କଟକ ଅଫିସ,୮ା୧- ବାରବାଟୀ ଷ୍ଟାଡିୟମରେ ଚାଲିଥିବା ସିନିୟର ମହିଳା ଟି୨୦ ଚ୍ୟାଲେଞ୍ଜର ଟ୍ରଫିରେ ଇଣ୍ଡିଆ-ବି ଦଳ ଦ୍ୱିତୀୟ ବିଜୟ ହାସଲ କରିଛି। ୩ଟି ମ୍ୟାଚ୍ରୁ ୧୦ ପଏଣ୍ଟ ହାସଲ କରି ପଏଣ୍ଟ ଟେବୁଲର ଶୀର୍ଷ ସ୍ଥାନରେ ରହିବା ସହିତ ପ୍ରଥମ ଦଳ ଭାବେ ଫାଇନାଲରେ ସ୍ଥାନ ସୁରକ୍ଷିତ କରିଛି ସ୍ମୃତି ମାନ୍ଧାନାଙ୍କ ନେତୃତ୍ୱାଧୀନ ଏହି ଦଳ। ମଙ୍ଗଳବାର ହରମନପ୍ରିତ କୌରଙ୍କ ନେତୃତ୍ୱାଧୀନ ଇଣ୍ଡିଆ-ସିକୁ ଇଣ୍ଡିଆ-ବି ଦଳ ୩୫ରନରେ ହରାଇଥିଲା। ଇଣ୍ଡିଆ-ବି ପକ୍ଷରୁ ଖେଳୁଥିବା ଓଡ଼ିଶାର ସୁଶ୍ରୀ ଦିବ୍ୟଦର୍ଶିନୀ ୨ଟି ଉଇକେଟ ଅକ୍ତିଆର କରିବା ସହ ଦଳକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ତାଙ୍କ ବୋଲିଂ ସ୍ପେଲ ସୁଶ୍ରୀ ୪-୦-୧୮-୨ ରହିଥିଲା।
ଇଣ୍ଡିଆ-ବି ଅଧିନାୟିକା ସ୍ମୃତି ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରାରମ୍ଭରୁ ଦଳ ଚମତ୍କାର ବ୍ୟାଟିଂ କରିଥିଲା। ନିର୍ଦ୍ଧାରିତ ୨୦ ଓଭରରେ ଦଳ ୪ ଉଇକେଟ ହରାଇ ୧୩୯ରନ କରିଥିଲା। ଅଧିନାୟିକା ସ୍ମୃତି ସର୍ବାଧିକ ୩୪ରନ କରିଥିଲେ। ଏହା ମଧ୍ୟରେ ୪ ଚୌକା ଓ ୨ଟି ଛକା ସାମିଲ ଥିଲା। ଏହାଛଡ଼ା ଭେଲାସ୍ବାମୀ ଭନିଥା ୩୦, ରିଚା ଘୋଷ ୨୨, ଜେମିହା ରୋଡ୍ରିଗ୍ବେଜ ୨୦ରନରେ ଆଉଟ ହୋଇଥିବା ବେଳେ ପୂଜା ବସ୍ତ୍ରକାର ୧୫ ଓ ଶିଖା ପାଣ୍ଡେ ୧୪ରନରେ ଅପରାଜିତ ଥିଲେ। ଇଣ୍ଡିଆ-ଏ ପକ୍ଷରୁ ସ୍ନେହ ରାଣା ସର୍ବାଧିକ ୨ଟି ଉଇକେଟ ନେଇଥିବା ବେଳେ ମାନସୀ ଯୋଶୀ ଓ ରାଧା ଯାଦବ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ। ଜବାବରେ ଇଣ୍ଡିଆ-ଏ ୭ ଉଇକେଟ ହରାଇ ୧୦୪ରନ କରି ପାରିଥିଲା। ଧୁଆଁଧାର ବ୍ୟାଟିଂ ସହ ୩୪ରନ କରିଥିବା ଓପନର ପ୍ରିୟା ପୁନିଆ ସୁଶ୍ରୀଙ୍କ ଶିକାର ହୋଇଥିଲେ। ଦୀପ୍ତି ଶର୍ମା ୩୩ରନ କରିଥିବା ବେଳେ ଅନ୍ୟ କେହି ଖେଳାଳି ଆଖିଦୃଶିଆ ପ୍ରଦର୍ଶନ କରି ପାରି ନଥିଲେ। ତାନିଆ ଭାଟିଆ ୧୧, ଦେବିକା ବୈଦ୍ୟ ୬, ଅଧିନାୟିକା ହରମନପ୍ରିତ କୌର ୬, ଭାରତୀ ଫୁଲମଲି ୧୧, ରାଧା ଯାଦବ ୨ରନ କରିଥିଲେ। ଇଣ୍ଡିଆ ବି ପକ୍ଷରୁ ସୁଶ୍ରୀ ୧୮ରନ ବିନିମୟରେ ୨ଟି ଉଇକେଟ ଅକ୍ତିଆର କରିଥିଲେ। ଅନୁଜା ପାଟିଲଙ୍କୁ ୨ଟି ଉଇକେଟ ମିଳିଥିବା ବେଳେ ତନୁଜା କନୱର, ପୂଜା ବସ୍ତ୍ରକାର ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।