା। ଏହାର ପର ବର୍ଷ ସେ ଆଇପିଏଲରେ ରାଜସ୍ଥାନ ରୟାଲ୍ସ ପାଇଁ କୋଲକୋତା ନାଇଟ ରାଇଡର୍ସ(କେକେଆର୍) ବିପକ୍ଷରେ ହ୍ୟାଟ୍ରିକ ନେଇ ଚର୍ଚ୍ଚାକୁ ଆସିଥିଲେ। ୨୦୧୪ ଆଇପିଏଲରେ ସର୍ବାଧିକ ଉଇକେଟ ନେଇଥିବା ବୋଲରଙ୍କ ତାଲିକାରେ ସ୍ଥାନ ପାଇଥିଲେ। ସେ ଏପର୍ଯ୍ୟନ୍ତ ୩୯ ଟି୨୦ ମ୍ୟାଚ୍ରେ ୪୪ ଉଇକେଟ ନେଇସାରିଛନ୍ତି। ତାଙ୍କୁ ପୁଣି ଥରେ ୨୦୨୦ ଆଇପିଏଲରେ ଦେଖିବାକୁ ମିଳିବ। ୨୦ ଲକ୍ଷ ଟଙ୍କାର ବେସ ପ୍ରାଇସରେ ତାଙ୍କୁ କେକେଆର୍ କିଣିଛି। ଆଇପିଏଲର ୧୩ତମ ସଂସ୍କରଣର କୌଣସି ମ୍ୟାଚ୍ରେ ତାଙ୍କୁ ଖେଳିବାକୁ ସୁଯୋଗ ମିଳିଲେ, ଆଇପିଏଲ ଖେଳିବାରେ ସେ ସବୁଠୁ ବରିଷ୍ଠ ଖେଳାଳି ହେବେ। ତାଙ୍କୁ ଏବେ ୪୮ ବର୍ଷ। କୌତୂହଳର କଥା ହେଉଛି, କେକେଆର୍ ଦଳର କୋଚ୍ ବ୍ରେଣ୍ଡନ ମ୍ୟାକ୍କୁଲମ(୩୮)ଙ୍କଠାରୁ ତାମ୍ବେ ୧୦ ବର୍ଷ ବଡ଼।