ସିନାପାଲି,୯।୮(ଡି.ଏନ.ଏ.)-ନୂଆପଡା ସିନାପାଲି ଅଞ୍ଚଳରେ ଗତ ୨ ଦିନର ଲଗାଣ ବର୍ଷାରେ ବ୍ୟାପକ କ୍ଷୟକ୍ଷତି ହୋଇଛି । ଅନେକ ଲୋକଙ୍କ ଘରଦ୍ୱାରା ଭୁଶୁଡି ପଡିଥିବା ବେଳେ ଚାଷଜମିଗୁଡିକରେ ହିଡ ଭାଙ୍ଗି ପୋତି ହୋଇଯାଇଛି। ଶହ ଶହ ଏକର ଜମି ବାଲିଚର ହୋଇଯାଇଛି । ସୀମାନ୍ତବର୍ତ୍ତୀ ନୂଆମାଲପଡା ଗ୍ରାମପଞ୍ଚାୟତ ଅଖଡାଭଟାସ୍ଥିତ ପୋଲ ଭୁଶୁଡିଯାଇଛି । ଫଳରେ ଗ୍ରାମପଞ୍ଚାୟତ କାର୍ଯ୍ୟାଳୟ ସମେତ ସଦର ସିନାପାଲିକୁ ଯୋଗାଯୋଗ ବିଚ୍ଛିନ ହୋଇରହିଛି। ଅଖଡାଭଟା ନିକଟସ୍ଥ ମେଣ୍ଢାରନାଳରେ ବନ୍ୟାଜଳ ପ୍ରବାହିତ ଯୋଗୁ ଯାତାୟାତ ବାଧାପ୍ରାପ୍ତ ହେଉଛି। ଫଳରେ ଅଖଡାଭଟା ଗ୍ରାମବାସୀ ଜଳବନ୍ଦୀ ଭାବେ ରହିଯାଇଛନ୍ତି । ଗୁରୁବାର ସିନାପାଲି ବିଡିଓ ସୁରେନ୍ଦ୍ର ମେହେର, କେନ୍ଦୁମୁଣ୍ଡା ଆରଆଇ ରମେଶ ଚନ୍ଦ୍ର ମେହେର, ସ୍ଥାନୀୟ କୃଷି କର୍ମଚାରୀ ପବିତ୍ର ହଂସ ପ୍ରମୁଖ କ୍ଷୟକ୍ଷତି ଅଞ୍ଚଳ ପରିଦର୍ଶନ କରିଛନ୍ତି । କ୍ଷୟକ୍ଷତିର ସବିଶେଷ ରିପୋର୍ଟ ଉଚ୍ଚ କର୍ତ୍ତୃପକ୍ଷଙ୍କ ଜଣାଇ କ୍ଷତି ପୂରଣ ଦିଆଯିବ ଏବଂ ଗ୍ରା.ପ. ପାଣ୍ଠିରୁ ରାସ୍ତା ମରାମତି ଯଥାଶୀଘ୍ର କରାଯିବ ଏବଂ ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ପାଇଁ ସଂପୃକ୍ତ ବିଭାଗକୁ ଜଣାଇ ପଦକ୍ଷେପ ନିଆଯିବ ବୋଲି ପ୍ରକାଶ କରିଛନ୍ତି। ନୂଆମାଲପଡାର ଚାରିଜଣଙ୍କ ଘର ଭୁଶୁଡି ପଡିଥିବା ବେଳେ ଟଙ୍କାମାଲ ଗାଁର ଦୁଇଜଣଙ୍କ ଘର ଭୁଶୁଡି ପଡିଥିବା ପ୍ରାଥମିକ ତଦନ୍ତରୁ ଜଣାପଡିଛି ବୋଲି କେନ୍ଦୁମୁଣ୍ଡା ରାଜସ୍ବ ଅଧିକାରୀ ରମେଶ ଚନ୍ଦ୍ର ମେହେର ପ୍ରକାଶ କରିଛନ୍ତି । ବର୍ଷାରେ କ୍ଷୟକ୍ଷତି ହୋଇଥିବ ମକା, ବାଦାମ, ବିରି ସମେତ ଡାଲିଜାତୀୟ ଫସଲର ସବିଶେଷ ରିପୋର୍ଟ ପ୍ରସ୍ତୁତ କରି ଚାଷୀମାନଙ୍କୁ କ୍ଷତି ପୂରଣ ଦିଆଯିବ ବୋଲି କୃଷି କର୍ମଚାରୀ ପବିତ୍ର ହଂସ ପ୍ରକାଶ କରିଛନ୍ତି । ସିନାପାଲି ଅଞ୍ଚଳରେ ଲଗାଣ ବର୍ଷା ଯୋଗୁ ସୀମାନ୍ତବର୍ତ୍ତୀ ନୂଆମାଲପଡା, ନଙ୍ଗଲବୋଡ, ଘାଟମାଲ ଅଞ୍ଚଳରେ ବିଶେଷ କ୍ଷୟକ୍ଷତି ଘଟାଇଛି। ଜଙ୍ଗଲବର୍ତ୍ତୀ ଅଞ୍ଚଳ ହୋଇଥିବାରୁ ଜଙ୍ଗଲର ଛୋଟ ଛୋଟ ଝରଣାର ପାଣି ଆସି ସ୍ଥାନୀୟ ଅଞ୍ଚଳର ପୋଖରୀଗୁଡିକ ଭାଙ୍ଗି ଏଭଳି ଅବସ୍ଥା ହୋଇଥିବା ଜଣାପଡିଛି ।
ସେହିପରି ନୂଆମାଲପଡାସ୍ଥିତ ଖନ୍ଦାପଡା ସରକାରୀ ପୋଖରୀ ଜମିହୁଡା ଭାଙ୍ଗି ବ୍ୟାପକ କ୍ଷୟକ୍ଷତି ଘଟାଇଛି। ପୋଖରୀ ତଳି ଅଞ୍ଚଳ ଚାଷଜମି ସମ୍ପୂର୍ଣ୍ଣ ଭାବେ ମାଟି ପୋତିଦେଇଛି। ନୂଆମାଲପଡା ଗ୍ରାମର ଚିନ୍ମୟ କୁମାର ମୁଣ୍ଡଙ୍କ ବେସରକାରୀ ପୋଖରୀ ହୁଡା ଭାଙ୍ଗି ତଳି ଅଞ୍ଚଳର ଶତାଧିକ ଏକର ଚାଷ ଜମିରେ ବାଲିଚର ହୋଇଯାଇଛି।